1, 2. ¿Kamsasas jaqenakajj jisktʼasipjje?

 UMAW lamar qotat jitsunisajj mä jiskʼa marka chhaqtayatayna. Mä jaqew iglesiar mantasajj waljanir usuchjatayna, jiwarayarakitayna. Cáncer usumpi jiwasinjja mä warmejj phesqa wawanakaparuw wajchanak jaytawayi.

² Ukham jan wali yatiyäwinak istʼasajj waljaniw akham jisktʼasipjje: “¿Kunatsa uñisisiñanakasa tʼaqesiñas utjpacha?” sasa. ¿Jumajj ukham jisktʼasirïtati?

3, 4. 1) ¿Kunatsa tʼaqesiñajj utji sasin Diosar jisktʼañajj walikïskiti? Uk qhanañchtʼam. 2) ¿Kunjamsa Diosajj jan walinaksa tʼaqesiñanaksa uñji?

³ Diosar confiyiri chachanakas ukhamarakiw jisktʼasipjjäna ukwa Biblian yateqtanjja. Habacuc profetajj Diosar akham sänwa: “¿Kunatsa ukataq llakisiñanaka, tʼaqhesiñanaka uñjayista? Nayajj tʼaqhesiyañanakampi, tukjañanakampi muyuntatätwa; [...] quejasiñanakasa, chʼajjwañanakasa, taqe cheqanwa utjejja” sasa (Habacuc 1:3).

⁴ Habacuc 2:2, 3 qellqatanjja, kunjamsa Diosajj Habacuc profetan jisktʼapar qhanañchäna, jan walinak askichañ toqetsa kamsarakïnsa ukwa liytʼsna. Jehová Diosajj jaqenakar wal munasi. Biblianjja siwa: “Jupajj kunatï jumanakar pasapktam ukanakat wal llakisi” sasa (1 Pedro 5:7). Diosajj jaqenakat sipansa tʼaqesiñanak wal uñisi (Isaías 55:8, 9). Ukhamasti ¿kunatsa tʼaqesiñajj akapachan utjpacha? Jichhajj uk yatjjatañäni.

5. 1) ¿Religión pʼeqtʼirinakajj tʼaqesiñanak toqet kamsapjjesa? 2) ¿Kunsa Bibliajj yatichi?

⁵ Pastoranakasa, tata curanakasa, religión pʼeqtʼirinakasa,  tʼaqesiñajj Diosan munañapatsa utjkaspa ukham yatichapjje. Yaqhepasti, kuna jan walinakatï maynirojj paski ukanakasa, tʼaqesiñasa Diosan munañapawa, kunatsa ukanakajj paspacha ukjja janiw yatksnati sasaw sapjje. Yaqhepajja, Diosampi alajjpachan jakasiñatakiw jaqenakasa wawanakasa jiwapjje sasaw sapjjaraki. Ukampis ukajj janiw cheqäkiti. Diosajj janipuniw jan walinak utjaykaspati. Biblianjja siwa: “¡Taqe chʼamani Diosajj janiw kuna jan walsa lurkaspati, janirakiw kunatejj jan cheqapäki uksa lurkaspati!” sasa (Job 34:10).

6. Tʼaqesiñanak utjatapatjja, ¿kunatsa jaqenakajj Diosar juchañchapjje?

⁶ Tʼaqesiñanak utjatapatjja, jaqenakajj Diosaruw juchañchapjje. ¿Kunatsa? Diosas akapach apnaqkaspa ukham amuyapjje. Ukampis kunjamtï 3 yatichäwin yateqktanjja, Diablo Supayaw akapach apnaqaski.

7, 8. ¿Kunatsa tʼaqesiñajj akapachan utji?

⁷ “Akapachajj Supayan amparapankiwa” sasaw Biblian qhanañchi (1 Juan 5:19). Akapach apnaqer Supayajj uñisiri, jan sinttʼasiri ukhamawa. Jupaw aka “oraqen jakirinakar engañjaski” (Apocalipsis 12:9). Walja jaqenakaw Supayat yateqasipjje. Ukatwa jaqenakajj kʼarisiri, uñisiri, jan sinttʼasiri ukhamäpjje.

⁸ ¿Kunatsa tʼaqesiñajj utjaraki? Adanampi Evampejj Dios contra saytʼasipkäna uka qhepatjja, taqe wawanakapaw juchanëjjapjjäna, ukatwa tʼaqesiñajj utjaraki. Uka jucha utjatap laykuw jaqenakajj jaqe masipar tʼaqesiyapjje. Wali uñtʼatäñ munasajja, jupanakkamaw nuwasipjje, guerranakaruw sarapjje, mayninakarus jan walinak lurapjjaraki (Eclesiastés 4:1; 8:9). Maysa toqetjja, “horasajj jan waltʼañajj taqeniruw puri”, ukatwa jaqenakajj tʼaqesipjjaraki (Eclesiastés 9:11). Awisajja jan wali horasana, jan wali lugarana jikjjatasitapatwa jaqenakajj chijirusa jan walinakarusa purtʼasipjjaraki.

