Chaw Ngünechen Jewba a elkünufi tati wünen kurewen. Biblia feypi kidu dewmafi tati wünen domo ka “fey pengelelfi ti wentru”. Feymu Adan rume (mütre) ayüwi ka feypi: ‘¡Fey tüfa ta iñche ñi kalül (kuerpu) ka iñche ñi foro niey!’ (Génesis 2:22, 23). Jewba ayükey tati pu kurewen ñi ayüwküleal.

Epu che niewlu, rakiduamkeyngu chi kom dungu ayüwün-ngechi tripayay. Welu pu kurewen piwkeyewlu rume, rupayayngün wedake dungu mew (1 Korintio 7:28). Tüfachi papil mew peaymi kümeke ngülam, femülmi kelluaeymu tami nieal kiñe ayüwün-ngechi kurewen ka tami reñma (pu che) engün (Salmo 19:8-11).

BIBLIA TAÑI FEYPILEN: Ti wentru longkolelu ñi reñma mew (Efesio 5:23).

Eymi kurengelmi, Jewba ayüy (küpa) tami dapiafiel (inawmeneel) ka piwkeyefiel tami domo (1 Pedro 3:7). Jewba dewmafi ti domo tami kompañngeal ka tami kelluaetew, feymu kidu ayüy tami yamnieafiel ka piwkeyeafiel tami domo (Génesis 2:18). Müley tami rume piwkeyeafiel tami domo ka doyümafimi kidu ñi duam eymi mew (Efesio 5:25-29).

Eymi fütangelmi, Jewba ayüy tami rume yamnieafiel ka kelluafiel tami füta ñi wechurpual (tripawentual) ñi küdaw (1 Korintio 11:3; Efesio 5:33). Tami füta dullile (ngümintule) kiñe dungu, ayüwün mew kellufinge (Kolosense 3:18). Ka femülmi, rume falintuaeymu tami füta ka Jewba mew (1 Pedro 3:1-6).

TAMI FEMAFEL:

• Ramtufinge tami kompañ (afkadi), ¿chumafun iñche küme füta, kam küme domongeal? Ka küme allkütunge chem pin ka newentunge tami femal chem dungu mu rume

• Rume küdawngey tamu kimal welukentu ayüwküleal. Feymew ñom piwkengeaymu tamu afeluwnoal

BIBLIA TAÑI FEYPILEN: Rume falin-ngey tami ngüneduamal ñi duamnieel tami kompañ (Filipense 2:3, 4). Küme dungufinge tami kompañ, tukulpange Jewba ayüy kom ñi pu kona rumel “ñi piwkeyeafiel kom che” (2 Timotew 2:24). Küme rakiduamnge chumngechi müley tami dungual, Biblia feypiley tami weda dungun mew allfülkayafuy, welu tami küme dungun mew tremoltuafuy (mongeltuabuy) reke ta che (Proverbios 12:18). Jewba ñi lif küme püllü kelluaeymu tami dungual piwkeyen mu ka kutranduamyechen mu (Galata 5:22, 23; Kolosense 4:6).

TAMI FEMAFEL:

• Wüne llellipufinge ta Ngünechen tami nieal küme rakiduam ka tüngküleal tami nütramkayal doy falinke dungu tami kompañ engu

• Rakiduamnge tami feypial ka chumngechi tami nütramkayal

BIBLIA TAÑI FEYPILEN: Kureyewlu engu “fey mür kiñe che reke ñi feleael engu [kiñewkületuyngu]” (Matew 19:5). Kiñewkülelu rume, kiñeke mu kakerumeay tañi feypin engu. Feymew rume falin-ngey tamu kimal ñi kiñewküleal tamu rakiduam ka femal mu (Filipense 2:2). Rume falin-ngey kiñewküleal tamu dullial (ngümintual) kiñe dungu. ¿Chumngechiafuyiñ tañi küme tripayal? Tati Biblia feypi: “Ngülam mu, tati duamnieelchi dungu küme elkünungekey tañi newen tripayal” (Proverbios 20:18). Eluwkünunge Biblia ñi ngülam tami ngüyülaetew ka mür engu tamu dullial kiñeke falin-ngechi dungu (Proverbios 8:32, 33).

TAMI FEMAFEL:

• Femkünuwkilnge tami dungulafiel tami kompañ fillke dungu; nütramkafinge rüf piwke mew

• Chem dungu rume femalmi, müley tami wüne ramtuafiel tami kompañ