Israelitanakajj Sinaí qollut sarjjapjjänwa. Parán sat wasarnam sarasajj Cadés sat lugararuw puripjjäna. Ukanwa Jehová Diosajj Moisesar akham säna: ‘Israelitanakar churkä uka Canaán oraqe uñjiri sarapjjañapatakejj 12 jaqenakar khitam, sapa tributjja mayniru’ sasa. Moisesajj 12 chachanakar ajllisajj akham sänwa: ‘Canaán oraqer sarapjjam, yapunakajj kunjamasa, jaqenakapajj chʼamanit janicha, carpanakanti jan ukajj markanakancha jakapjje ukanak yatinipjjam’ sasa. Ukatwa 12 uñaqerinakajj Canaanar sarapjjäna. Josué, Caleb chachanakas jupanak taypinkarakïnwa.

Uñaqerinakajj 40 urutwa kuttʼanipjjäna. Higonaka, granadanaka, uvanaka apanipjjäna, ukat akham sapjjarakïnwa: ‘Canaán oraqejj suma oraqewa, ukampis jaqenakajj wali chʼamanïpjjewa, markanakapas wali jachʼa perqanakampi muyuntatawa’ sasa. Caleb chachajj akham sänwa: ‘Atipjaskañäniwa. ¡Sarapjjañäni!’ sasa. ¿Kunatsa Caleb chachajj ukham sispachäna? Jupasa Josueasa Jehová Diosaruw confiyapjjäna. Ukampis mayni 10 uñaqerinakajj akham sapjjänwa: ‘Jan sarkañäniti. Ukankir jaqenakajj wali jachʼanakäpjjewa. Jupanak ladonjja jiwasajj tʼiju tʼijur uñtatakïpjjtanwa’ sasa.

Israelitanakajj uka arunak istʼasajj janiw sarañ munjjapjjänti, akham sasaw quejasipjjarakïna: ‘Yaqha irpir uttʼayasiñäni, Egiptor kuttʼjjañäni. Kunarus ukar jiwir sarañäni’ sasa. Josueampi Caleb  chachampejj akham sapjjänwa: ‘Antisas Jehová Diosar istʼañäni. Jupaw jarkʼaqaskistani. Jan ajjsarapjjamti’ sasa. Ukampis israelitanakajj janiw istʼapkänti. Antisakiw jupanakar jiwayañ munapjjäna.

Uk uñjasajj ¿kunsa Jehová Diosajj luräna? Moisesar akham sänwa: ‘Israelitanak laykojj kunayman milagronak lurta, ukhampachas janiw istʼapkituti. Ukhamajj aka wasararuw 40 maranak jaytanuköjja, jiwarapjjañapkama. Jupanakan wawanakapampi Josueampi Calebampikiw Suma Oraqe katoqapjjani’ sasa.