¿Bautisasxiristti?
37 YATICHÄWI
¿Bautisasxiristti?
Chiqat janicha uk chimptʼäta:
Taqi cristianonakaw bautisasipxañapa.
□ Chiqawa
□ Janiwa
Maynix juchar atipañatakiw bautisasiñapa.
□ Chiqawa
□ Janiwa
Bautisasiñax qhispiyasiñan qalltapawa.
□ Chiqawa
□ Janiwa
Jan bautisaskäxa, janiw Diosax cuenta maykitaniti.
□ Chiqawa
□ Janiwa
Masinakajax bautisasxapxiwa, ukhamasti nayax bautisasiñajarakiwa
□ Chiqawa
□ Janiwa
¿KUNJAMTIX Bibliax yatichki ukarjamati sarnaqta? ¿Diosan amigopäñatakiti chʼamachasisktaxa? ¿Biblian yatichäwinakapatxa yaqhanakar yatiytati? Ukhamächi ukhaxa, inas janïr bautisatäkasax bautisasiñ munasksta. Ukampis chiqpachapuniti wakichatäxta uk amuytʼasiñamawa. Ukat aka qalltan utjki uka amuytʼanakar kunjamsa chimptʼawayta ukarjamaw wakichatäxtati janicha ukxa amuytʼasirakisma.
● Taqi cristianonakaw bautisasipxañapa.
Chiqawa. Ukham lurapxäta sasaw Jesusax arkirinakapar säna (Mateo 28:19, 20). Chiqansa, jupa pachpaw ukham bautisasïna. Ukhamasti, Cristor arkañ munasax bautisasiñamarakiwa, ukampis sumpach amuytʼasxäta ukat chiqapuni bautisasiñ munäta ukhaw bautisasxasma.
● Maynix juchar atipañatakiw bautisasiñapa.
Janiwa. Kunapachatï maynix bautisasxi ukhaxa, Jehová Diosar jakäwip katuyasitapwa uñachtʼayi. Ukat kunjamtï Arupan yatichki ukarjam sarnaqañ munasaw maynix Jehová Diosar katuyasi. Ukhamasti, janiw maynix jan wali amtanakapar atipañatakiki bautisaskiti.
● Bautisasiñax qhispiyasiñan qalltapawa.
Chiqawa. Kunjamtï Bibliax siskixa, bautisasiñax wali askipuniw qhispiyasiñatakixa (1 Pedro 3:21). Ukampisa, maynix bautisaski ukhaxa, janiw taqi jan walinakat qhispkapunispati, janiw ukham sañ munkiti. Chiqansa, Jehová Diosar munatas laykuwa ukat wiñayataki jupar taqi chuyma luqtañ munatas laykuw bautisasiñasa (Marcos 12:29, 30).
● Jan bautisaskäxa, janiw Diosax cuenta maykitaniti.
Janiwa. Santiago 4:17 jiskʼa tʼaqax akham siwa: “Khititix [mä arunxa, bautisatas jan bautisatas] aski lurañ yatki ukatsti janirak lurkiti ukaxa, juch luraski” sasa. Ukhamasti sum amuytʼasiñamawa: ¿Kuntï Diosax jumat mayki uk yattati? ¿Kunjamsa sarnaqäta uk amuytʼasirjamäxtati? Ukhamächi ukhaxa, inas wakischispa awk taykamampi jan ukax amuytʼasir mä cristianompi parltʼaña. Jupanakaw bautisasiñatak yanaptʼapxiristamxa.
● Masinakajax bautisasxapxiwa, ukhamasti nayax bautisasiñajarakiwa
Janiwa. Jumaw bautisasiñxa amtañama (Salmo 110:3). Ukampis Jehová Diosan Qhanañchiripax kunjamsa sarnaqañapa ukat jumax ukham sarnaqirjamätati uk sum amuyxäta ukhakiw bautisasxasmaxa (Eclesiastés 5:4, 5).
Bautisasisax janiw nayrjam sarnaqxätati
Bautisasisax janiw nayrjam jakxätati, ukampis walja bendicionanakaw utjarakini. Ukatxa kuntï luräw sas Dios nayraqatan arsuwayktax ukanak phuqañamawa, chiqansa ukanak phuqañax chʼamakïspawa.
¿Niyat bautisasxäta? Ukhamächi ukhaxa, wali kusiskañawa. Jehová Diosar taqi chuyma luqtañasa, jupataki sapürunjam jakañasa wali askipuniwa (Mateo 22:36, 37).
Kunjamatsa jakäwiman wali askinak lurasma.
BIBLIAX KAMSISA
“Jumanakax Diosarux jakkir ofrendjamay luqtasipxam, Diosar kusisiykiri luqtata. Ukawa Diosatakix ajayu tuqin chiqpach Diosar serviñaxa.” (Romanos 12:1)
AKHAM LURASMAXA
Yupaychañ tuqitxa, tamankir kawkïr jilatasa jan ukax kullakasa yanaptʼitaspa sasaw awk taykamar jisktʼasisma (Hechos 16:1-3).
¿YATIYÄTATI?
Maynix bautisasxi ukhaxa, qhispiñataki ‘señalatäkaspas’ ukhamawa (Ezequiel 9:4-6).
¡AKANAK LURÄ!
Bautisasiñatakix Bibliatwa aka tuqinakat jukʼamp yatxattʼañ munta: ․․․․․
Awkijarus jan ukax taykajarusa, ¿kuns aka tuqit jisktʼañ muntxa? ․․․․․
JUMASTI, ¿KAMSASMASA?
● ¿Kunatsa bautisasiñax jan anatasiñäki?
● ¿Kunatsa yaqhip wayn tawaqunakax jan wakichatäpkasin bautisasipxi?
