Nehemías 2:1-20
2 Artajerjes+ reyejj 20 maranak+ apnaqaskäna uka nisán* phajjsinjja, reyejj vino umtʼañ munäna, nayasti kunjamtï lurirïkayäta ukarjamaw vino katusajj jupar churta.+ Ukampis nayajj janipuniw reyi nayraqatan llakit uñjasirïkti.
2 Ukatwa reyejj nayar akham situ: “¿Kunatsa wali llakitäta? Jumajj janiw usutäktati, llakinakaw chuymaman utjpacha” sasa. Uk istʼasajj nayajj walpun sustjasta.
3 Ukatsti nayajj akham sasaw reyir sista: “¡Reyejj walja maranak jakpan! Nayra awkinakajajj imtʼatäki uka markajj laqayar tukuyatawa, punkunakapsa phichantapjjarakiwa, ukhamajj ¿kunjamarak nayajj jan llakitäkiriststi?”+ sasa.
4 Reyisti akham sarakituwa: “¿Kunsa jumajj lurañ munta?” sasa. Ukaratpachaw nayajj alajjpachankir Diosar orasta.+
5 Nayasti akham sasaw reyir sarakta: “Juma reyitakitï walikïchi, naya servirimajj sumat uñjatarakïsta ukhajja, kawkjantï nayra awkinakajajj imtʼatäki uka Judá markaruy khitita, ukhamat uka mark mayamp saytʼayañajataki”+ sasa.
6 Ukatjja reyejj akham sarakituwa: “¿Qhawqha tiempos viajïta? ¿Kunawrasas kuttʼanjjarakïta?” sasa. Reinasti reyi ladon qontʼatäskarakïnwa. Ukhamasti reyitakejj nayar khitañajj walikïnwa,+ ukatsti qhawqha tiempots kuttʼañajäna ukwa reyirojj yatiyarakta.+
7 Ukatsti reyirojj akham saraktwa: “Juma reyitakitï walikïchejja, Éufrates+ jawirat inti jalanta toqen* jakirinakan gobernadoranakapatak qellqat cartanakay churapjjetpan, ukhamat Judá markar puriñkamajj nayar jan jarkʼasin pasayapjjañapataki.
8 Reyin Bosquep* uñjki uka Asaf chachatak mä carta churapjjarakitpan, ukhamat jupajj templo* jakʼankki uka Soldadonakatak Jachʼa Utan punkunakapatakisa,+ markan murallanakapatakisa,+ kawkjantï nayajj jakkä uka utatakis maderanak nayar churañapataki” sasa. Reyisti nayarojj cartanak churitäna,+ kuna laykutejj Diosajaw nayar yanaptʼaskitäna.*+
9 Tiempompisti nayajj Éufrates jawirat inti jalanta toqen jakirinakan gobernadoranakapan ukaruw purta, ukatjja reyin cartanakap churarakta. Ukhamarus reyejj ejército pʼeqtʼirinakampi caballot sarir chachanakampwa nayamp chik khitäna.
10 Ukampis kunapachatï Sanbalat+ sat horonita chachasa Tobías+ sat ammonita+ servirisa, Israel markar yanaptʼañatak maynin purinitap yatipjjäna ukhajja, jupanakajj walpun colertʼasipjjäna.
11 Ukatjja Jerusalenaruw purta, kimsa urunak qhepatjja,
12 arumarusti nayampi mä qhawqha chachanakampiw sartapjjta, kuntï Diosajajj Jerusalén markatak nayan chuymajar uchkäna uks janirakiw khitirus yatiykayätti. Nayajj janiw yaqha animalanak apkayätti, qonjjatatäkayäta uka asnokiw ukankäna.
13 Ukatsti arum mistusajj Valle Punku+ pasta, Jachʼa Asirun* Uma Jalsu jakʼap pasarakta, ukatjja Qhella Montonanakan Punkuparuw+ purirakta. Jerusalén markan qʼala allthapit murallanakaps qʼala phichantat punkunakaps uñakiparaktwa.+
14 Ukatjja Uma Jalsu Punku+ toqeruw sarta, Reyin Estanquepar puriñkama, ukampis latʼjjatatäkayäta uka asnojj janiw uka cheq pasañ puedkänti.
15 Ukhampachas arumajj valle+ toqe makataskakiyätwa murallanaks uñakipaskakiyätwa. Ukatsti kutjtaniraktwa, Valle Punku mantasaw kuttʼanjjarakta.
16 Sullka apnaqerinakajj+ janiw kawkirutï nayajj sarkayäta uksa ni kuntï lurkayäta uksa yatipkänti. Judionakarusa, sacerdotenakarusa, pʼeqtʼirinakarusa, sullka apnaqerinakarusa, mayni trabajirinakarus janïraw kuns yatiykayätti.
17 Ukatjja jupanakarojj akham saraktwa: “Jumanakajj kuna jan waltʼäwinakansa uñjastan uksti uñjasipktawa, Jerusalén markajj laqayar tukuyatawa punkunakapas phichantatarakiwa. Jichhajj Jerusalén markan murallanakap mayamp saytʼayapjjañäni, ukhamatwa jan jiskʼachatäjjañäniti” sasa.
18 Jupanakarojj kunjamsa Diosajajj nayar yanaptʼaskitäna* uk qhanañchta,+ reyejj kuntï siskitäna uksa yatiyaraktwa.+ Uk istʼasasti jupanakajj akham sapjjarakïnwa: “¡Ukhamajj trabajiñ qalltañäni!” sasa. Ukhamatwa jupanakajj trabajiñatakejj maynit maynikam chʼamañchtʼasipjjäna.*+
19 Kunapachatï Sanbalat sat horonita chachasa, Tobías+ sat ammonita+ servirisa, Guésem sat árabe+ chachasa uk istʼapjjäna ukhajja, nanakat burlasiñ+ qalltapjjäna, nanakar jiskʼachasajj akham sapjjarakitänwa: “¿Kunsa jumanakajj lurasipkta? ¿Reyi contrat jumanakajj saytʼasisipkta?”+ sasa.
20 Ukampis nayajj akham sasaw jupanakar sarakta: “Alajjpachankir Diosaw taqe kunan sumar sarañapatak yanaptʼapjjetani.+ Nanak servirinakapaw murallanak mayamp saytʼayapjjäjja. Ukampirus jumanakajj janiw akan kuna lurañanïpktasa, ni derechonïpktasa, janirakiw jumanakajj kunsa lurapktati ukhamat Jerusalén markan amtatäpjjañamataki”+ sasa.
Notanaka
^ Apéndice B15 uñjjattʼäta.
^ Jan ukajja, “Jawirat jukʼamp khurinkki uka toqen”.
^ Hebreo arunjja, “Diosajan suma amparapaw nayjjankaskäna”.
^ Hebreo arunjja, “uta”.
^ Jan ukajja, “Reyin Montep”. Hebreo arunjja, “Reyin Parquep”.
^ Jan ukajja, “Katarin”.
^ Hebreo arunjja, “amparanakap chʼamañchtʼasipjjäna”.
^ Hebreo arunjja, “Diosajan suma amparapajj nayjjankaskäna”.
