Isaías 40:1-31
40 “Chuymachapjjam, markajar chuymachapjjam” siw jumanakan Diosamajja.+
2 “Jerusalén markan chuymapar parlapjjam,*obligat lurañanakapajj tukuyjjewa sasin yatiyapjjam,juchapajj pagatäjjewa sasin yatiyapjjam.+
Jehová Diosan amparapatjja taqe juchanakapatwa phoqatpach castigo katoqjje”.+
3 Mayniw wasaran akham sasin arnaqasiski:
“¡Jehová Diosan thakip wakichapjjam!+
Diosasatakejj mä cheqa thaki+ wasaran lurapjjam.+
4 Taqe vallenakas laqʼamp phoqantatäpjjpan,taqe qollunakasa jiskʼa qollunakas pampachatäpjjpan.
Jan sarnaqañjam oraqejj planochtʼatäpan,jan sarnaqañjam oraqejj pampa lugarar tukuyatäpan.+
5 Jehová Diosajj kunja kʼajkirisa ukajj qhanstayatäniwa,+taqeniw uk uñjapjjani,+kuna laykutejj Jehová Diosan lakapaw ukham arsu” sasa.
6 ¡Istʼam! Mayniw akham arnaqasiski: “¡Yatiyam!” sasa.
Yaqhasti akham sasaw jisktʼaraki: “¿Kunsa yatiyäjja?” sasa.
“Taqe jaqenakajj chʼojjña pastonakäpjjewa,taqpach munasiñapasa jan jaytjasiñapas camponkir panqarar uñtasitawa.+
7 Chʼojjña pastojj wañsjjakiwa,panqaras wañsjjakirakiwa,+kuna laykutejj Jehová Diosan samanapaw* ukanakar phustʼi.+
Cheqas jaqenakajj chʼojjña pastokïpjjewa.
8 Chʼojjña pastojj wañsjjakiwa,panqaras wañsjjakirakiwa,ukampis Diosasan arupajj wiñayatakiwa”+ sasa.
9 Mä jachʼa qollur makatam,Sionatak suma yatiyäwinak apanir warmi.+
Wali jachʼat arnaqasim,Jerusalenatak suma yatiyäwinak apanir warmi.
Wali jachʼat arnaqasim, jan ajjsaramti.
Judá oraqenkir markanakarojj akham sasin yatiyam: “Jumanakan Diosamajj akäskiwa”+ sasa.
10 Taqe Kunjjar Munañani Jehová Dios Tatitojja wali chʼamampiw jutani,amparapampiw jupajj apnaqani.+
Jupajj churki uka pagojj jupamp chikawa,jupajj pagki uka pagojj jupa nayraqatankiwa.+
11 Jupajj mä awatirjamaw uywanakap sum uñjani.*+
Amparapampiw corderonakarojj juntthapini,ichjjartʼasaw* aparakini.
Ñuñuyaskir ovejanakarojj wali cuidadompiw irparakini.+
12 ¿Khitirak ampar qotaparojj umanak midtʼaspasti?+
¿Khitirak alajjpachanak amparamp chhiytʼas* midtʼaspasti?
¿Khitirak oraqen laqʼa polvop mä mediñ fuenter midtʼaspasti?+
Jan ukajj ¿khitirak qollunak mä balanzar pestʼaspasti,jiskʼa qollunaksa mä balanzar pestʼaspasti?
13 ¿Khitirak Jehová Diosan espiritup midtʼaspasti?*
Jan ukajj ¿khitirak ewjjtʼiripäkaspas ukham jupar yatichaspasti?+
14 ¿Khitirurak jupajj kun entiendiñatakejj jisktʼasisti?
Jan ukajj ¿khitirak juparojj cheqap thakit yatichaspasti?
Jan ukajj ¿khitirak juparojj uñtʼañ toqet yatichaspasti?
Jan ukajj ¿khitirak juparojj cheqpach entiendiñan thakip uñachtʼayaspasti?+
15 Markanakajj baldenkir mä uma chʼaqar uñtasitäpjjewa,balanzankir mä jukʼa laqʼa polvor uñtasitäpjjewa.+
Islanakarojj laqʼa polvorjamaw jupajj apti.
16 Líbano qollunakan taqpach qoqanakapajj* janiw nina aqaskakiñapatakejj alcanzkaspati,salvaje animalanakapas janiw nakhantayat mä ofrendatakejj alcanzkaspati.
