Munat liytʼirinaka:

Jehová Diosar servirinakajja, Bibliar wal munastanjja. Biblian yatichäwinakapajj cheqapawa, ewjjtʼanakapas sum jakasiñatakiw yanaptʼistu, qhawqsa Jehová Diosajj jaqenakar munasi uksa qhanañcharakistuwa (Salmo 119:105; Lucas 1:3; 1 Juan 4:19). Nanakajja Diosan Arupan utjki uka suma yatichäwinak mayninakan yateqapjjañapwa wal munapjjta. Uka amtampiw Biblian yatichäwinakapa yateqañäni sat libro wali kusisit apayanipjjsma. Aka librojj kunjamasa uk mä qhawqha qhanañchtʼapjjäma.

Aka librojj wawanakar yatichañatak luratawa. Ukampis Bibliat jukʼamp yateqañ muniri jilïr jaqenakarus yanaptʼarakispawa. Niyakejjay Bibliajj taqenitakïchejja, kuna suma yatichäwinakas Biblian utji uk amtañajj taqeniruw kusisita sum jakasiñatak yanaptʼistani.

Diosajj jaqer lurkäna ukat aksarojj kunjamsa jaqenakajj jakapjjäna ukanakatwa aka librojj Bibliarjam yatichistu. Akan utjki uka yatichäwinakajja, taqenitakis facilakïspa qhanäspa ukatakiw chʼamachasipjjta. Kunas nayraqat pasäna, kunas ukjjar pasarakïna ukarjam lurañatakiw chʼamachasipjjarakta.

Ukampis aka librojj janiw Bibliat aleqaki cuentkiti, jan ukasti jaqenakajj kunjam chuymanïpjjänsa, kunanaksa lurapjjäna ukanak jiwas pachpas uñjksna ukham amuyañasatak qellqatawa, dibujonakas ukatakiw yanaptʼarakistu.

Biblianjja khitinakas Jehová Diosar istʼapjjäna, khitinakas jan istʼapkarakïna ukanakatwa parli. Aka librojj ukanak sum amuyañataki, ukhamarak kunanaksa uka jaqenakat yateqsna ukanak amuyañatakiw yanaptʼistu (Romanos 15:4; 1 Corintios 10:6). Aka qellqatajj 14 seccionar jaljatawa. Sapa sección qalltanjja, mä qhawqha arunakampiw kunanaksa uka seccionan yateqsna ukajj qhanañchasi.

 Jumatï wawanïstajja, mä yatichäwi liytʼasajj dibujonakatwa wawamampi parltʼapjjasma. Ukjjarojj kawkïr textonakat apstʼatasa ukwa Bibliat liytʼapjjarakisma. Wawamarojja aka libron utji uka yatichäwinakajj Bibliat apstʼatätap amuyañapatakiw yanaptʼañama. Mä jilïr jaqerojja, ukhamarakiw Biblian yatichäwinakap amuytʼañapatakejj yanaptʼasirakispa.

Suma chuyman wawanakasa jilïrinakasa Bibliat yateqapjjaspa, ukan utjki uka yatichäwinakarjam sarnaqapjjarakispa ukwa munapjjta, ukatwa yanaptʼañatakejj aka libro qellqanipjjta. Ukhamat suma chuymani jaqenakajj Jehová Diosar adorapjjañapataki, ukhamarak Diosan munat familiap taypinkapjjañapataki.