UÑTAM aka thujrux panqaraskiwa, wali suma puqut almendra achunakaniwa. Aaronan thujrupawa. ¡Mä arumakiw panqarsutayna achuqarakitayna! ¿Kunatsa? Uk yatxatañäni.

Israelitanakax walja maranakaw wasaran sarnaqxapxäna. Yaqhipaxa, janiw Moisesax pʼiqtʼañapäkiti, ni Aarón jilapas jilïr sacerdoteñapäkiti sasaw sapxäna. Maynïrix Coré satänwa, Datán, Abiram sat tatanakasa ukat 250 pʼiqtʼirinakasa ukham amuyapxarakïna. Moisesar sartʼasinxa akham sapxänwa: ‘¿Kunatsa jumax mayninakxar mä jilïrïkasmas ukham tukta?’ sasa.

Moisesasti Corempi arkirinakapampirux akham sänwa: ‘Qharüru alwasti nina sankʼa apnaqañ aptasipxäta ukat incienso uchapxäta. Yupaychañ utar jutapxäta, ukanwa khitirus Diosax ajllini ukxa uñjañäni’ sasa.

Qhipürusti Corempi arkirinakapampixa yupaychañ utaruw sarapxäna. Ukat waljaniw jupanakamp chik saytʼasiñatak sarapxarakïna. Jehová Diosax wal colerasïna. Ukäñkamasti Moisesax akham sänwa: ‘Jithiqtapxam aka juchan jan wali jaqinakan carpanakapatxa. Janirak kunanakapsa llamktʼapxamti’ sasa. Jaqinakax iyaw sasaw Coré, Datán, Abiram sat tatanakan carpanakapatxa jithiqtapxäna.

Ukat Moisesax akham sänwa: ‘Jehová Diosax khitirutï ajllkani ukxa jichhaw yatipxäta. Aka jan wali jaqinakarux uraqiw ansatatasin manqʼantani’ sasa.

Moisesax parlañ tukuyäna ukapachaw uraqix ansatatäna. Ukat Coré, Datán, Abiram sat tatanakan carpanakapasa ukat uka carpankkäna ukanakasa uraq manqharuw jalantäna ukat uraqix jistʼantasxänwa. Uraq manqhar jalantaskirinakan wararitap istʼasaxa jaqinakax akham sasaw wararipxäna: ‘¡Tʼijtxapxañäni! ¡Jiwasar manqʼantarakistaspawa!’ sasa.

Ukat Corempi 250 arkirinakapampixa yupaychañ uta nayräxapankasipkänwa. Ukatwa Jehová Diosax nin apayanïna, ukat phichantäna. Ukat Jehová Diosax Aaronan Eleazar yupaqaruw akham säna, jiwatanakan nina sankʼa apnaqañanakap aptanma, ukat ukanak umatatayasin altarar muyuntayañatak luram sasa. Aaronampi yuqanakapampikiw sacerdotepxaspa uk israelitanakar amtayañatakiw altararux ukampi muyuntayäna.

Aaronampi yuqanakapampikiwa sacerdotepxaspa ukwa Jehová Diosax sum qhanañchañ munäna. Ukatwa Moisesar akham säna: ‘Sapaqat tribun jilïrinakapax thujrunakap apanpan sama. Leví tributxa, Aaronaw thujrup apaniñapa. Ukat Diosampi arustʼäwir mantat arka uñkatasiruw thujrunakap uchäta. Khitixay sacerdotjam ajllitächi ukan thujrupaw panqarani’ sasa.

Qhipärmanthiw Moisesax uñanti, ¡Aaronan thujrupaw panqaratayna, almendras puquratayna! Ukhamaxa, ¿kunatsa Jehová Diosax Aaronan thujrup panqarayäna?