Job 11:1-20
11 Zofar+ sat naamatita chachajj akham sasaw sarakïna:
2 “¿Taqe uka arunakamajj janit jaysatäkani?
Jan ukajj ¿wal parlasach jumajj razonanïyäta?*
3 ¿Juman chʼusa arunakamampit jaqenakar amuktʼayäta?
¿Janit khitis jumarojj sawkasitanakamat toqenoqkätam?+
4 Jumajj akham sistawa: ‘Yatichäwinakajajj qʼomawa,+Diosajj qʼoma jaqetwa nayar uñjitu’+ sasa.
5 ¡Ukampis Diosajj parlakispa,jumatakejj lakap jistʼarakispa!+
6 Jupasti kunanakatï yatiñanïñat imantatäki ukanakwa qhanañchiristam,yatiñanïñajj kunayman toqetwa uñjasispa.
Ukhamatwa Diosajj juman yaqhep pantjasitanakam armasjjatap amuyasma.
7 ¿Diosan yatiñapat jumajj yatjjatasmati?
¿Taqe Chʼamani Diosat taqe kunti yatjjatasma?*
8 Yatiñanïñajj alajjpachat sipans jukʼamp altonkiwa. ¿Kunsa jumajj yatisma?
Yatiñanïñajj Sepulturat* sipans jukʼamp manqhankiwa. ¿Kunsa jumajj yatisma?
9 Yatiñanïñajj oraqet sipans jukʼamp jachʼawa,lamar qotat sipans jukʼamp anchorakiwa.
10 Diosatï pasakipasin maynir katuntaspa, ukatsti mä juicior aparakispa,¿khitirak jupar jarkʼaspasti?
11 Diosajj kunapachas jaqenakajj engañasipki uk yatiwa.
Kunapachatï jupajj kuna jan walsa uñji ukhajja, ¿janit jankʼak kuns lurkani?
12 Kunapachatï mä salvaje asnojj mä jaqe wawachasispa,*ukhakiw mä jan amuytʼasir jaqejj amuytʼasispa.
13 ¡Jumatï chuymam wakichtʼasma,Diosarus oración lurarakisma!*
14 Juman amparamatï jan wal luraskchi ukhajja, jumat jayarstʼayam,janirak carpanakamans kunatï jan cheqapäki ukanak utjayamti.
15 Ukapachaw jumajj jan phenqʼasis pʼeqem waytasma,jan kun ajjsarasaw sum saytʼasirakisma.
16 Ukapachaw juman llakimat armasjjäta,kunjamtï aynachar sarir umajj pasawayjje ukhamwa llakimat armasjjäta.
17 Juman vidamajj chika urut sipansa jukʼamp qhanäniwa,chʼamakapas alwa qhanar uñtatäniwa.
18 Suytʼäwi utjatap laykojj janiw kunats llakisjjätati,taqe toqer uñatatasisajj jan kun ajjsarasaw ikintjjarakïta.
19 Jan khitin ajjsarayataw jumajj ikintjjäta,waljanirakiw jumamp khuyaptʼayatäñ thaqapjjani.
20 Ukampis jan wali jaqenakan nayranakapajj juyktʼaniwa,janiw kawkir escapañs puedipkaniti,jupanakajj jiwañak suyjjapjjani”.+
Notanaka
^ Jan ukajja, “¿mä jachʼañchasir jaqejj razonanïspati?”.
^ Jan ukajja, “¿Taqe Chʼamani Diosajj kawkikam jachʼasa uk yatjjatasmati?”.
^ Jan ukajja, “Kunapachatï mä salvaje asnojj jaqjam nasispa”.
^ Hebreo arunjja, “amparanakams jupar loqtarakisma”.