9. ¿Diosajj tʼaqesiñas munpachati?

 ⁹ Jehová Diosajj janipuniw tʼaqesiykistaspati. Ukhamajj jan walinak utjatapatsa, guerranak utjatapatsa, jaqenakan jan wali luratanakapatsa janiw Diosar juchañchañasäkiti. Jupajj janiw terremotonakampisa, jachʼa thayanakampisa, inundacionanakampis tʼaqesiykistaspati. Jehová Diosajj walpun munasistu, jupajj janiw tʼaqesiñas munkiti, ukampis jichhürunakan tʼaqesiskaktanwa. Kunatsa tʼaqesiñanakajj utji uka toqetwa jichhajj yatjjatañäni (1 Juan 4:8).

10. ¿Kunjamsa Supayajj Jehová Dios contra saytʼasïna?

¹⁰ Edén jardinanjja, Supayajj Adanampi Evampiruw engañjäna. Diosajj janiw suma apnaqerïkiti, Adanampina Evampin sum jakasipjjañapsa janiw munkiti sasaw Supayajj säna. Diosajj janis suma apnaqerïkaspa, Diosan apnaqatäñajj janis munaskaspa ukhamwa Supayajj Adanampiru Evampirojj amuyayañ munarakïna (Génesis 3:2-5; 27 qhanañchäwi uñjjattʼäta).

11. ¿Kuna jisktʼanakar qhanañchañas wakisi?

¹¹ Adanampi Evampejj janiw Jehová Diosar istʼapkänti, ukhamatwa Dios contra saytʼasipjjäna. Kunatï walïki jan walïkaraki uk amtañatakejj derechonïpkaspas ukhamwa amuyapjjäna. ¿Kunjamsa Diosajj pantjasipjjatap qhanstayaspäna? ¿Kunjamatsa kunatï jiwasatakejj walïki uk Jehová Diosaki yatitapajj qhanstarakispäna?

12, 13. 1) ¿Kunatsa Jehová Diosajj jupar kutkatasirinakarojj ukaratpach jan jiwaykäna? 2) ¿Kunatsa Diosajj aka oraq apnaqañapatakejj Supayar jaytäna? 3) ¿Kunatsa jupanak pachpa apnaqasipjjañapatakejj jaqenakar tiempo churäna?

¹² Jehová Diosajj janiw Adanampiru Evampirojj ukaratpach jiwaykänti. Jan ukasti wawanïpjjañapatakiw jupanakar  jaytäna. Qhepatjja, Adanampina Evampina wawanakapajj khitis apnaqeripäni ukwa ajllipjjañapäna. Jehová Diosajja, aka oraqer jan juchani jaqenakampi phoqantañwa amtäna, uka amtap phoqasiñapatakejj janiw Supayan kunayman luratanakapas jarkʼkaspänti (Génesis 1:28; Isaías 55:10, 11).

¹³ Supayajj walja millón millón angelanak nayraqatanwa Diosarojj kutkatasïna (Job 38:7; Daniel 7:10). Ukhamasti kuntï Supayajj siskäna ukajj cheqänti janicha uk yatisiñapatakiw Jehová Diosajj Supayar tiempo churäna. Jaqenakarus ukhamarakiw tiempo churäna, ukhamat Supayan yanaptʼapampejj jupanak pachpa apnaqasipjjañapataki. Ukhamatakwa kunjamas Diosan jan yanaptʼatajj apnaqasipjjaspa ukajj yatisispäna.

14. ¿Kunas tiempompejj yatisjje?

¹⁴ Walja maranakaw jaqenakajj jupanak pachpa apnaqasjjapjje, ukampis janiw suma jakasiñajj utjkiti. Supayan kʼarïtapajj yatisjjewa. Jaqenakajj Jehová Diosan yanaptʼapampikiw sum jakasipjjaspa. Kuntï Jeremías profetajj siskäna ukajj cheqawa, jupasti sänwa: “[Jehová Dios] Tata, nayajj yattwa jaqejj janiw alaskiti pachpa jakañapjja, janirakiw tukuyäwipsa munañapar apnaqkaspati” sasa (Jeremías 10:23).

15, 16. 1) ¿Kunatsa tʼaqesiñanakajj utjaskakpacha? 2) ¿Kunatsa Diosajj Supayan jan wali luratanakap jan askichki?

