1 Crónicas 19:1-19
19 Qhepatjja ammonitanakan Nahás sat reyipajj jiwjjänwa, ukatwa yoqapajj jupa lanti reyëjjäna.+
2 Uk yatisasti David reyejj akham sänwa: “Kunjamtï Hanún sat reyin Nahás tatapajj nayar munasiñampi jan jaytjasiñampi+ uñjkitänjja, ukhamarakiw nayajj Hanún reyir munasiñampi jan jaytjasiñampi uñjäjja” sasa. Ukatwa Davidajj tatapan jiwatapat Hanún reyir chuymachtʼapjjañapatak chachanak khitäna. Ukampis kunapachatï Davidan servirinakapajj Hanún reyir chuymachtʼañatak ammonitanakan+ oraqepar puripjjäna ukhajja,
3 ammonitanakan principenakapajj akham sasaw Hanún sat reyir sapjjäna: “Davidajj jumar chuymachtʼirinak khitanisajj ¿tatamarus jachʼañchkaspa ukhamti amuyta? ¿Janit Davidan servirinakapajj jumar atipjañataki, marka uñjañataki ukhamarak jiwasar uñaqañatak jutapkpacha?” sasa.
4 Ukatwa Hanún sat reyejj Davidan servirinakapar katusin sunkhanakap mururäna,+ isinakapjja cinturat aynacharuw qʼal khuchoqäna. Ukatsti jupanakar khitanukjjarakïnwa.
5 Davidar uka chachanakat yatiyapjjäna ukhajja, wali phenqʼachat uñjasipjjatap laykojj jankʼakiw uka chachanakamp jikisinipjjañapatak yaqha chachanak khitäna. Reyejj akham sasaw jupanakar säna: “Jericó markan quedasipjjam,+ sunkhanakamajj wasitat jilantañapkama, ukatsti kuttʼanjjapjjätawa” sasa.
6 Tiempompisti ammonitanakajj Davidamp uñisitäjjapjjatapwa amuyasipjjäna, ukatwa Hanún sat reyimpi ammonitanakampejj Mesopotamia,* Aram-Maacá ukhamarak Zobá+ sat toqenakarojj 1.000 talento* metal qollqenakampi chachanak khitapjjäna, ukhamat carronakampi caballot sarir chachanakamp contratanipjjañapataki.
7 Ukatwa jupanakajj 32.000 carronakampi, Maacá markan reyipampiru, markankirinakampir contratapjjäna. Ukatsti jupanakajj purinisaw Medebá+ marka nayräjjan campamentop saytʼayapjjäna. Ammonitanakajj markanakapat mistunisaw guerran nuwasiñatak tantachtʼasipjjäna.
8 Davidajj uk istʼäna ukhajja, Joab+ chachampiru taqpach ejercitompiruw khitäna, guerran nuwasir wali chʼamani chachanakamp kuna.+
9 Ammonitanakajj markan punkupar mistusaw nuwasiñatak formtʼasipjjäna. Ukañkamasti jutapkäna uka reyinakajj marka jakʼankasipkänwa.
10 Joab chachajj nuwasiñatak formtʼatäpkäna ukanakaruw qhepäjj toqempit nayräjj toqempit jupa contra jutasipkatap uñjäna, ukatwa Israelan suma soldadonakap ajllisajj nuwasiñatak formtʼasiyäna, ukhamat sirionakamp nuwasiñataki.+
11 Jupasti mayni soldadonakar pʼeqtʼañapatakejj Abisái+ jilaparuw jaytäna, juparakiw ammonitanakamp nuwasiñatakejj uka soldadonakar formtʼasiyañapäna.
12 Ukatsti Joab chachajj akham sänwa: “Sirionakatejj+ nayar atipjirjamäpjjani ukhajja, nayar yanaptʼiriw jutañama. Ammonitanakatejj jumar atipjirjamäpjjani ukhajja, nayaw jumar yanaptʼäma.
13 Markas laykusa Diosan markanakap laykusa chʼamani saytʼasiñasawa, janiw ajjsarayasiñasäkiti.+ Jehová Diosaw kunatï jupatak walïki uk luraskani” sasa.
14 Ukatjja Joab chachasa soldadonakapasa sirionakamp nuwasiñatakiw sarantapjjäna, ukampis sirionakajj jupa nayraqatat escapjjapjjänwa.+
15 Ammonitanakajj sirionakan escapjjapjjatap yatipjjäna ukhajja, jupanakajj ukhamarakiw Abisái jilapat escapjjasajj markar mantjjapjjäna. Uka pasatatsti Joab chachajj Jerusalén markaruw kuttʼanjjäna.
16 Sirionakajj israelitanakamp atipjat uñjasisajja, Éufrates jawira toqenkir sirionakar tantachtʼañatakiw chachanak khitapjjäna,+ jupanakarojj Hadadézer reyin ejercitop pʼeqtʼiri Sofac* sat chachaw pʼeqtʼäna.+
17 Davidar uk yatiyapjjäna ukhajja, jankʼakiw jupajj Israelan taqpach ejercitop tantachtʼäna, Jordán jawir paskatasasti jupanakan ukaruw purïna, ukatsti nuwasiñatakiw formtʼasïna. Davidajj sirionak contra nuwasiñatakiw saräna, jupanakajj David contraw nuwasipjjarakïna.+
18 Ukampis sirionakajj Israelat escapjjapjjänwa. Davidajj 7.000 carro apirinakaru, kayuk* sariri 40.000 sirio soldadonakaruw jiwarayäna, sirionakan ejercitop pʼeqtʼkäna uka Sofac chacharus jiwayarakïnwa.
19 Kunapachatï Hadadézer reyin servirinakapajj Israelamp atipjat uñjasipjjäna+ ukhajja, jankʼakiw Davidamp sumar mantapjjäna, juparuw katuyasjjapjjarakïna.+ Siria markajj janiw ammonitanakar jukʼamp yanapañ munjjänti.
Notanaka
^ Hebreo arunjja, “Aram-Naharaim”.
^ Apéndice B14 uñjjattʼäta.
^ 2 Samuel 10:16 textonjja, Sobac sutiw uñsti.
^ Variante: “kayut”.
