MOISESAX israelitanakamp chika Canaanar mantañwa munäna. Ukatwa akham säna: ‘Jehová Dios tata, Jordán jawirxa makattʼayakitaya, nayasti suma uraq uñjañ munta’ sasa. Ukampis Jehová Diosax akham sänwa: ‘¡Jan jukʼamp uka tuqit parlistati!’ sasa. ¿Jehová Diosax kunatsa ukham sispachäna?

Amtañäni: Qullu qarqar Moisesax jawqʼatatkän ukhaxa, Moisesampi Aaronampix janiw Jehová Diosar jachʼañchapkänti. ‘Jehová Diosaw um apsu’ sasax janiw Israelitanakarux sapkänti. Ukatwa Jehová Diosax Moisesampiru Aaronampirux janiw Canaanarux mantapkätati sasax sänxa.

Aaronan jiwatapat mä qhawqha phaxsi saraqataruxa, Jehová Diosax Moisesar akham sänwa: ‘Eleazar sat sacerdote nayraqataru ukhamarak markpach nayraqataru Josuer irpma. Taqi jupanakarux Josué tataw jichhax pʼiqtʼxani sas yatiyam’ sasa. Moisesax Jehová Diosan aruparjamaw luräna, kunjamtï akan uñjaski ukhama.

Ukat Jehová Diosax Josué tatar akham sänwa: ‘Chʼamachtʼasma, jan axsaramti. Jumaw israelitanakar puriyäta, kawkïr uraqtï churä siskta ukaru, nayarakiw jumampiskäxa’ sasa.

Uka qhipatxa, Jehová Diosax Moab uraqin Nebo sat qullupar makatam sänwa Moisesaruxa. Uka patatpachwa Moisesax Jordán jawir khurkat Canaán suma uraqi uñjäna. Jehová Diosax akham sänwa: ‘Abrahaman Isaacan Jacobun wawanakapar churä sas arskayäta uka uraqix akawa. Nayaw kikpa nayranakamampi uñjañam munta, ukampis janiw ukarux mantkätati’ sasa.

120 maraniw Nebo qullu patan Moisesax jiwxäna. Chʼamanïskänwa, nayrapas sum uñjaskäna. Taqiniw chuym chʼallxtayasipxäna, ukat wal Moisesatjam jachapxäna. Ukampis Josué machaq pʼiqtʼiriw utjxäna, ukaw chuyma qhanartayäna.