Job 21:1-34
21 Job chachajj akham sarakïnwa:
2 “Kuntï sapksma uk wali amuyump istʼapjjam,ukampiw nayar chuymachtʼapjjetäta.
3 Nayan parlañajkamajj wali pacienciamp istʼapjjeta.
Parlañ tukuyjjä ukhaw jumanakajj nayat sawkasipjjetäta.+
4 ¿Mä jaqe contrat nayajj quejastjja?
Ukhamäspa ukhajj ¿kunatsa nayajj paciencianïñajäspa?
5 Uñtanipjjeta, ukatsti wali musparat uñchʼukisipkakita.
Lakanakamsti amparamp lluptʼasipjjam.
6 Kunapachatï nayajj ukanakat amuytʼasta ukhajja, nayajj wal mayjtʼasta,taqpach cuerpojaw khatatiraki.
7 ¿Kunatsa jan wali jaqenakajj jakasipkaki?+
¿Kunatsa jupanakajj jilïr jaqëñar puripjje, qamiriptapjjaraki?*+
8 Wawanakapajj jupanakan nayraqatapankapjjapuniwa,wawanakapat jutir wawanakapar uñjañkamaw jakapjjaraki.
9 Utanakapan sumankañaw utji, janirakiw kuna ajjsarañas utjkiti,+Diosajj janiw varapampi jupanakar castigkiti.
10 Toronakapajj walja vaca qallunak utjayapjjaraki,vacanakapasti wawachapjjewa, janirakiw sullsupkiti.
11 Yoqall wawanakapajj mä tamar uñtasitaw anqar tʼijupjjaraki,wawanakapasti altor thoqtas thoqtasaw sarapjjaraki.
12 Jupanakajj panderetanakampi arpanakampiw cantapjje,flautan* tuktʼasitap istʼasajj wal kusisipjjaraki.+
13 Taqe urunakapanwa jupanakajj wali sum jakasipjje,sumakiw* Sepulturar* saraqapjjaraki.
14 Ukampis jupanakajj cheqpach Diosarojj akham sapjjewa: ‘¡Sapak jaytapjjeta!
Janiw thakinakamat kuns yatiñ munapkti.+
15 ¿Khitirak Taqe Chʼamani Diosasti, ukhamat jupar serviñasatakisti?+
¿Jupar uñtʼasajj kunrak jikjjatsnasti?’+ sasa.
16 Ukampis nayajj yattwa, jupanakatak taqe kun sumar sarañapatakejj janiw chʼamanïpkiti.+
(Jan wali jaqenakan amuyupajj nayat jayankiwa).+
17 ¿Qhawqha kutis jan wali jaqenakan lamparapajj jiwtʼi?+
¿Qhawqha kutis jan waltʼäwinakajj jupanakar katji?
¿Qhawqha kutis Diosajj wali colerasiñapan jupanakar tukji?
18 ¿Jupanakajj thayan nayraqatapankir pajar uñtasitäpjjeti?
¿Jupanakajj mä jachʼa thayan apat jipir uñtasitäpjjeti?
19 Diosaw mä chachan castigop pachpa wawanakapatak imani.
Ukampis Diosajj uka pachparak uka chachar kuttʼaypan, ukhamat jupan yatiñapataki.+
20 Pachpa nayranakapay jupan jan walir purtʼasitap uñjpan,jupajj Taqe Chʼamani Diosan wali colerasiñapat umtʼarakpan.+
21 Jupan phajjsinakapatï jukʼaptayatächejja,*+jiwjjani uka qhepat kunas wawanakapar pasani ukat janiw llakisjjaniti.
22 Diosatï wali importante jaqenakar juzgchejja,+¿khitis Diosarojj yatiñanïñ toqet yatichaspa?*+
23 Mä jaqejj wali chʼamanïkasaw jiwjje,+jan kuna llakini, tranquilo,+
24 lankhu charanakapas wali likʼini,chʼakhanakapas wali chʼollqheraki.*
25 Ukampis yaqha jaqesti wali llakitapuniw jiwaraki,jan kunapachas sumanak malltʼasa.
26 Jupanakajj panpachaniw laqʼar kuttʼapjjani,+panpachaniruw laqʼonakajj manqʼantani.+
27 Kuntï jumanakajj amuyasipkta uk nayajj sum yatta,nayar jan waltʼayañatak amtapkta uks yatiraktwa.+
28 Jumanakajj akham sapjjtawa: ‘¿Importante jaqen utapajj kawkinkisa?
¿Jan wali jaqejj jakkäna uka carpas kawkinkisa?’+ sasa.
29 ¿Janit jumanakajj viajirinakar jisktʼasipkta?
¿Janit jupanakan señalanakap* wali amuyump yatjjatapkta,
30 ni mä jan wali jaqen tʼunjäwi urun perdonatätapsa,Diosan wali colerasiñ urupan salvatätapsa?
31 ¿Khitis juparojj thakipjjat jisktʼani?
¿Khitis juparojj kuntï lurki ukarjamajj kuttʼayani?
32 Jupajj cementerior apatäjjani ukhajja,sepulturap patjjanwa mä vigilia lurapjjani.
33 Jupar imjjatapkani uka laqʼajj jupatak mosqʼäniwa,+taqe jaqenakarakiw jupan qhepap sarapjjani,*+kunjamtï jupa nayra saririnakarojj paskäna ukhama.
34 Ukhamajj ¿kunatsa jumanakajj jan kunatak servir chuymachäwi churapjjesta?+
¡Taqe kunanaktï nayar jaysañatak sapkista ukajj kʼarikiwa!”.
Notanaka
^ Jan ukajja, “wali chʼamaniptapjjaraki”.
^ Jan ukajja, “caramillon”.
^ Jan ukajja, “mä akatjamat”. Ukajja, ratuki jan tʼaqesis jiwañat parlaski.
^ Jan ukajja, “payar jaljatächejja”.
^ Jan ukajja, “mä kuns yatichaspa”.
^ Hebreo arunjja, “chʼakhanakapan parpapas chhuyuraki”.
^ Jan ukajja, “yatjjatatanakap”.
^ Hebreo arunjja, “jupaw taqe jaqenakarojj jupan qhepap apasjjarakini”.
