Kom iñchiñ müley taiñ dullial (ngümintual) poyeafiel ta Jewba kam poyeafiel Weküfü ka tañi pu inuma. Mülelay taiñ reyükonküleal tüfachi dungu mu. Poyenieafiyiñ ta Jewba müten, ¡tüfa doy küme rüpü tati!

Chumngechi peiñ nga tati pu weküfü ayükey ñi ngünenkayafiel ka wedalkayafiel ta che. Welu femngechi femkelay ta Jewba. Kiñe chaw reke piwkeyekefi tañi pu pichikeche, taiñ Wenu Chaw piwkeyekefi itrokom che. “Kom tati kümelu ka norngechi dungu küpakey ta Ngünechen mew” (Santiaw 1:17). Jewba turpu rükükelay chem küme dungu no rume ñi eluafiel ta che, tañi Fotüm kütu werküfi Mapu mew ñi lapayal tati pu che ñi duam mu (Efesio 2:4-7).

Tukulpange chem chumi Jesu mülepalu Mapu mew. Chaw Ngünechen tañi Fotüm eluyetufi ñi dunguael tati pu ketro, ka ñi pelotuael pu trawma. Tremoltufi (mongeltubi) tati pu küntro, pu lepra kutran nielu ka itrofill kutran. Wemünentufi pu weküfü. Kafey Jewba tañi newen mu, Jesu wiñomongeltufi kütu kiñeke layelu (Matew 9:32-35; 15:30, 31; Luka 7:11-15).

Jewba koylatukelay taiñ ngünenkayaetew, kidu rüf dungu müten feypikey. Turpu ngünenkachekelay (Ebrew 6:18).

Kiñe mara reke nülkükonlu kiñe wachi mew, femngechi feley fentren pu che, nülkükonküley reke fill koylake dungu mew. Llükaniefingün tati pu layechi che ka tati pu weküfü. Küme duamkülelayngün ñi mülen mu wedake pewma, wedake kürüf (weyake adentun), trafentu, kalku dungu, perimontun ka wele dungu (adümküno dungu). Kom tüfachi feyentun ka wimtun nüwküley Satana ñi koylake dungu mew. Feymu Jewba tañi pu che eluwkelayngün tañi nülkükonal tüfachi wedake dungu mew.

Jewba doy newen-ngey Satana mu. Poyefilmi ta Jewba, kidu kuñiwtukuaeymu tati pu weküfü mu (Santiaw 4:7). Tati pu kalku wedalkalayaeymu. Nigeria mapu mew küla fütrake kalku küpa langümfingün kiñe Dungukelu Iney Ngen Jewba, pinolu am elkünual tañi lof, feymu kalkutufingün. Welu wedalkangelay tüfachi che, fey kiñe kalku müna llükay ka amuy chew ñi mülen ti Dungukelu Iney Ngen Jewba tañi ngünayengetual.

Kontuelmu tati pu weküfü, ngillatuafimi ta Jewba ka üytuafimi, fey ingkañpeaeymu (Proverbios 18:10). Welu Jewba tami kelluaetew, ngelay tami fülkonküleal pu weküfü mew ka poyenoafiel rume. Jewba tañi pu che mülelu kuyfi mu Efeso waria mu, femngechi femingün. Trapümfingün tañi lifru nielu kalku dungu ka lüpümfingün (Hecho 19:19, 20). Famülke mu, Jewba tañi pu che ka femngechi müley tañi femal. Feymu ütrüfentufinge chem dungu rume fülkonkülelu pu wedake püllü engün, yeniekilnge feyti pichike adentun tami küme feleal ka tami kutrankanoaetew, tukuwkilnge  fillke füw tami kutran-noam, ütrüfentufinge tati chillka nielu kalku dungu, ka yeniekilnge feychi pichike adentun nielu püllü trokikelu ta che.

Küpa ayüwülfilmi tami Chaw Ngünechen, müley tami elkünual tati koyla feyentun ka femwenoal wedake dungu. Welu feyka müten no. Fill antü elnge tami poyeafiel Jewba chumngechi ñi ayükeel. Biblia ta feypi chem müley tami femal:

Weküfü ka tati pu inuma Mapu mew nieyngün tañi che kimeltumekelu ka femmekelu wedake dungu. Welu Jewba ka nieyey kidu tañi pu che: pu Dungukelu Iney Ngen Jewba (Isaías 43:10). Wall Mapu püle müleyey epe pura millon che Dungukelu Iney Ngen Jewba. Kom engün yafüluwkeyngün ñi femal kümeke dungu ka kimeltual pu che tati rüf dungu. Fill trokiñke mapu püle trawükeyngün tañi Trawünwe Ruka mu. Amulmi, küme llowngeaymi tati.

Tati pu Dungukelu Iney Ngen Jewba eluwkeyngün ñi kelluafiel tati pu che ñi poyeafiel Chaw Ngünechen. Kidu tami ruka mew kimelelaeymu engün Biblia ñi dungu, ka kimaymi chumngechi küme poyeafiel ta Jewba. Kullilayaymi tami kimeltungeal. Pu Dungukelu Iney Ngen Jewba ayüwünkechi kimelelkefingün ta che tati rüf dungu, kidu engün am piwkeyekefingün ta che ka tañi Wenu Chaw Jewba.