Israelan 10 tribunakaparojj jan wali reyinakaw apnaqapjjäna, maynejj Acab satänwa. Jupajj taqet sipansa jan wali reyïnwa. Baal diosar adoriri Jezabel warmimpiw casarasïna. Acab reyimpi Jezabelampejj waljaniruw Baal diosar adorayapjjäna. Jehová Diosan walja profetanakaparuw jiwarayapjjarakïna. ¿Kunsa Jehová Diosajj lurpachäna? Elías profetaruw mä yatiyäwi Acab reyitak apayäna.

Eliasajj ‘jan wali reyïtamatwa jallojj jan purjjaniti’ sasaw Acab reyir säna. Kimsa mara jilaw yapojj jan achjjänti, jaqenakas manqʼatwa pistʼapjjäna. Qhepatjja Jehová Diosajj wasitat Eliasarojj Acab reyir parlañapatak khitäna. Reyisti Eliasar sänwa: ‘Jumajj problemanakak apantajja. Jallus juchamat jan purkiti’ sasa. Eliasajj sarakïnwa: ‘Janiw juchajäkiti. Antisas Baalar adoratam laykuw ukajj pasaski. Israelitanakarus Baalan profetanakaparus Carmelo qollur tantachthapim. Ukanwa khitis cheqa Diosajj uk yatiñäni’ sasa.

Jaqenakajj Carmelo qollunwa tantachasipjjäna. Eliasajj jupanakar sänwa: ‘¿Kunapachkamas pächasipjjäta? Jehová Diosatï cheqa Diosächejja, jupar arkapjjam. Ukampis Baal diosatï cheqa diosächejja, jupar arkapjjarakim. Jichhaw khitis cheqa Diosajj uk yatiñäni: Baalan 450 profetanakapajj mä ofrenda wakichapjjpan, diosapar artʼasipjjarakpan. Nayajj Jehová Diosatakiw mä ofrenda wakichäjja, juparuw artʼasirakëjja. Kawkïr diosatï ofrendap nakhantaykani ukaw cheqa Diosäni’ sasa. Israelitanakajj ‘walikiw’ sapjjänwa.

Baalan profetanakapajj ofrendap wakichasajj jornalaw ‘¡Baal dios, istʼapjjeta!’ sasin wal arnaqasipjjäna. Baalan jan istʼatapatjja, Eliasajj akham sasaw larusïna: ‘Jukʼamp jachʼat artʼapjjam. Inas ikjchi, sartayañäspawa’ sasa. Jaypʼöjjänwa, Baalan profetanakapajj arnaqasisipkakïnwa, janiw khitis istʼankänti.

Eliasajj mä altararuw ofrendap uchäna. Walja umampi warjjatasajj akham orasïna: ‘Jehová Dios, cheqa Diosätam taqenis yatipjjpan’ sasa. Jehová Diosajj jankʼakiw nina saraqayanisajj ofrendap nakhantayäna. Jaqenakajj ‘¡Jehová Diosaw cheqa Diosajja!’ sasaw artʼapjjäna.  Eliasajj sarakïnwa: ‘Baalan profetanakapajj jan escapapjjpanti’ sasa. Ukürojj Baalan 450 profetanakaparuw jiwarayapjjäna.

Ukatjja qota patjjan mä jiskʼa qenaya uñjasaw Eliasajj Acab reyir akham säna: ‘Jallojj wal purintani. Carromat utamar sarjjam’ sasa. Jankʼakiw qenayajj chʼamakthapinïna, wal thaytʼanisajj jallojj wal purintäna. Ukaruw waña maranakajj tukuyjjäna. Acab reyejj jankʼakiw carropat sarjjäna. Eliasajj Jehová Diosan yanaptʼataw carrot sipansa jukʼamp tʼijüna. Eliasan problemanakapajj janiw ukaruk tukuskänti.