Asirionakajja, reino de Israel sasin uñtʼatäkäna uka 10 tribunakaruw katuntapjjäna. Asirionakan Senaquerib sat reyipajj reino de Judá sasin uñtʼatäkäna uka pä triburuw katuntañ munarakïna. Ukhamajj mayat mayatwa Judá toqenkiri markanakjja katuntañ qalltäna. Cheqanjja Jerusalén markwa jukʼamp katuntañ munäna. Ukampis Jehová Diosaw uka markar jarkʼaqaskäna ukwa Senaquerib reyejj jan yatkänti.

Judá markan Ezequías reyipajja, Jerusalenar jan katuntañapatakejj walja qollqe churäna. Senaquerib reyejj uka qollqe katoqaskchïnsa, Jerusalenar katuntañatakejj jachʼa ejercitopar khitaniskakïnwa. Uka ejerciton jukʼamp jukʼampi jakʼachasinitap uñjasajja, Jerusalén markankirinakajj wal ajjsarapjjäna. Ukatwa Ezequías reyejj akham säna: ‘Jan ajjsarapjjamti. Asirionakajj chʼamanïpkchisa, Jehová Diosajj jupanakat sipansa jukʼamp chʼamaniwa’ sasa.

Senaquerib reyejja Jerusalenankir jaqenakar jiskʼachañatakejj rabsaqué jaqeruw khitäna. Rabsaqué jaqejj marka anqar saytʼasisaw akham sasin arnaqasïna: ‘Jehová Diosajj janiw yanapapkätamti. Jan Ezequiasampejj engañayasipjjamti. Janiw kuna diosas nanakat jarkʼaqapkiristamti’ sasa.

Ezequías reyejja ‘kunsa lurapjjäjjaʼ sasaw Jehová Diosar jisktʼasïna. Diosasti akham sänwa: ‘Rabsaqué jaqen arunakaparojj jan ajjsaramti. Senaqueribajj janiw Jerusalenar katuntkanitiʼ sasa. Qhepatjja Ezequiasajj Senaquerib reyin cartapwa katoqäna, ukansti akham sänwa: ‘Sumatak katuntayasjjapjjam. Jehová Diosajj janiw salvapkiristamti’ sasa. Ezequiasajj Diosaruw akham sasin orasïna: ‘Jehová Dios, mirä amp suma, salvapjjakitaya, ukhamatwa taqenejj juma sapaki cheqpach Diosätam yatipjjani’ sasa. Jehová Diosajj akham sänwa: ‘Asiria markan reyipajj janiw Jerusalenar mantankaniti. Nayaw markajar jarkʼaqaskäjja’ sasa.

 Senaquerib reyejja ‘Jerusalenar niyaw katuntäjja’ sasaw saskäna. Ukampis Jehová Diosajj mä arumaw asirionakan campamentopar mä ángel khitäna. ¡Uka angelajj 185.000 soldadonakaruw jiwarayäna! Wali chʼaman soldadonakapajj qʼala jiwaratäjjänwa, ukatwa atipjatäsajj Senaquerib reyejj utapar sarjjäna. Ukhamatwa Jehová Diosajj Ezequías reyirusa Jerusalén markarusa promesaparjam jarkʼaqäna. Jumajj Jerusalén markankasmäna ukhajja, ¿Jehová Diosar confiyasmänti?