1 Crónicas 13:1-14
13 Ukatjja Davidajj 100 chachanakaru ukhamarak 1.000 chachanakar pʼeqtʼapkäna uka jilïrinakampiw aruskipäna, mayni pʼeqtʼirinakampis aruskiparakïnwa.+
2 Ukatsti Davidajj taqpach Israel congregacionarojj akham sänwa: “Jumanakatak walikïchi Jehová Diosatakis walikirakïchi ukhajja, taqpach Israel oraqen utjasipki uka jilanakasarusa, sacerdotenakarusa, pastonakani markanakapan jakasipki uka levitanakarus+ mä yatiyäwi apayañäni, ukhamat jupanakajj jutasin jiwasamp mayachasipjjañapataki.
3 Ukatjja Diosasan arcap+ wasitat apaniñäni” sasa. Saúl+ reyin urunakapan arca jan sum uñjapjjatapatwa jupajj ukham säna.
4 Markpachatakiw ukham lurañajj walikïnjja, ukatwa ukham lurañatakejj taqpach congregacionajj walikiw säna.
5 Ukhamatwa Davidajj Israel markpachar tantachtʼäna, Egipto markan jawirapat* Lebó-Hamat+ cheqakama,* ukhamat Quiryat-Jearim+ markat cheqpach Diosan arcap aptaniñataki.
6 Ukatjja Davidasa taqpach Israel markasa Baalá+ markaruw sarapjjäna, mä arunjja Judá tribunkiri Quiryat-Jearim markaruw sarapjjäna, ukhamat uka cheqat cheqpach Jehová Diosan arcap aptaniñataki, jupajj querubín+ angelanak patjjanwa* tronopan qontʼasi, ukanwa jupan sutipajj jachʼañchataraki.
7 Cheqpach Diosan arcap Abinadab chachan utapat aptaniñatakejj mä machaq carretaruw+ uchapjjäna, Uzá chachampi Ahió chachampiw uka machaq carreta apanipjjäna.+
8 Davidampi taqe israelitanakampejj cheqpach Dios nayraqatanwa wali kusisit fiestachas jutapjjäna, cancionanakampi, arpanakampi, cuerdanakan yaqha instrumentonakampi, panderetanakampi,+ platillonakampi,+ trompetanakampi.+
9 Kidón sat grano takiyañ cheqar puripjjäna ukhajja, toronakajj niyapuniw cheqpach Diosan arcap jaqoqtayapjjäna, ukatwa Uzá chachajj amparap loqatatasin katthapïna.
10 Uk luratapatsti Jehová Diosajj Uzá chachatak walpun colertʼasïna, ukatwa juparojj arca katthapiñatak amparap loqatatatap laykojj jiwayäna,+ jupasti Diosan nayraqatapanwa jiwäna.+
11 Jehová Diosajj Uzá chachatak wal colertʼasitap laykuw Davidajj colerasirakïna, uka cheqasti jichhürkamajj Pérez-Uzá* satawa.
12 Ukatwa Davidajj uka urun cheqpach Diosat wal ajjsarayasïna, akham sarakïnwa: “¿Kunjamarak cheqpach Diosan arcap markajar apaniriststi?”+ sasa.
13 Davidajj janiw kawkjankkäntï jupajj uka Davidan Markapa sat markar arca apankänti, jan ukasti Obed-Edom sat guitita chachan utaparuw Davidajj apayäna.
14 Cheqpach Diosan arcapajj Obed-Edom sat guitita chachan utapankirinakamp chikäskänwa, kimsa phajjsiw jupan utapankäna. Jehová Diosasti Obed-Edom utapankirinakarusa taqe kunatï jupan utjkäna ukanakarus bendisiskakïnwa.+
Notanaka
^ Jan ukajja, “Sihor jawirat”. Ukajja Nilo jawirat saraqer mä jawirawa.
^ Jan ukajja, “Hamat cheqar mantañawjkama”.
^ Ukajja, “angelanak taypinwa” sasaw jaqokipasirakispa.
^ Ukajja, “Uzá chachatakejj wal colerasïna” sañ muni.
