1 Crónicas 14:1-17
14 Tiro markankir Hiram+ sat reyejj Davidan ukaruw chachanak khitäna, cedro maderanak apayäna, albañilanaksa,* carpinteronaksa khitarakïnwa, ukhamat Davidatak mä uta* lurañataki.+
2 Davidasti Jehová Diosajj Israel markan jupar reyit sum uttʼayatap yatïnwa,+ kuna laykutejj Israel markap laykojj wali chʼamaniruw Davidan reinop* tukuyäna.+
3 Davidajj Jerusalén markan walja esposanakanëjjänwa.+ Davidan yoqanakapas phuchanakapas jukʼampëjjarakïnwa.+
4 Jerusalén+ markan nasiri wawanakapan sutinakapajj akanakawa: Samúa, Sobab, Natán,+ Salomón,+
5 Ibhar, Elisúa, Elpélet,
6 Noga, Néfeg, Jafía,
7 Elisamá, Beeliadá, Elifélet.
8 Kunapachatï filisteonakajj taqe Israel markan reyipat Davidar uttʼayapjjatap* yatipjjäna+ ukhajja, filisteonakajj taqeniw jupampi guerran nuwasiñatak makatapjjäna.+ Uk istʼasasti Davidajj jupanak contraw mistüna.
9 Ukatjja filisteonakajj Refaím+ sat vallen jakirinak contraw nuwasipjjäna.
10 Davidajj akham sasaw Diosar jisktʼasïna: “¿Filisteonak contrajj makatañajäspati? ¿Jupanakarojj amparajar katuyitätati?” sasa. Jehová Diosajj Davidar akham sarakïnwa: “Makataskakim, cheqpachansa nayaw jupanakarojj amparamar katuyäma”+ sasa.
11 Ukhamatwa Davidajj Baal-Perazim+ cheqar makatasajj filisteonakar atipjäna. Ukatsti Davidajj sänwa: “Cheqpach Diosaw enemigonakajar atipji, kunjamtï mä perqajj jalir umanakamp tukjatäki ukhamaw jupanakarojj amparajampi tukjaraki” sasa. Ukatwa jupajj uka lugararojj Baal-Perazim* suti uchäna.
12 Filisteonakasti uka cheqaruw diosanakap jaytanukupjjäna, ukatjja Davidajj siskäna ukarjamaw uka diosanakajj phichantatäjjäna.+
13 Qhepatjja filisteonakajj mayampiw mä akatjamat valler atacapjjäna.+
14 Davidajj wasitat Diosar jisktʼasïna, ukampis cheqpach Diosajj juparojj akham sänwa: “Jumajj jan cheqak makatamti. Antisas jupanakan ukarojj qhepa toqet makatam, bacá* qoqanak* nayraqatan jupanak contra makatam.+
15 Kunapachatï jumajj bacá* sat qoqanakan* puntanakapan jaqenakas marchapkaspa ukham istʼäta ukhajja, jupanak contra nuwasim, naya cheqpach Diosaw juman nayraqatam filisteonakan ejercitopar atipjañatak mistunëjja”+ sasa.
16 Davidasti kunjamtï cheqpach Diosajj siskäna ukarjamaw luräna,+ filisteonakan ejercitoparojj Gabaón markat Guézer markakamaw atipjäna.+
17 Ukatjja Davidajj taqe markanakan wali uñtʼatäjjänwa, Davidar ajjsarapjjañapatakejj Jehová Diosaw taqe markanakjjar ajjsarañ uchäna.+
Notanaka
^ Jan ukajja, “perqanak luririnaksa”.
^ Jan ukajja, “palacio”.
^ Jan ukajja, “gobiernop”.
^ Ukajja, “tukjañan dueñopa” sañ muni.
^ Jan ukajja, “arbolanak”.
^ Jan ukajja, “bekja”.
^ Jan ukajja, “bekja”.
^ Jan ukajja, “arbolanakan”.