17 Jupa nayraqatanjja taqpach markanakajj janis utjkaspa ukhamawa,+jupatakejj janiw kunäpkisa, janirakiw kuna valoranïpkisa.+
18 ¿Khitimpirak jumanakajj Diosar igualayapjjasmasti?+
¿Kunar uñtasitaw jupajj sapjjasmasa?+
19 Mä artesanojj mä ídolo luri,metalamp trabajiristi qorimpiw uka idolorojj forraraki,+qollqe metalatwa cadenanak luraraki.
20 Jupajj mä qoqa* ofrendjam ajllisi,+jan ñusantir mä qoqa ajllisi.
Jupajj wali yatjjattʼat mä artesano thaqe,ukhamat jan jalaqtir mä ídolo lurañataki.+
21 ¿Janit jumanakajj yatipkta?
¿Janit jumanakajj istʼapkta?
¿Janit jumanakar qalltatpach uk yatiyapktamjja?
¿Aka oraqen cimientonakapajj uchaski ukhatpach janipunit amuyapkta?+
22 Moroqʼo oraqet jukʼamp alto lugaranjja mayniw jakaski,+oraqen jakirinakajj tʼiju tʼijunakjamäpjjewa.
Alajjpachanakjja mä suma gasa telarjamaw jupajj janatati,jakañatak mä carpan telaparjamaw jupajj janatati.+
23 Jupajj gobiernonakarojj janis kunäpkaspa ukhamwa tukuyi,oraqen juezanakaparojj* janis kuna valoranïpkaspa ukhamwa tukuyi.
24 Jupanakajja jichhak ayrut* plantanakjamäpjjewa,kunapachatï ayruntatäjjapjje,tallonakapas oraqer saphintasipkaraki ukhajja,ukspachaw mä phustʼatampik wañsjjapjje,thayasti pajarjamaw apasjjaraki.+
25 Santo Diosajj akham siwa: “¿Khitimpis jumanakajj igualayapjjetasma? ¿Khitis nayjamäspa?” sasa.
26 “Alajjpach uñtapjjam, uñjapjjarakim.
¿Khitis taqpach warawaranak luri?+
Khititï warawaranakar mä ejercitorjam mayat mayat jaktʼas mistuyki ukawa,jupajj taqeniruw sutitkam jawsi.+
Wali chʼamanïtapatsa musparkañ chʼamanïtapatsa,+janiw ukanakat maynis faltkiti.
27 Jacob, ¿kunatsa akham sista, Israel, kunatsa akham sista:
‘Jehová Diosatakejj thakijajj imantatawa,ina chʼusat tʼaqesitajarojj janiw Diosajj yäqkiti’ sasajja?+
28 ¿Janit jumajj yatkta? ¿Janit jumajj istʼkta?
Mä thiyat mä thiyakam* oraqe Lurir Jehová Diosajja wiñayans wiñayapatak Diosawa.+
Jupajj janipuniw qarjtkiti, ni thayjtkisa.+
Jupan yatiñapajj* jan yatjjatkayawa.*+
29 Jupajj qaritäki ukarojj chʼam churi,jan chʼamanïpki ukanakarojj chʼamampiw phoqtʼayi.+
30 Waynitunakajj qaripjjewa, thayjtapjjarakiwa,waynanakajj lanktʼasipjjewa, tinkupjjarakiwa,
31 ukampis khitinakatï Jehová Diosar suytʼasipki ukanakajj mayampiw chʼam katjjatapjjani.
Pakanakjam chheqanïpkaspas ukhamwa jupanakajj wali alto jalapjjani.+
Tʼijupjjaniwa, ukampis janiw thayjtapkaniti,sarnaqapjjaniwa, ukampis janiw qarjtapkaniti”.+
Notanaka
^ Jan ukajja, “chuymachtʼkir arunakamp parlapjjam”.
^ Jan ukajja, “espiritupaw”.
^ Jan ukajja, “awatini”.
^ Hebreo arunjja, “pechoparuw”.
^ Ukajja, ampar sum jistʼatatasin tayka lukʼan puntat jiskʼa lukʼan puntakamäki ukatwa parlaski. Apéndice B14 uñjjattʼäta.
^ Ukajja, “espiritupat amuytʼisti” sasaw jaqokipasirakispa.
^ Jan ukajja, “arbolanakapajj”.
^ Jan ukajja, “árbol”.
^ Jan ukajja, “gobiernonakaparojj”.
^ Variante: “mallkit”.
^ Variante: “Mä qawayat mä qawaykam”.
^ Jan ukajja, “amuytʼatapajj”.
^ Jan ukajja, “jan entiendkayawa”.
