Jueces 4:1-24
4 Ehúd chachajj jiwjjäna uka qhepatjja, israelitanakajj wasitat kunatï Jehová Dios nayraqatan jan walïki uk lurapjjäna.+
2 Ukatwa Jehová Diosajj Canaán markan Jabín reyipan amparapar jupanakar katuyäna,*+ jupajj Hazor markat apnaqäna. Ejercitopan pʼeqtʼiripajj Sísara chachänwa, jupajj Haróset-Goyim markanwa jakarakïna.+
3 Jabín chachajj* guerran nuwasiñatak 900 carronakanïnwa,+ uka carronakajj* hierrot lurat jusinakanïnwa,* jupasti israelitanakarojj 20 maranakaw wal tʼaqesiyarakïna,+ ukatwa israelitanakajj Jehová Diosar artʼasipjjäna.+
4 Uka tiemponjja, Lapidot chachan Débora sat profetisa+ warmipaw Israel markar juzgäna.
5 Débora warmejj Efraín tribun qollunak toqenkir oraqena, Ramá+ markampit Betel+ markampit taypinwa Deboran palmerapa sat qoqa* jakʼan qontʼasirïna. Israelitanakajj Diosan amtanakapat yatiñatakiw jupan ukar sarapjjerïna.
6 Débora warmisti Abinoam chachan Barac+ yoqapar jawsanipjjañapatakiw Quedes-Neftalí+ markat mä yatiyäwi apayäna, akham sasa: “Israelan Jehová Diosapajj akham siwa: ‘Tabor qollur saram, Neftalí, Zabulón tribunakat 10.000 chachanak jumatak ajllisim.
7 Jabín chachan ejercitop pʼeqtʼiri Sísara chacharusa, guerran nuwasiñatak carronakapsa, tropanakapsa Cisón+ lugarankir jalir umaparuw apanëjja, amparamaruw katuyarakëjja’+ sasa”.
8 Uk satasti Barac chachajj akham sasaw jupar säna: “Jumatï nayamp sarätajja, nayajj saräwa, janitejj nayamp sarkätajja, nayajj janirakiw sarkäti” sasa.
9 Débora warmejj sarakïnwa: “Nayaw jumamp saräjja. Ukampis guerran nuwasitamajj janiw jumar jachʼañchkätamti, Jehová Diosajj mä warmin amparaparuw Sísara+ chacharojj katuyani” sasa. Ukatsti Débora warmejj Quedes+ markaruw Barac chachamp chik saräna.
10 Barac chachajj Zabulón, Neftalí+ tribunkir chachanakaruw Quedes markan tantachtʼäna, 10.000 chachanakaw jupamp chikajj sarapjjäna. Débora warmis jupamp chikaw sararakïna.
11 Héber sat quenita chachajja, Moisesan suegropäki+ uka Hobab chachat jutiri quenitanakat+ saraqjjänwa, carpapajj Zaananim cheqankir jachʼa qoqa* jakʼankänwa, Quedes marka jakʼana.
12 Abinoam chachan Barac yoqapajj Tabor+ qollur makatatapwa Sísara chachar yatiyapjjäna.
13 Sísara chachajj jankʼakiw guerran nuwasiñatak carronakap taqpach tantachtʼäna, hierrot lurat jusinakani* 900 carronak* tantachtʼäna, ukhamarak jupampïpkäna uka taqpach tropanakapsa, ukhamat Haróset-Goyim markat Cisón+ lugaran jalir umapar sarañataki.
14 Débora warmejj Barac chachar akham sänwa: “Saram, Jehová Diosajj jichhüruw Sísara chacharojj amparamar katuyätam. Jehová Diosaw juman nayraqatam saraski” sasa. Barac chachasti 10.000 chachanakamp chikaw Tabor qollut saraqanïna.
15 Jehová Diosajj Sísara chacharusa, guerran nuwasiñatak carronak apnaqerinakaparusa, taqpach ejercitoparusa ajjsarañ mantayasaw pantjasiyäna,+ ukhamatwa Barac chachajj jupanakar espadampi tukjäna. Sísara chachasti carropat saraqasajj kayukiw* escapjjäna.
16 Barac chachajj ejercitonakan qhepapa ukhamarak guerran nuwasiñatak carronakan qhepap arktäna, Haróset-Goyim markakama. Sísara chachan ejercitopajj taqeniw espadampi jiwarayat uñjasïna, janiw ni maynis jupanakat escapkänti.+
17 Ukampis Sísara chachajja, Héber+ sat quenita chachan Jael+ warmipan carpaparuw kayuk* escapäna, Hazor markan Jabín+ sat reyipampi ukhamarak Héber sat quenita chachan familiapamp sumankañ utjatap layku.
18 Jael warmejj Sísara chachan ukaruw mistüna, akham sasa: “Tatay, mantanim, akar mantanim. Jan ajjsaramti” sasa. Ukatwa jupajj Jael warmin carpapar mantäna, warmisti ikiñampiw janjjatäna.
19 Sísara chachajj akham sarakïnwa: “Mirä amp suma, mä jukʼa umay wajjtʼita, umat pharjitu”* sasa. Ukatwa Jael warmejj lipʼichit lurat leche wayaqa jistʼarasajj jupar wajjtʼäna,+ ukatjja wasitat ikiñamp janjjatäna.
20 Sísara chachajj akham sasaw jupar säna: “Carpa mantañ cheqar saytʼasim, maynitejj jutasin ‘¿janit mä chachajj akankki?’ sasin jisktʼätamjja, ‘¡janiwa!’ sasaw jumajj säta” sasa.
21 Ukampis Héber chachan Jael warmipajja, carpankir mä chʼakurumpi mä martillompi apjjarusïna. Ukatjja Sísara chachan wali qarita iktʼkipanjja, jupajj kʼachat jakʼachasisaw para ladopat uka chʼakurump jununtäna, oraqer mantañapkamaw leqʼentäna, ukatsti Sísara chachajj jiwjjänwa.+
22 Barac chachajj Sísara chachar arktasaw ukar purïna, Jael warmejj jupan ukar mistusajj akham sarakïnwa: “Jutam, thaqaskta uka chacharuw uñachtʼayäma” sasa. Ukatwa jupajj uka warmimp carpar mantäna, Sísara chacharojj jiwat uñjäna, carpankir mä chʼakurumpi pʼeqet leqʼentata.
23 Uka urunwa Diosajj Canaán markan Jabín reyiparojj israelitanakar katuyäna.+
24 Israelitanakajj sapa kutiw Canaán markan Jabín reyip contrajj+ jukʼamp chʼamampi saytʼasipjjäna,+ jupar jiwayañkama.
Notanaka
^ Hebreo arunjja, “aljantäna”.
^ Hebreo arunjja, “Jupajj”.
^ Hebreo arunjja, “hierrot lurat carronakajj”.
^ Jan ukajja, “segaderanakanïnwa”.
^ Jan ukajja, “árbol”.
^ Jan ukajja, “árbol”.
^ Jan ukajja, “segaderanakani”.
^ Hebreo arunjja, “hierrot lurat 900 carronak”.
^ Variante: “kayut”.
^ Variante: “kayut”.
^ Variante: “wañjitu”.