¹⁵ ¿Kunatsa tʼaqesiñajj jichhakam utjaskakpacha? ¿Kunatsa Jehová Diosajj jan walinak jan chhaqtayki? Supayan apnaqatajj janiw sum jakasksnati, uk yatisiñapatakiw tiempojj munasïna. Kunayman gobiernonakas jaqenakar apnaqawayapkchejja, inamayakiw sum apnaqañatakejj chʼamachasiwayapjje. Ciencia toqetsa,  tecnología toqetsa nayrarus sartapkchejja, jukʼampikiw jan cheqapar uñjasiñasa, pisin jakasiñasa, jaqenakan jan wali luratanakapasa, guerranakasa utj-jje. Diosan jan yanaptʼatajj janiw jaqenakajj apnaqasksnati.

¹⁶ Jehová Diosajj Supayan jan wali luratanakap janiw jichhürunakan askichkiti. Askichaspa ukhajja, Supayan apnaqäwiparus yanapkaspa ukhamäspawa, Diosajj janiw uk lurkaspati. Maysa toqetjja, Diosatï jan walinak askichaspa ukhajja jupanak pachpajj sumsa apnaqasipkaspa ukham jaqenakajj amuyapjjaspa. Ukampis ukajj kʼariwa, Jehová Diosajj janipuniw ukar yanaptʼkaspati. Diosajj janiw kʼarïkiti (Hebreos 6:18).

17, 18. Supayan jan wali luratanakapampejj ¿kunsa Diosajj lurani?

¹⁷ Supayampina jaqenakampina Dios contra saytʼasipjjatapatjja, kunayman jan walinakaw utjawayi. ¿Jehová Diosajj uka jan walinak askichaspati? Jïsa. Diosatakejj janiw kunas chʼamäkiti. Supayan kʼarïtapas kunapachas sum qhanstjjani uksa Jehová Diosajj yatirakiwa. Ukhamasti niyaw Diosajj aka oraq mä paraisor tukuyjjani, ukhamäñapwa qalltatpach munäna. “Taqe khitinakatï sepulturankapki ukanakajj” jaktanipjjaniwa (Juan 5:28, 29). Usuntañasa jiwañasa janiw utj-jjaniti. Jesusaw Supayan taqe jan wali luratanakap askichjjani. Jesús toqew Jehová Diosajj “Diablon luratanakap” tʼunjani (1 Juan 3:8). Uka uru janïr purinkipanjja, pacienciampiw jupar uñtʼañatakisa, apnaqerisarjam jupar ajlliñatakis suytʼaskistu, ukatwa jupar wal yuspärañasa (2 Pedro 3:9, 10 liytʼañataki). Tʼaqesktan ukhasa Jehová Diosaw aguantañatak yanaptʼistu (Juan 4:23; 1 Corintios 10:13 liytʼañataki).

¹⁸ Jehová Diosajj janiw munkir jan munkir Jupar apnaqerisarjam ajlliñas munkiti. Jupajj kunatï walïki jan  walïkaraki uk jiwas pachpa ajlliri luristu. Jichhajj uka toqet yatjjatañäni.

19. 1) ¿Jaqenakajj kunjam luratätansa? 2) ¿Kunatsa ukham luratätasat Jehová Diosar yuspärañasa?

¹⁹ Jehová Diosajja, kunatï walïki jan walïkaraki uk jiwas pachpa ajllir luristu, animalanakajj janiw ukham luratäpkiti. Jupanakajj janiw kunatï walïki jan walïkaraki uk ajllipkaspati. Ukampis jaqenakajj kunjamsa jakañäni, Diosatakjamat sarnaqañäni janicha ukjja sapa mayni ajllir luratätanwa. Janirakiw maquinanakjam luratäktanti, maquinanakajj maynin apnaqatakiw kunsa lurapjje. Jaqenakajja kunjam jaqëñänisa, khitinakas amigosäni, kunjamsa jakasiñäni uk jiwas pachpaw ajllsna. Diosajj kusisit jakasiñas muni.

20, 21. ¿Kun lurañsa jumajj amtañama?

²⁰ Jehová Diosajj jupar munasiñaswa muni (Mateo 22:37, 38). Amuytʼañataki, mä wawajj awkipar “wal munassma” sasin taqe chuyma jan khitin jariyata siski ukhajja, awkipajj wal kusisi. Jiwasajj ukhamarakiw Jehová Diosar kusisiysna, Jehová Diosajj juparut serviñäni janicha uk jiwaspachpa ajlliñas muni. Supayasa, Adanasa, Evasa, Diosar jan serviñwa ajllipjjäna. Jumasti ¿kunsa luräta?

²¹ Niyakejjay Diosar serviñäniti janicha ukajj jiwasatäjjchejja, Jehová Diosar serviñwa amtañama. Jichhürunakanjja waljaniw Diosatakjam sarnaqañ amtapjje, ukhamatwa Supay contra saytʼasipjje (Proverbios 27:11). Paraíso oraqenjja janiw tʼaqesiñajj utj-jjaniti. ¿Kunsa ukan jakasiñatakejj lurañama? Jutïr yatichäwinwa uka toqet yatjjataskañäni.