1, 2. ¿Khitis jichhürunakan jan walinakat jarkʼaqestaspa?

 JALLU urunsa anqan sarnaqkasma ukham amuytʼañäni. Alajjpachajj wali qenayrantatawa, lliju llijunakas wal llijtaniraki, qʼejjo qʼejjonakas waliw istʼasiraki. Ukjjarusti jallojj walpun purintaraki. Ukhaman uñjasisajj jankʼakiw kawkjar imantasiñsa thaqtasma. ¡Mä suma waña lugar jikjjatasajj walpun kusisisma!

² Jichhürunakanjja, niya ukhamanarakwa uñjastanjja. Akapachajj sapürutjamaw jan walir saraski. Ukatwa jumajj akham jisktʼasisma: “¿Khitis jan walinakat jarkʼaqetaspa?” sasa. Salmo qellqerinakat maynejj akham sänwa: “[Jehová Dios] jumätaw imantasiñajjajja, jarkʼaqasiñajjasa, Diosajjay, jumaruw taqpach chuymamp alkatsma” sasa (Salmo 91:2). Jehová Diosaw jan walinakar saykatañatakejj yanaptʼistaspa, jutïrinsa suma jakañwa churarakistani.

3. ¿Kunjamsa Jehová Diosampejj jarkʼaqayassna?

³ ¿Kunjamsa Jehová Diosajj jan walinakat jarkʼaqestaspa? Jupajj taqe llakinakar saykatañatakiw yanaptʼistaspa. Jan walinak lurañ munapkistu uka jaqenakat sipansa, Diosajj jukʼamp chʼamaniwa. Jan walinakansa jichhürunakan uñjaskchiñänejja, Diosaw taqe ukanakjja jutïrin askichjjani. Bibliajj akham sasaw chʼamañchtʼistu: ‘Diosan wali munata jakasisipkakimʼ sasa (Judas 21). Jan walinakar saykatañataki yanaptʼa katoqañatakejja, Jehová Diosat janiw jitheqtañasäkiti. ¿Kunsa jan jitheqtañatakejj lurañasa?

4, 5. ¿Kunjamsa Jehová Diosajj munasiñap uñachtʼayistu?

⁴ Jehová Diosat jan jitheqtañatakejja, nayraqatajj qhawqsa Diosajj munasistu ukwa amuytʼañasa. Kunanaksa Jupajj jiwasanak layku lurawayi ukanakwa amuytʼañasa. Diosajj mä suma oraqwa jiwasan jakasiñasatak lurawayi, ukanjja musparkañ plantanaka, animalanakaw utji. Diosajj manqʼsa umsa churarakistuwa. Bibliansti, Jupajj kamsatasa, kunjam Diosasa, ukanakwa yaticharakistu. Taqe ukanakat sipansa, wali munat Yoqaparuw aka oraqerojj jaqenak layku jiwañapatak khitanïna, ukhamatwa qhawqha munasirisa uk uñachtʼayistu (Juan 3:16). Jesusan jaqenak layku jiwatapatwa jutïrinsa wali sum jakasirakiñäni.

⁵ Jehová Diosajj alajjpachankir mä Reino uttʼayi, uka Reinojj niyaw taqe tʼaqesiñanak chhaqtayjjani. Uka Reinorakiw aka oraq paraisoptayani. Ukanjja taqeniw sumana, kʼuchiki jakasipjjani (Salmo 37:29). Maysa toqetjja, Diosajj jichhürunakan sum jakasiñ yatichasaw munasiñap uñachtʼayarakistu. Diosajj mayisipjjeta sarakistuwa, jupajj mayisitanakas istʼañatakejj jankʼakiwa. Cheqansa Jehová Diosajj taqeniruw munasistu, ukajj qhanaw amuyasi.

6. ¿Kunjamsa Jehová Diosar munasitas uñachtʼaysna?