● ¿Kunatsa yaqhip wayn tawaqunakax Jehová Diosar katuyasiñatakisa bautisasiñatakisa walja tiempo suyasax pantjasipxi?
[306 janan qhanañchäwipa]
“Nayax bautisatätwa, uk amtañax askinak lurañ yanaptʼitu, ukatxa jan walinakatsa amuyasiraktwa.” (Noemí)
[307 janan recuadropa/fotopa]
Bautisasiñatakix akanakwa jisktʼasipxi
¿Bautisasiñax kuns uñachtʼayi? Umar chhaqantasax jiwkasmas ukhamawa, mä arunxa nayra jan wali amtanaksa jan ukax luräwinaksa apanukkasma ukhamawa. Ukat umat kutsunxta ukhaxa, jaktkasmas ukhamarakiwa, mä arunxa Diosan munañap lurañatakis jakxasma ukhama.
¿Jehová Diosar jakäwi katuyasiñax kun sañs muni? Janiw munañamarjam sarnaqxtati ukat Jehová Diosaruw jakäwims katuyxaraktaxa, mä arunxa jupaw uywirimäxi, uk sañ muni (Mateo 16:24). Ukampis janïr bautisaskasaw Jehová Diosar mayisiñama, ukanxa “juman munañamwa taqi kunat sipansa nayraqat phuqäxa” sasaw sañama.
¿Janïr bautisaskasax kun lurañas wakisispa? Kunjamtï Bibliax yatichki ukham sarnaqañamawa, ukat Diosan arunakapatsa yaqhanakar yatiyañamarakiwa. Ukat Jehová Diosampiw sum apasiñamaraki, ukatakix Bibliat yatiqañaw wakisi ukat janirakiw Diosat mayisiñ armasiñamäkiti. Janiw mayninakan jariyatakix Diosar luqtañamäkiti, jan ukasti jumaw amtañama.
¿Bautisasiñatakix qhawqha maranïñajasa? Qhawqha maranïskamsa, nayraqatxa amuytʼasirïñamawa, mä arunxa Jehová Diosar katuyasiñax kun sañs muni uk sum amuyañamawa.
Bautisasiñ munirista, ukampis awk taykajax suytʼayañ munapxitaspa ukhaxa, ¿kamachiristsa? Biblian kamachinakaparjam sum sarnaqañamatakix tiempow munasini sapxani ukhaxa, istʼañamawa, ukat Jehová Diosampi jukʼamp sum apasiñatakiw chʼamachtʼasiskakiñama (1 Samuel 2:26).
[308, 309 jananakan recuadro]
Wakichasiñatak jananaka
¿Bautisasiñti amtaskta?
Chiqapunit bautisasiñatakix wakichatäxta janicha uk amuytʼasiñwa akxan uñstki uka jisktʼanakaw yanaptʼätamxa. Ukampis jisktʼanakxar utjki uka Bibliat apstʼat qillqatanak nayraqat liytʼäta
¿Jehová Diosar atinistati? ¿Kunjamsa uk uñachtʼayta? (Salmo 71:5.) ․․․․․
¿Kunatix walïki, jan walïki ukxa sumti amuyta? ¿Kunapachas ukham lurirïta? (Hebreos 5:14.) ․․․․․
¿Diosat mayisipuntati? ․․․․․
¿Kuna tuqinakatsa Diosar mayisiñ yatta? ¿Parlatamax Jehová Diosar munasitamti uñachtʼayi? (Salmo 17:6.) ․․․․․
¿Kuna tuqinakatsa Diosar jukʼamp sum mayisiñ munasma? ․․․․․
¿Sapürut Bibliat yatiqta, janicha? (Josué 1:8.) ․․․․․
¿Sapaki Bibliat yatiqkasax kuna tuqitsa yatxatta? ․․․․․
¿Bibliat sapaki sum yatxatañatakix kunanaks lurasma? ․․․․․
¿Sumti Diosan arunakapatxa jaqinakar yatiyta? (Sañäni: ¿Bibliax kuntï yatichki ukanakxa, sumti yatichirjamäta? ¿Yatiqañ munirinakar wasitat tumptʼtati? ¿Maynirukis Bibliat yatichañ munasmati?)
□ Jïsa □ Janiwa
¿Awk taykamax jan mistupki ukhasa jumax jaqinakar yatiyir sartati? (Hechos 5:42.)
□ Jïsa □ Janiwa
¿Jaqinakar sumpach yatiyañatakix kunanaksa lurasma? (2 Timoteo 2:15.) ․․․․․
¿Tantachäwinakar sarapuntati, jan ukax yaqhip tantachäwinakat qhiparxaktacha? (Hebreos 10:25.) ․․․․․
¿Uka tantachäwinakan arstʼtati? ․․․․․
Awk taykan tantachäwinakar sarasmaw sataxa, ¿sapakis uka tantachäwinakar sartati?
□ Jïsa □ Janiwa
¿Jumatakix Diosan munañap lurañax munañjamati? (Salmo 40:8.)
□ Jïsa □ Janiwa
Inas awisax masinakan kun luram satas jan lurirïkstati, ¿uk amtastati? (Romanos 12:2.) ․․․․․
¿Jehová Diosar munasiskakiñamatakix kunsa lurasma? (Judas 20, 21.) ․․․․․
Amigonakamas jan ukax awk taykamas Jehová Diosar jan luqtañ munxapxaspati ukhaxa, ¿jumax Jehová Diosar luqtaskakismati? (Mateo 10:36, 37.)
□ Jïsa □ Janiwa
[310 janan fotopa]
Bautisasiñax jaqichasiñamp sasiwa, ukhamasti maynix sum amuytʼasiñapaway
