Job 35:1-16
35 Elihú chachajj akham saskakïnwa:
2 “¿Jumajj razonanïtamat jan payachasisajj‘Diosat sipans jukʼamp cheqapätwa’ sasat sasma?+
3 Cheqas jumajj akham sistawa: ‘¿Ukajj kunarak jumar importtamsti?
¿Jan jucha luratajat kuna sumarak nayatak utjisti?’+ sasa.
4 Nayaw jumarojj jaysäma,jumampïpki uka amigonakamarus+ ukhamaraki.
5 Alajjpachar uñtas uñjam,jumat sipans wali altonkki uka qenayanak sum uñjam.+
6 Jumatï juch lurasmajja, ¿kunjamarak Diosar usuchjasmasti?+
Juman jucha luratanakamatï waljar tukuspajja, ¿juparojj kamacharakinisti?+
7 Jumatï cheqap jaqëstajja, ¿kunsa jupar churta?
¿Kunsa jumat katoqe?+
8 Juman jan wali luratamajj jumjam jaqerukiw jan waltʼayi,cheqaparjam luratamajj jaqerukiw yanaptʼaraki.
9 Jaqenakajj wali tʼaqesiñan uñjaskasajj yanaptʼayasiñatakiw jachʼat arnaqasipjje,chʼamani jaqenakamp apnaqatäñat samartʼañatakiw arnaqasipjje.+
10 Ukampis janiw khitis akham siskiti: ‘¿Kawkinkis nayar Luriri Diosajja,+jaqenakar alabanzanak aruman cantayki uka Diosajja?’+ sasa.
11 Jupajj kuntï oraqenkir animalanakar+ yatichki ukat sipans jukʼamp yatichistu,+jamachʼinakat sipansa jukʼamp yatiñanwa tukuyarakistu.
12 Jaqenakajj yanaptʼayasiñatakiw jachʼat arnaqasipjje, ukampis jupajj janiw jayskiti,+jan wali jaqenakan jachʼa jachʼa tukupjjatap layku.+
13 Cheqpachansa Diosajj janiw ina chʼusa* arunakamp arnaqasitarojj istʼkiti,+Taqe Chʼamani Diosajj janiw uk istʼkiti.
14 Ukhamajj ¡jumatï jan uñjatamat jupar quejasstajja, jukʼampiw jupajj jan istʼkätamti!+
Niyakejjay juman quejasitamajj jupa nayraqatankchejja, juparukiw wal suytʼañamäjjaspa.+
15 Kuna laykutejj jupajj janiw wali coleratajj jumar cuenta mayktamti,janirakiw juman jan amuytʼasis parlatamarojj kasktamti.+
16 Job chachajj inamayakiw lakap wali jachʼa ansatati,jan yatisaw walja arunak arsuraki”.+
Notanaka
^ Jan ukajja, “kʼari”.