⁶ Jehová Diosajj taqeniruw munasistu, jiwasajj jupar munasiñasarakiwa. ¿Kunjamsa jupar munasitas uñachtʼaysna? Kunanaktï jupajj jiwas layku lurki ukanakat yuspärasaw uñachtʼaysna. Jichhürunakanjja, jaqenakajj jan yuspärasirïpjjewa. Jesusajj aka oraqenkkäna ukhas jaqenakajj ukhamäpjjarakïnwa. Mä kutejja, Jesusajj lepra usuni tunka jaqenakaruw qolläna, ukampis maynikiw Jesusar yuspäräna (Lucas 17:12-17). Jiwasajja, Jesusar  yuspärkäna uka jaqetwa yateqasiñ muntanjja, Jehová Diosarojj yuspärañasapuniwa.

7. ¿Kunjamsa Jehová Diosar munasiñasa?

⁷ Jehová Diosarojj munasiñasarakiwa. Jesusajja, taqe chuymamampi, taqe almamampi, taqe amuyumampiw Jehová Diosar munasipjjañama sasaw discipulonakapar säna (Mateo 22:37 liytʼañataki). ¿Uka arunakajj kamsañsa muni?

8, 9. ¿Kunjamsa Jehová Diosar munasitas uñachtʼaysna?

⁸ “Jehová Diosar munastwa” sasajj janiw aleqakejj sañasäkiti. Jiwasatï taqe chuymasampi, taqe almasampi, taqe amuyusampi Jehová Diosar munasiñäni ukhajja, luratanakasampiw jupar munasitas uñachtʼayañäni (Mateo 7:16-20). Diosar munasstan ukhajja, mandamientonakap phoqarakiñäniwa sasaw Bibliajj qhanañchi (1 Juan 5:3 liytʼañataki).

⁹ Jehová Diosar istʼtan ukhajja, kusisita, suma ukhamaw jakastanjja (Isaías 48:17, 18). Ukampis ¿kunas Jehová Diosat jan jitheqtañatakejj yanaptʼistani? Uk jichhajj yatjjatañäni.

10. ¿Kunatsa Jehová Diosat yatjjataskakiñama?

¹⁰ ¿Kunas Jehová Diosan amigopäñatak yanaptʼawaytam? Bibliat yatjjatasaw Jehová Diosar jukʼamp uñtʼawaytajja, ukaw amigopäñatakejj yanaptʼawaytam. Jehová Diosan amigopäñajj ninajj aqki ukamp sasiwa. Ninajj aqaskakiñapatakejja lawanak uchañaw wakisi. Diosan amigopäskakiñatakejj ukhamarakiw Bibliat yatjjataskakiñama (Proverbios 2:1-5).

11. ¿Kunjamsa Biblian cheqa yatichäwinakapajj yanaptʼätam?

¹¹ Bibliat jukʼampi yatjjataskakïta ukhajja, chuymar purtʼkiri cheqa yatichäwinak yateqaskakïtawa. Jesusan pä discipulonakapat parltʼañäni, kunapachatï Jesusajj  Biblian profecianakapat jupanakar amuytʼaykäna ukhajja, akham sapjjänwa: “Jupajj thak jutkasin parlkistäna, Qellqatanakatsa qhanañchkistäna ukhajja, ¿janit chuymasajj nakkistänjja?” sasa (Lucas 24:32).

12, 13. 1) ¿Kunas Jehová Diosar munasitasampejj pasaspa? 2) ¿Kunas Jehová Diosar munasiskakiñatakejj yanaptʼistaspa?

¹² Kunjamtï Jesusan discipulonakapajj Biblian profecianakapat amuytʼasin kusisipkänjja, ukhamarakiw jumajj Bibliat sum amuytʼasajj kusispachayätajja. Ukaw Jehová Diosar uñtʼañatakisa jupar munasiñatakis yanaptʼawaytamjja. Jichhasti uka munasiñajj jan thayaraspati ukwa munpachätajja (Mateo 24:12).

¹³ Jehová Diosan amigopäjjasajj jukʼampiw jupar jakʼachasiñatak chʼamachasiñama. Jehová Diosatsa Jesusatsa yateqaskakiñamawa, lupʼiñamarakiwa, uka yateqatarjamaw sarnaqañamaraki (Juan 17:3). Biblia liyisasa Bibliat yatjjatasasa, akham sasaw jisktʼasiñama: “¿Kunsa  aka qellqatajj Jehová Diosat yatichitu? ¿Kunatsa Diosarojj taqe chuymajampi taqe almajampi munasiñaja?” sasa (1 Timoteo 4:15).

