Job 14:1-22
-
Job chachajj arsuskakiwa (1-22)
14 ”Warmit nasiri jaqejja,jukʼa tiempokiw jaki,+ vidapajj jan waltʼäwinakamp phoqantatarakiwa.*+
2 Jupajj mä panqarar uñtataw jilsu, ukatsti wañsjjarakiwa.*+
Jupajj mä chʼiwir uñtataw pasakiptasin chhaqtjjaraki.+
3 Ukhampachas jumajj juparuw uñtantajja,ukatsti mä juicioruw jupar aparaktajja.*+
4 ¿Khitirak jan qʼomäki ukat kunatï qʼomäki uk utjayaspasti?+
¡Janiw khitis puedkaspati!
5 Jaqen urunakapatï amtatäjjchejja,phajjsinakapajj juman amparamankarakispawa.
Jumasti kawkikamas jupajj purini uk amtjjtawa, ukhamat jupajj jan jukʼamp khurir pasañapataki.+
6 Juparojj jan jukʼamp uñtjjamti, ukhamat samartʼañapataki,pago katoqeri mä trabajadorar uñtata jurnäl trabajop sumak tuktʼayjjani ukhakama.+
7 Mä qoqatakis* suytʼañajj utjarakiwa.
Khuchoqatäkani ukhas wasitat jilsunini,jiskʼa ramanakapas jilaskakiniwa.
8 Saphinakapatï oraqen achachiptjjaspa,khuchoqat qoqan* jiltʼir jiskʼa troncopas oraqen wañsjjarakispa ukhajja,
9 mä jukʼa uma muktʼasakiw jilsuni,mä machaq alir uñtataw ramanakapas wal jilantarakini.
10 Ukampis jaqejj jiwjjasajj jan chʼamanikiw jaqosjje.
Kunapachatï mä jaqejj jiwjje ukhajj ¿kawkirus jupajj sarjje?+
11 Umanakajj lamar qotat chhaqtjjewa,mä jawiran umanakapas chʼumantjjasajj wañsjjarakiwa.
12 Mä jaqejj ukhamarakiw iktʼasajj jan mayamp sartjjeti.+
Alajjpachajj utjkani ukhakamajj janiw jupajj sartkaniti,janirakiw khitis juparojj ikit sartaykaniti.+
13 ¡Mirä amp suma, Sepulturaruy* imantjjeta!+
¡Juman colerasiñamajj pasjjani ukhakamay imantjjeta!
¡Nayarojj mä tiempoy churita, ukatsti nayat amtasirakita!+
14 Mä jaqetï jiwaspajja, ¿mayamp jakaspati?+
Kunapachkamatï nayajj esclavökä ukhakamaw suyäjja,*nayar salvapkitani ukhakama.+
15 Jumajj jawsitätawa, nayasti jaysarakïmawa,+jumajj pachpa amparanakamampiw luristajja, ukatwa wal uñjañ munitäta.
16 Ukampis jichhajj taqe kuntï nayajj luraskta ukakwa uñchʼuktajja,jucha luratajak uñchʼukisktajja.
17 Jan wal luratajajj mä bolsar wali suma chinuntatawa,nayan pantjasitanakajsti mä colamp lipʼthapiyasaw imaraktajja.
18 Kunjamtï mä qollojj allitattasajj qʼal tukuski,mä qarqajj* lugarapat jaqoqtjjaraki,
19 kunjamtï umanakajj qalanakar merqʼeptayki,wali chʼamampi jalir umanakapas oraqen laqʼanakap apasjjaraki,uka pachparakwa jumajj jiwir jaqen suytʼañap tukjaraktajja.
20 Juparojj jiwañapkamaw apnaqtajja,+jupan uñnaqapsa cambiaraktawa, sepulturkamaw khitjjaraktajja.
21 Yoqanakapajj jachʼañchatäpjjewa, ukampis jupajj janiw uk yatkiti.
Jupanakajj jiskʼachatäpjjewa, ukampis jupajj janiw uk amuykiti.+
22 Jupajj jakaski ukhakiw tʼaqesi,jupajj jakaski ukhakiw jacharaki”.
Notanaka
^ Jan ukajja, “llakinakamp phoqantatarakiwa”.
^ Ukajja, “khuchoqatäjjarakiwa” sasaw jaqokipasirakispa.
^ Hebreo arunjja, “nayar apanistajja”.
^ Jan ukajja, “Mä arbolatakis”.
^ Jan ukajja, “arbolan”.
^ Ukajja, sepulturan suyañat parlaski.
^ Variante: “jaqhejj”.
