Pichike trokiñ nentungelu mollfüñ mew. Tati mollfüñ niey meli trokiñ: globulos rojos, globulos blancos, plaquetas ka plasma. Tüfachi pu trokiñ wüdamngekey doy pichike trokiñ mu. Tati globulos rojos wüdamentungekey fillke trokiñ mew, kiñe tüfa kiñe proteina hemoglobina pingelu. Pu che ka pu kulliñ ñi mollfüñ mew nentungey hemoglobina ñi pepikayal fillke lawen ñi tremoltuafiel (mongeltobel) pu che nierumenofule globulos rojos kam hemoglobina, kam feyti che rume weda mollfülu.

Tati plasma niey 90% ko, welu ka niey fentren hormonas, sales inorganicas, enzimas ka nutrientes, kiñeke tüfa fillke minerales ka azucares. Tati plasma ka niey fillke proteina kellukelu ñi katrümollfüñal, tüfa factores de coagulacion pingelu, kafey niey anticuerpos taiñ montulaetew fill kutran mu, ka fillke proteina albumina reke. Kiñe che niele kiñe kutran,  fey elungeafuy ñi llowal inyeccion dewmangelu gammaglobulina mew, tüfa niey fentren anticuerpos ka nentungey kake che ñi mollfüñ mew dew lawentuñmangelu ñi nienoal feychi kutran. Kafey tati globulos blancos mew nentungey interferones ka interleuquinas ñi lawentuñmayafiel pu che nielu infecciones virales ka cancer kutran.

Tati pu Dungukelu Iney Ngen Jewba, ¿llowafuyngün tüfachi doy pichike trokiñ nentungelu mollfüñ mu? Tati Biblia feypikelay ñi llowal kam llownoal, feymu kiduke pu kristiano müley ñi inayal tañi rakiduam ñi dullial chem chumal Chaw Ngünechen ñi adkiñ mew. Kiñeke llowkelayngün chem pichin trokiñ no rume, rakiduamkelu engün am Chaw Ngünechen ñi elufiel ti ley dungu tati pu israelche, feypi ñi “wütrülafiel mapu mew” ti mollfüñ ilongele kiñe kulliñ (Deuteronomio 12:22-24). Welu kakelu llownolu rume mollfüñ ka tañi meli trokiñ, llowkeyngün kiñe doy pichi trokiñ, rakiduamkelu engün am tüfa ñi adentuwenofiel ti mongen chew ñi nentungeel.

Petu tami dullinoal ramtuwnge: “Llownoli kiñe pichi trokiñ no rume, ¿kimnien ñi llownoafel chem lawen no rume nielu kiñe pichi trokiñ taiñ kelluaetew kiñeke kutran mu kam weda mollfüli ñi katrümollfüñal? ¿Kimün ñi kimeltuafiel kiñe lawentuchefe chumngelu ñi llowken ka llowkenon tati pichi trokiñ nentungelu mollfüñ mu?”.

 Fillke lawentun pünekefilu kidu taiñ mollfüñ. Duamfalngele ñi operangeal pu lawentuchefe fillke dungu femafuyngün ñi müte mollfünoal ti che. Kiñe hemodilucion pingey, fey tukulelngey ko kechilelu ti mollfüñ mu. Pu lawentuchefe welurulpakefingün ti mollfüñ ñi müleal kiñeke bolsa mew, fey tukulelngey ko kechilelu ñi müleal doy mollfüñ ti kuerpu mu. Feymu petu amulele ñi operangen kam dewle, fey ka wiñotukulelngey ti mollfüñ ñi kuerpu mu. Kangelu recuperacion de sangre pingey, fey petu operangele ti che, tañi allfüñ mew  entungey ti mollfüñ, fey liftungey ka wiñotukulelngey kuerpu mu. Tüfachi adümuwün kaleafuy chumngechi ñi femafel kiduke pu lawentuchefe, feymu tati pu poyekefilu ta Jewba müley ñi ramtuafiel tañi lawentuchefe chem ñi chumaetew.

Petu tami dullinoal kiñe dungu taiñ ngüneduampeel, kümeafuy tami ramtuwal: “Welurulpangele ñi mollfüñ ñi tripayal tañi kuerpu mew, kam pichiñma mu katrüngele ñi amulen, tañi rakiduam inanielu Biblia ñi ngülam ¿eluafenew tañi trokiafiel tüfachi mollfüñ mülelu reke tañi kuerpu mew, feymu duamfalngelay ñi ‘wütrülngeal mapu mew’?” (Deuteronomio 12:23, 24). “Petu operangeli, ka nentuñmangeli ñi mollfüñ ñi reyülngeal lawen engu, ka wiñotukulelngeli tañi kuerpu mu, ¿tüngküleafuy ñi rakiduam?”. “Feypifuli ‘pünengekilpe tañi mollfüñ chem lawentun no rume’, ¿küme kimnien, fey llowlayafun kakelu lawentun, tüfa ñi ngüneduamngeal ñi mollfüñ, ti hemodialisis kam tati bomba de circulacion extracorporea?”.

Kiduke pu kristiano müley ñi dullial chumngechi eluay ñi pünengeal ñi mollfüñ operangele. Ka müley ñi femal lawentuñmangele kam ngüneduamngele, fey nentuñmangefule pichin tañi mollfüñ, ka reyülngele lawen engu, fey wiñotukulelngeafuy ñi kuerpu mu.