14. ¿Kunjamsa oracionajj Jehová Diosar munasiñatak yanaptʼistaspa?

¹⁴ Mä suma amigosamp sapa kut parltʼastan ukhajja, jupampejj sum apastanjja. Jehová Diosampejj niya ukhamarakiwa, jupar sapa kut oración mayistan ukhajja, jupampejj sum apasiraktanjja (1 Tesalonicenses 5:17 liytʼañataki). Oracionajj alajjpachankir Awkisan mä suma regalopawa. Ukatwa jupar taqe chuyma mayisiñasa (Salmo 62:8). Janiw pʼeqer yatsut arunakampejj Diosar orañasäkiti, jan ukasti kunatï chuymasan utjki ukanakwa mayisiñasa. Ukhamasti jiwasatï Bibliat yatjjataskakiñäni, oracionsa taqe chuyma lurarakiñäni ukhajja, Diosarojj taqe chuymaw munasiñäni.

15, 16. ¿Kunatsa jumatakejj Diosan arunakapat parlañajj wakisi?

¹⁵ Jehová Diosat jan jitheqtañ munkstan ukhajja, kunarutï creyktan ukanakatwa jaqe masisar parlañasa. Jehová Diosat yaqhanakar parlañajj wali kusiskañawa, janipuniw ukham yaqha luräwejj utjkiti (Lucas 1:74). Jesusaw jaqenakar yatiyir sarapjjam sasin arkirinakapar säna. Ukatwa cristianonakajj Diosan Reinopat suma yatiyäwinak yatiyañasa. ¿Jumajj jaqenakar uka Reinot parljjtati? (Mateo 24:14; 28:19, 20).

¹⁶ Apóstol Pablotakejja, Diosan arunakap yatiyañajj wali wakiskirïnwa. Jupatakejj ‘wali valoranïnwa’ (2 Corintios 4:7). Jumajja, Jehová Diosatsa amtanakapatsa jaqenakar parlarakismawa, ukhamatwa uka wakiskir luräwimp phoqäta. Ukanakat jaqenakar yatiyasajj Jehová Diosaruw servisktajja, jupajj janipuniw ukham luratamat armaskaniti (Hebreos 6:10). Yatiyañajj Jehová  Diosar jakʼachasiñataki ukhamarak wiñay jakañ katoqañatakiw yanaptʼätam, jaqenakarus ukhamarakiw yanaptʼani (1 Corintios 15:58 liytʼañataki). Diosan arunakapat parlañajj wali kusiskañawa, janipuniw ukham yaqha luräwejj utjkaspati.

17. ¿Kunatsa jaqenakarojj Diosan arunakapat jankʼak yatiyañasa?

¹⁷ Diosan arunakapajj jankʼakiw jaqenakar yatiyasiñapa. Ukatwa jiwasajj “Diosan arunakap” ‘jankʼak yatiyañasa’ (2 Timoteo 4:2). Jaqenakajj Diosan Reinopat istʼapjjañapawa. Bibliajj akham siwa: “Jakʼankiwa [Jehová] Tatitun khä jachʼa urupajja. ¡Jakʼankiwa uka urojj, jankʼakiw purinirakini!”, “purisinkaniwa horasaparu” sasa (Sofonías 1:14; Habacuc 2:3). Jehová Diosajj niyaw Supayan apnaqat aka jan wali pacha tʼunjani. Uka uru janïr purinkipanjja, Diosar serviñ amtapjjañapatakiw jaqenakar yanaptʼañasa.

18. ¿Kunatsa Diosarojj cheqpach cristianonakamp chika serviñasa?

