Zacarías 7:1-14
7 Darío reyejj pusi maranak apnaqaskäna, llätunkïr phajjsit pusi urunak saraqjjäna, mä arunjja kislev* phajjsinjja, Zacarías+ profetajj Jehová Diosan arunakapwa katoqäna.
2 Betelan jakir jaqenakajja Sarézer ukhamarak Réguem-Mélec chachanakaruw jaqenakapamp chika khitapjjäna, ukhamat Jehová Diosamp suma uñjatäñatak ruwtʼanipjjañapataki,
3 ukhamarak ejercitonakan Jehová Diosapan utapankir sacerdotenakampiru profetanakampir akham sapjjañapataki: “¿Nayajj jachañajäspati, janit phesqër phajjsinjja+ manqʼañajäkaspa, kunjamtï nayajj walja maranak lurawaykta ukhama?” sasa.
4 Ukatjja wasitampiw nayajj ejercitonakan Jehová Diosapan arunakap katoqayäta, jupajj akham sitänwa:
5 “Oraqenkir taqe jaqenakarusa sacerdotenakarusa akham sañamawa: ‘Kunapachatï jumanakajj 70 maranak+ phesqër phajjsinsa paqallqöri phajjsinsa+ ayunapkayäta, wararipjjarakiyäta ukhajja, ¿cheqapunit nayatak ayunapjjayäta?
6 Kunapachatï jumanakajj manqʼapkayäta, vino umapjjarakiyäta ukhajja, ¿janit jumanak pachpatak manqʼapkayäta umapkarakiyäta?
7 Kunapachatï Jerusalén markasa uka jakʼankir markanakasa jaqenïsipkäna, sumankañas utjkarakïna, Négueb ukhamarak Sefelá lugaranakas jaqenïsipkäna ukhajja, ¿kuntï Jehová Diosajj nayra profetanak+ taypejj arskäna uka arunak janit istʼapjjañamäkänjja?’ sasa”.
8 Zacarías profetajj mayampiw Jehová Diosan aka arunakap katoqäna:
9 “Ejercitonakan Jehová Diosapajj akham siwa: ‘Cheqapar juzgapjjam,+ maynit maynikam munasipjjam,*+ khuyaptʼayasipjjarakim.
10 Janirak viudarusa, jan awkin wajcha wawarusa,*+ ni extranjero+ jaqerusa, ni pobre+ jaqerus engañjapjjamti, janirak chuymanakamanjja jumanakkam jan walinak lurasiñ amtapjjamti’+ sasa.
11 Ukampis jupanakajj janiw istʼañ munapkänti,+ jan kasusir jaqenakäpjjänwa,+ jan istʼañatakejj jiñchunakapsa taptʼasipjjänwa.+
12 Chuymanakapjja diamanter* uñtat wali qholuruw* tukuyapjjäna,+ Jehová Diosajj espiritup taypi nayra profetanak toqnam apayankäna uka leysa,* uka arunaksa janiw istʼapkänti.+ Ukatwa ejercitonakan Jehová Diosapajj wal colerasïna”+ sasa.
13 “Ejercitonakan Jehová Diosapajj akham siwa: ‘Nayajj jupanakar jawskayäta ukhajja, janiw istʼapkänti,+ yanap mayipjjetäna ukhajja, janirakiw nayajj istʼkayätti.+
14 Jupanakarojja mä jachʼa thayampiw nayajj aywitatayayäta, jan uñtʼapkäna taqe uka markanakaruw jupanakar aywitatayayäta,+ jaytawayapkäna uka oraqejja qʼala tukjatänwa, janiw khitis uka oraqnamajj sarjjänti ni kuttʼanjjänsa,+ kuna laykutejj uka suma oraqerojj ajjsarkañ oraqeruw jupanakajj tukuyjjapjjäna’ sasa”.
Notanaka
^ Apéndice B15 uñjjattʼäta.
^ Jan ukajja, “munasipjjam janirak jaytjasipjjamti”.
^ Jan ukajja, “wajcharusa (iñurusa)”.
^ Ukajja, “qholu (qhoru) qalar” sasaw jaqokipasirakispa.
^ Variante: “qhoruruw”.
^ Jan ukajja, “yatichäwsa”.
