Hebreos 6:1-20
-
Jilïr jaqer tukuñatakejj chʼamachasiskakiñäni (1-3)
-
Cheqa yatichäwinak maysar apanukurinakajj mayampwa Diosan Yoqaparojj lawar chʼakkatapjje (4-8)
-
Suyasipkta ukjja tukuykam jan payachasis suyasipkakim (9-12)
-
Diosajj promesap phoqapuniniwa (13-20)
-
Diosan promesapasa juramentopasa janipuniw mayjtʼkaspati (17, 18)
-
6 Niyakejjay Cristjjat qallta yatichäwinak+ yatjjatañ tukuyjjstanjja, jilïr jaqer tukuñkamajj chʼamachasiskakiñäni,+ qallta yatichäwinakjja janiw kutin kutin yatjjatasipkakiñamajj wakiskiti, ukanakasti akanakawa: inamay* luräwinakat arrepentisiña, Diosar confiyaña,*
2 bautismonakat yatichäwinaka, amparampi loqjjataña,+ jiwatat jaktaña,+ wiñay juchañchäwi.
3 Diosatï munanejja jilïr jaqerojj tukuñäniwa.
4 Yaqhepanakajj cheqa yatichäwinak maysaruw apanukupjje,+ janirakiw jupanakan arrepentisipjjañapatakejj khitis yanaptʼirjamäkiti. Jupanakajj Diosan qhanapsa, gratisak churat regalopsa,* espíritu santsa katoqapjjewa.+
5 Jupanakajj Diosan suma arunakapsa katoqapjjarakiwa, jutir pachan* utjkani uka bendicionanaksa* uñjapjjarakiwa,
6 ukampis janiw jupanakarojj kunjamatsa yanaptʼañjamäkiti. Jupanakajj mayampiw Diosan Yoqaparojj lawar chʼakkatapjje,* jaqenakampiw phenqʼachayapjjaraki.+
7 Jallojj sapa kuti purjjatki ukhajja, uka jallojj oraqetakejj Diosan mä bendicionapawa, jallojj oraqer chʼachʼantki ukhajja, yapuchirinakatakejj wali suma cosechaw utji.
8 Ukampis oraqejj chʼapinak jilayki ukhajja, uka oraqejj apanukutäjjewa, niyarakiw maldisitäni, phichantatäjjarakiniwa.
9 Munat jilatanaka, nanakajj ukhamsa parlasipkstjja, khitinakatejj saranukupki ukanakat sipansa jumanakajj jukʼampi sumankapjjtawa, kunanakatï salvapkiristam ukanaksa lurasipkaraktawa, janiw nanakajj ukat payachasipkti.
10 Diosajj cheqapar uñjir Diosawa, jupajj janiw luratanakamatsa ni sutipar munasipjjatamatsa armaskiti,+ ukanakjja santo jilatanakar jichhakam servisaw uñachtʼayapjjtajja.
11 Qalltanjja jumanakajj wali qʼaphäpjjayätawa, sapa maynis ukham wali qʼaphäsipkakisma ukwa nanakajj munapjjta, ukhamat kuntï jumanakajj suyasipkta ukjja+ tukuykam jan payachasis suyasipkakiñamataki,+
12 janirak jayräpjjañamataki.+ Antisas khitinakatejj Diosar confiyapjjatap* laykusa paciencianïpjjatap laykusa Diosan promesap herenciar uñtat katoqapki ukanakat yateqasipjjam.
13 Diosajj Abrahanar mä promesa lurkäna ukhajja, janiw jupat sipansa jukʼampi jilïrin sutipjjarojj juramento lurkaspänti, ukatwa pachpa sutipjjarojj juramento luräna,+
14 akham sasa: “Cheqpachapuniw bendisïma, cheqpachapuniw waljaptayäma”+ sasa.
15 Abrahanajj paciencianïtap uñachtʼaykäna uka qhepatwa uka promesa katoqäna.
16 Jaqenakajja jupanakat sipansa jukʼamp jilïr jaqen sutipjjaruw juramento lurapjje. Juramento lurapjjatapajja jan kuna chʼajjwaña utjañapatakiw yanaptʼi, ukham juramento lurañajja jupanakatakejj mä garantiawa.+
17 Kunapachatï Diosajj promesap+ katoqerinakaru amtapajj* jan mayjtʼirïtap jukʼamp sum qhanañchañ amtkäna ukhajja, ukhamarakiw jupajj mä juramento lurasajj mä garantía jaytäna.
18 Diosan promesapasa juramentopasa janipuniw mayjtʼkaspati, janirakiw Diosajj kʼariskaspati.+ Taqe ukanakaw Diosar imantasktan ukanakarojj wal chʼamañchtʼistu, ukhamat kunanaktï suytʼasktan ukanakat wal katjjarusiñasataki.
19 Kuntï suytʼasktan ukajja,+ kunjamtï mä anclajj barcor katjjäskejja, ukhamarakiw jakäwisar katjjasi. Ukajj phoqasipuniniwa, suma uttʼayatarakiwa, ukarakiw templo jaljtayki uka cortina manqharojj irpantistu.+
20 Jesusaw ukarojj jiwasanak nayra mantasajj mä thaki jiwasatak jistʼaräna,+ wakicharakïna. Juparakiw Melquisedecjam wiñay jachʼa jilïr sacerdoter tuküna.+
Notanaka
^ Griego arunjja, “jiwata”.
^ Jan ukajja, “fe; iyawsäwi”.
^ Griego arunjja, “alajjpachankir gratisak churat regalsa”.
^ Griego arunjja, “chʼamanaksa”.
^ Variante: “kʼutkatapjje”.
^ Jan ukajja, “fe; iyawsäwi”.
^ Jan ukajja, “ewjjtʼapajj”.