¹⁸ Jehová Diosajj cheqpach cristianonakamp chika jupar sirvsna ukwa muni. Bibliajj akham siwa: “Mayninakajj kunjamäsipkisa ukjja amuyapjjapuniñäni, ukhamat munasiñasa wali suma luräwinakasa jukʼamp utjañapataki. Tantachäwinakasjja janirak jaytanukupjjañäniti, kunjamtï yaqhepanakajj jaytanukuñar yatitäpki ukhamjja, antisas maynit maynikam purapat chʼamañchtʼasipjjañäni, Diosan urupan jakʼankjjatap yatisajj jukʼamp uk lurapjjañäni” sasa (Hebreos 10:24, 25). Ukhamajj taqpach tantachäwinakar sarañatak chʼamachasiñäni, ukanwa maynit maynikam chʼamañchtʼasiñäni.

19. ¿Kunas jilat kullakanakar munasiñatakejj yanaptʼistaspa?

¹⁹ Tantachäwinakar sarasajj suma amigonakwa jikjjatäta, jupanakaw Jehová Diosar serviñ yanaptʼapjjätam. Jupanakajj jumjamarakiw Diosar serviñatak chʼamachasipjje, jumjamarakiw pantjasipjje. Ukatwa pantjasipjjani ukhajj jankʼak perdonañama (Colosenses 3:13 liytʼañataki).  Jilat kullakanakan pantjasitanakap uñchʼukiñat sipansa suma luratanakapwa thaqañama. Ukaw jupanakar munasiñatakisa Jehová Diosar jukʼampi munasiñatakis yanaptʼätam.

20, 21. ¿Kunas ‘cheqpacha jakañajja’?

²⁰ Diosajja amigonakapajj kusisita jakasipjjaspa ukwa muni. Jutïrinjja janiw kunjamtï akapachan jakktan ukham jakjjañäniti sasaw Bibliajj qhanañchi.

²¹ Paraisonjja, janiw 70, 80 maranakaki jakjjañäniti, jan ukasti ‘wiñayaw jakasjjañäni’. Janiw usuntañasa, nuwasiñanakasa, llakisiñanakasa utj-jjaniti. Ukaw Bibliarjamajj ‘cheqpach jakasiñajja’. Diosajj wiñay jakasiñas muni, ukampis jiwasaw cheqpach jakaña katoqañatakejj chʼamachasiñasa (1 Timoteo 6:12, 19).

22. 1) ¿Kunsa ‘cheqpach jakaña’ katoqañatakejj lurañasa? 2) ¿Kunatsa chʼamachasitasampejj wiñay jakañ jan jikjjatksna?

²² ¿Kunsa ‘cheqpach jakasiña’ katoqañatakejj lurañasa? ‘Kunatï walïki ukanakwa lurañasa’, ‘suma luräwinakansa qamirïñasarakiwa’ (1 Timoteo 6:18). Uka arunakajja, kuntï Biblian yateqktan ukarjam sarnaqaña sañ muni. Cheqpach jakañajj Jehová Diosan regalopawa, janiw chʼamachasitasampejj uk jikjjatksnati. Ukjja ‘Diosan wali khuyapayasiñapatwa’ katoqañäni (Romanos 5:15). Alajjpachankir Awkisajja, jupat jan jitheqtir servirinakapajj sum jakasipjjaspa ukwa muni.

23. ¿Kunatsa suma amtanakar puriñama?

²³ Akham jisktʼasim: “¿Kunjamtï munki ukhamti Jehová Diosar servisktjja?” sasa. Inas jakäwiman jan wali lurañanak apanukuñ wakisitap amuychïta, ukhamäni ukhajja jankʼakiw ukanak apanukuñama. Jehová Diosar confiyktan, taqe kunan istʼañatakis chʼamachasiraktan ukhajja, jupajj jarkʼaqestuwa. Jehová Diosajja, Supayan  apnaqat aka qhepa urunakan jupat jan jitheqtirinakarojj salvaniwa. Ukatsti kunjamtï jupajj arsuwaykejja, Paraison wiñay jakasiñasatakiw yanaptʼistani. Ukhamasti jumatï suma amtanakar purïta ukhajja, ¡jutïrinjja cheqpach suma jakasiñwa katoqäta!