Jueces 14:1-20
14 Ukatsti Timná sat cheqaruw Sansón chachajj saraqäna, ukansti mä filistea warmiruw uñjäna.*
2 Ukatwa tatap mamapan ukar makatasajj jupanakar akham säna: “Timná cheqan mä filistea warmiruw uñjta, sartʼarapipjjetaya, jupampiw casarasiñ munta” sasa.
3 Tatap mamapasti akham sasaw jisktʼapjjäna: “¿Janit familias taypinsa ni markas taypins mä warmejj jumatak utjki?+ ¿Jan circuncidata* filisteonakan ukar sarasapuniti mä warmi katuñama?” sasa. Ukampis Sansonajj akhamwa tatapar säna: “Sartʼarapikitaya, jupaw nayatakjamajja” sasa.
4 Sansonan amtapajj Jehová Diosatwa jutäna, ukampis tatap mamapajj janiw uk amuyapkänti. Taqe uka tiemponjja filisteonakaw israelitanakar apnaqapjjäna,+ ukatwa Diosajj filisteonak contra nuwasiñ thaqaskäna.
5 Sansón chachasti tatap mamapampiw Timná cheqar saraqäna. Kunapachatï jupajj Timná cheqan utjir uvas yapunakar purïna ukhajja, wali chʼamani mä leonaw jupan ukar warartʼasis jutäna.
6 Ukatsti Jehová Diosan espiritupaw jupar chʼam churäna,+ ukatwa uka leonarojj mä cabritor uñtat amparapampik payar chʼiyjäna. Ukampis ukham luratapjja janiw tataparusa ni mamaparus arskänti.
7 Sansón chachajj Timná cheqar saraqasaw uka warmimp parläna, jupasti uka warmirojj munaskakïnwa.+
8 Uka qhepatsti Timná cheqaruw kuttʼäna, ukhamat uka warmirojj utapar irpañataki,+ sarkasasti jiwat leonan cuerpop uñjiriw saräna, leonan jiwat cuerpopanjja abejanakampi miskʼimpiw utjäna.
9 Ukatwa amparapampi miskʼi apaqasajj manqtʼasis saräna. Tatap mamapan ukar sarasajja, jupanakaruw manqʼapjjañapatak mä jukʼa churäna. Ukampis jiwat leonan cuerpopat miskʼi apaqatap janiw jupanakar siskänti.
10 Sansonan tatapajja kawkjankkäntï warmejj ukaruw saraqäna, Sansón chachasti ukanwa fiesta luräna, casarasir waynanakajj ukhampun lurapjjerïna.
11 Jupar uñjasasti jaqenakajj jupar compañtʼir 30 waynanak irptanipjjäna.
12 Ukatsti Sansonajj jupanakar akham sänwa: “Mirä amp suma, mä adivinanza lurapjjäma, jumanakatï aka paqallqo urunakan fiesta lurkä ukan qhanañchapjjätajja, nayajj linot lurat 30 isinakampi 30 yaqha suma isinakampwa churapjjäma.
13 Ukampis janitï qhanañchapkätajja, jumanakaw linot lurat 30 isinakampi 30 yaqha suma isinakamp churapjjetäta” sasa. Jupanakasti sapjjarakïnwa: “Adivinanzam jisktʼasipkakita, nanakajj istʼañ munapjjta” sasa.
14 Ukatwa Sansón chachajj jupanakar akham säna:
“Manqʼeritjja manqʼañaw mistüna,chʼamanitjja miskʼiw misturakïna”+ sasa.
Jupanakajj kimsa uruw uka adivinanzajj kamsañsa muni uk jan amuyirjamäpkänti.
15 Pusïri urunjja, Sansón chachan warmiparojj* akham sapjjänwa: “Chachamajj* adivinanza lurapkitu+ ukajj kamsañsa muni uk yatiñatakejj engañomp arsuyam. Janitï ukhamäkanejja, jumarusa tataman utapankirinakarus phichantapjjämawa. ¿Nanakan utjapkitu uk apaqañatakit invitapjjesta?” sasa.
16 Ukatwa Sansón chachan warmipajj jupa nayraqatan wal jachäna, akham sasa: “Jumajj uñispachïstawa, janiw munaskistati.+ Markajarojj mä adivinanza lurtajja, ukampis janiw nayarojj kamsañsa muni uk awiskistati” sasa. Uk satasti Sansonajj akham sänwa: “¡Janiw tataj mamajarus awiskti! ¿Ukatti jumar awisäma?” sasa.
17 Fiesta luraskäna uka paqallqo urunakanjja, warmejj chachapar jachjjayaskakïnwa. Wal jachjjayatap laykusti, paqallqöri urunwa Sansonajj awisjjäna. Warmisti markapankirinakaruw uka jisktʼajj kamsañsa muni uk awisarakïna.+
18 Ukatwa markankir chachanakajj paqallqöri urun janïr inti jalantkipan* Sansonar akham sapjjäna:
“¿Kunas miskʼit sipans jukʼamp mosqʼäspa?
¿Kunarakis mä leonat sipans jukʼamp chʼamanïspa?”+ sasa.
Sansonasti jupanakarojj akham sarakïnwa:
“Janitejj ternerajampi qhollipkasmänjja,+adivinanzajarojj janiw cheqtʼapkasmänti” sasa.
19 Ukatsti Jehová Diosan espiritupaw juparojj chʼam churäna,+ Asquelón+ markar saraqasasti ukankir 30 chachanakaruw jiwarayäna, jupanakan isip apsusajj adivinanzapar jaysirinakaruw churarakïna.+ Tatapan utapar kuttʼkasajja, wali colerataw jupajj makatäna.
20 Sansonan warmiparojja,+ jupar compañapkäna ukanakat mä waynampiw casarapjjäna.+
Notanaka
^ Hebreo arunjja, “filisteonakan phuchanakapat mä warmiruw uñjäna”.
^ “Circuncisión” siski uk glosarion liytʼäta.
^ Hebreonakan costumbreparjamajja, casarasiñatak parlatäjje ukajj chachapat uñjatäjjänwa.
^ Hebreonakan costumbreparjamajja, casarasiñatak parlatäjje ukajj warmipat uñjatäjjänwa.
^ Ukajja, “warmin cuartopar janïr mantkipan” sasaw jaqokipasirakispa.
