Job 41:1-34
-
Diosajj musparkañ Leviatán sat animalat parli (1-34)
41 ”¿Jumajj mä chawlla katuñ anzuelompit Leviatán*+ sat animalarojj katjasma,jan ukajj mä pitampich* lajjrap chintʼasma?
2 ¿Mä pitampit* nasa pʼiyapat passuyasma,jan ukajj mä ganchompich* quijadap pʼiyjasma?
3 ¿Jupajj walja kutit jumar wal ruwasïtam,jan ukajj qoña arunakampich jumar parlätamjja?
4 ¿Jumampit mä pacto lurani,ukhamat jupajj wiñayataki juman esclavomäñapataki?
5 ¿Jupampejj mä jamachʼimpjamat anatasïta,jan ukajj jiskʼa imill wawanakaman anatasiñapatakich mä chinuñampi chintʼasma?
6 ¿Negociantenakajj jupampit negocio lurapjjani?
¿Comerciantenakkamat juparojj jaljasipjjani?
7 ¿Jañchiparojj arponanakampit* junurpayäta,+jan ukajj chawlla katuñ lanzanakampich pʼeqeparojj junurpayäta?
8 Jumatï mä kutikis amparamamp llamktʼasmajja,janipuniw jupamp nuwasitam armaskasmati, janirakiw mayampis uk lurkasmati.
9 Jupar apnaqañ munatamajj inamayawa.
Jupamp uñjatäsakiw wal sustjasisma, liwitattarakismawa.
10 Janiw khitis jupa contrajj saytʼkaspati.
Ukhamajj ¿khitirak naya contra saytʼaspasti?+
11 ¿Khitis nayarojj nayraqat kuns churitu, ukhamat jupar kuttʼayañajataki?+
Taqe kunanakatï alajjpachanakat aynachankki ukanakajj nayankiwa.+
12 Janiw nayajj charanakapat parlañ amuktʼkäti,ni chʼamapatsa, ni musparkañ lurat cuerpopatsa.
13 ¿Khitis patjja isip jupar apsuspa?
¿Khitis lakap taypir mantaspa?
14 ¿Khitis munkir jan munkir lakap* jistʼaraspa?
Taqe laka chʼakhanakapajj wali ajjsarkañawa.
15 Jupan jikhanipajj escamanakamp seqentatawa,*ukanakajj maypachar suma mayachthapitawa.
16 Uka escamanakajj mayat may lugarapar wali suma uchtʼatawa,janiw ni aires uka taypi paskaspati.
17 Ukanakajj jupanakkam lipʼthapitawa,mayat may mayachthapitarakiwa, janiw jaljtayaskaspati.
18 Nasapamp phusaraski ukhajj llijtir qhanaw mistu,nayranakapasti willjta qhanar uñtasitarakiwa.
19 Lakapatjja lliju llijunakaw mistu,jiskʼa nina sankʼanakaw lakapat chhuksuraki.
20 Nasapatsti jewqʼew mistu,aqkir mä hornor uñtasita.*
21 Samanapajj sankʼanaksa naktayiwa,lakapatsti aqkir ninaw thoqsuraki.
22 Kunkapajj wali chʼamaniwa,taqe khitinakatï jupamp jikthaptapkani ukanakajj wali sustjatäpjjaniwa.
23 Purakapankir jañchi lipʼichipajj chʼollqhewa,hierrot lurat mä planchar uñtasitawa, janirakiw lugarapat onjjtayaskaspati.
24 Chuymapajj mä qaljam chʼollqhewa,molinon manqha qalapjam chʼollqhewa.
25 Kunapachatï jupajj sarti ukhajja, chʼamaninakas wal sustjasipjje,uma manqhan wali chʼamamp onjjtatapajj ajjsarkañarakiwa.
26 Janiw espadas juparojj apnaqkaspati,janirakiw lanzasa, flechasa, ni kuna yaqha armasa.+
27 Jupatakejj hierrojj waña pajar uñtasitawa,cobresti ñusantat maderar uñtasitawa.
28 Mä flechajj janiw juparojj escapaykaspati,qʼorawamp qʼorawtʼat qalanakas waña pajar uñtasitawa.
29 Mä thuru* lawas jupatakejj pajar uñtasitawa,lanzamp jupar jaqtʼapki ukhas larusiwa.
30 Jupan purakapajj ari jikʼillitanakar uñtasitawa,grano takiñ tablar uñtataw ñeqʼen suchtaraki.+
31 Kunjamtï mä phukojj wal wallaqkejja, ukhamarakiw jupajj manqha umanak wallaqeyi,lamar qotar* mantasajj kunjamtï aceitejj phukun wallaqki ukhamaw umarojj phulloqeyaraki.
32 Uman tuyusajj jupan qhepaparojj jopoqonak sarayi,ukhamïpanjja manqha umanakajj janqʼo ñikʼutanïkaspas ukhamwa maynejj amuyaspa.
33 Oraqenjja janiw jupjamajj utjkiti,Diosaw juparojj jan ajjsarirïñapatak luri.
34 Jachʼa jachʼa tukuri taqe animalanakarojj cheqakwa uñkati.
Taqe jachʼa salvaje animalanakan reyipawa”.
Notanaka
^ Variante: “kawuyampich”.
^ Variante: “kawuyampit”. Hebreo arunjja, “junco”. Ukajja siniyanakan (pantanonakan) jilir mä aliwa, pitanak (kawuyanak) lurañatakiw apnaqasiraki.
^ Hebreo arunjja, “chʼapimpich”.
^ Ukajj mä lanzar uñtasitawa, jachʼa chawllanak katuñatakiw apnaqasiraki.
^ Hebreo arunjja, “ajanupankir punkunakap”.
^ Ukajja, “Jupan jachʼañchasiñapajj seqentat (filantat) escamanakapawa” sasaw jaqokipasirakispa.
^ Jan ukajja, “junco alinakamp juntʼuptayat hornor uñtasita”.
^ Variante: “lankhu”.
^ “Lamar qota” sasin jaqokipatäki uka hebreo arojja, mä jachʼa jawirarakïspawa.
