Proverbios 16:1-33
16 Mä jaqejj chuymapan amuyunakapjja wakichtʼiwa,ukampis jupan jaysatapajj Jehová Diosatwa juti.+
2 Jaqetakejja taqe thakinakapajj cheqapäkaspas* ukhamawa,+ukampis Jehová Diosaw jaqen amuyunakap uñanti.+
3 Kuntï lurkäta ukjja Jehová Diosan amparapar katuyam,+ukhamatwa amtanakamajj sum phoqasini.
4 Jehová Diosajja amtap phoqasiñapatakejj taqe kunwa luri,jan wali jaqenakarus apnaqewa, ukhamat jupanakajj tukjatäpjjañapataki.+
5 Taqe khitinakatï jachʼa jachʼa tukur chuymanïpki ukanakatjja Jehová Diosajj ajjtasiwa.+
Jupanakajj castigatäpjjapuniniwa, jan ukat payachasimti.
6 Munasiña jan jaytjasiña ukhamarak jan jaytjasiña utjatap laykojja juchajj perdonatawa,+Jehová Diosar ajjsaratap laykojja jan walitjja maynejj jitheqtiwa.+
7 Kunapachatï Jehová Diosajj mä jaqen thakinakapat kusisitäki ukhajja,uka jaqen enemigonakapajj jupamp sumankapjjañapatakis Diosajj yanaptʼiwa.+
8 Jukʼa utjirinïsin kunatï cheqapäki uk lurañaw jukʼamp sumajja,+wal ganasin kunatï jan walïki uk lurañat sipansa.+
9 Mä jaqejja kunsa lurani ukjja sumwa amuytʼaspa,ukampis Jehová Diosaw chellqtatanakap irpi.+
10 Mä reyejja kuntï Diosajj amtki ukpunwa parlañapa,+jupajj janipuniw kunanakatï jan cheqapäki uk lurañapäkiti.+
11 Phoqat balanzanakasa balanzan peso uñachtʼayiripasa Jehová Diosatwa juti,bolsankir taqe pesanakajj jupan luratawa.+
12 Jan wali lurañanakajja reyinakatakejj ajjtaskayawa,+kuna laykutejja tronojj kunatï cheqapäki ukarjam suma uttʼayatawa.+
13 Cheqapar arsutanakajja reyinakarojj kusisiyiwa.
Khitinakatï cheq parlapki ukanakajja reyinakan munatäpjjewa.+
14 Reyin colerasitapajja jiwañ apanir yatiyirinakar uñtasitawa,+ukampis yatiñan jaqejja coler apjtayiwa.+
15 Kunapachatï reyin ajanupajj kʼajtki ukhajja jakañaw utji,jupan suma uñjatäñajja tiempoparu jallu purjjatayanir qenayar uñtasitawa.+
16 ¡Qori jikjjatañat sipansa yatiña jikjjatañaw jukʼamp sumajja!+
Qollqe jikjjatañat sipansa amuytʼasirïñ jikjjatañaw jukʼamp wakiskirejja.+
17 Cheqapar sarnaqer jaqenakajja jan wali thakit jitheqtapjjewa.
Khititï thakip sum uñjki ukajja jakaskakiniwa.+
18 Jachʼa jachʼa tukuñajja tukjatäñaruw api,wali wali tukuñajja lanktʼasiñaruw aparaki.+
19 Llampʼu chuymaninak* taypinjja humilde chuymanïñaw jukʼamp sumajja,+jachʼa jachʼa tukurinakan saqueysutanakap jaljasiñat sipansa.
20 Kun lurañatakis suma amuytʼasirïtap uñachtʼayki ukarojja sumaw sarani,Jehová Diosar confiyirejj kusisitawa.
21 Khititï yatiñan chuymanïki ukajja amuytʼasir jaqet uñtʼatäniwa,+khititï suma arunakampi* parlki ukajja amuytʼayasaw iyawsayi.+
22 Khitinakatï suma amuytʼasirïpki ukanakatakejja suma amuytʼasiñajj jakañ chuririwa,ukampis jan amuytʼasirinakajja jan amuytʼasirïpjjatap laykojj cheqañchatäpjjewa.
23 Yatiñan jaqen chuymapajja lajjraparojj suma amuytʼasirïñwa churi,+arunakapasti amuytʼayasaw iyawsayi.
24 Suma arunakajja chʼaqarir miskʼir uñtasitawa,chuymatakejj* mojjsawa,* chʼakhanakatakis qollawa.+
25 Mä thakiw utji, uka thakejja jaqetakejj cheqa thakïkaspas ukhamawa,ukampis qhepatjja uka thakejj jiwañaruw api.+
26 Mä trabajirejj wal manqʼañ munatap laykuw wal trabaji,manqʼat awtjatätap laykuw munkir jan munkir trabaji.+
27 Jan kunatak servir jaqejja kunatï jan walïki uk lurañwa amti,+arunakapajj nakhantir ninar uñtasitawa.+
28 Chʼajjwir jaqejja chʼajjwañanakwa utjayi,+kʼarintir jaqejja suma amigonakaruw jaljtayi.+
29 Nuwasir jaqejja jaqe masiparojj jan walinakwa amtayi,jan wali thaknamaw irparaki.
30 Jan wal lurañ amtki ukhajja, jupajj nayrapwa chʼirmtʼi,jan walinak lurjje ukhajja, lakapwa achjjarusi.
31 Janqʼo ñikʼutanïñajj mä suma coronawa,+kunapachatï maynejj cheqa thakinkkasin uk jikjjatki ukhajja.+
32 Pacienciani* jaqejja+ chʼamani jaqet sipansa jukʼamp sumawa,coleramp jan atipayasir jaqejja marka katuntir jaqet sipansa jukʼamp sumawa.+
33 Mä jaqejja suertenak willtaspawa,*+ukampis kuntï uka suertenak willtasin amtaski ukajj Jehová Diosatwa juti.+
Notanaka
^ Hebreo arunjja, “qʼomäkaspas”.
^ “Llampʼu chuymanïña” siski uk glosarion liytʼäta.
^ Jan ukajja, “munkañ arunakampi”. Hebreo arunjja, “mojjsa arunakampi”.
^ Jan ukajja, “malltʼañatakejj mojjsawa”.
^ Jan ukajja, “Jan ratuk colerasiri”.
^ Hebreo arunjja, “jarphipanwa suertenak willtaspa”.
