AKA yuqall wawax suma uñnaqtʼanirakisä. Samuel satawa. Samuelur luqxataski uka tataxa Israelankir jilïr sacerdotewa, Elí satawa. Uka wawaru irpkatasipki ukanakaxa Elcana tatapampi Ana mamapampiwa.

Samuelux niya phisqa maranikïskiwa. Jehová Diosar yupaychañ utanwa Elimpi ukat mayni sacerdotenakampi jakasini. ¿Kunatsa Elcanampi Anampixa uka wawa irpanipxpacha Jehová Diosar uka utana luqtañapatakixa? Uk yatxatañäni.

Nayrasti Anax wal llakisïna jan wawanïsaxa, wawanïñ wal munäna. Ukat mä uruxa, yupaychañ utaruw saräna, ukat akham sasaw maytʼasïna: ‘¡Ay, Jehová Diosa tata, nayat amtasitaya! Mä wawa churitätaxa, nayasti uka wawa jumar luqtañapatakiw churäma’ sasa.

Jehová Diosaxa istʼataynawa Anan mayisïwipxa, mä qhawqha tiempotxa Anasti Samuel wawanïxänwa. Anax wal wawapar munasïna, jiskʼatpach Jehová Diosat yatichäna. ‘Aka wawax jilsxani ukhaxa Jehová Diosar churxañatakiw irpxä’ sasaw Anaxa chachaparu satayna.

Ukwa Anampi Elcanampixa aka uñkatasin lurasipki. Awk taykapaxa wali sum Samueluru yatichapxatayna, ukatwa Jehová Diosan utaparux yupaychiri wali kusisita saränxa. Sapa maraw tatapas mamapas uka utaru sarapxirïna Diosar yupaychañataki ukhamaraki wawapar tumptʼañataki. Sapa marawa Anaxa Samuelutaki jan amparani machaq isi aparapirïna.

Walja maranakawa Jehová Diosar luqtxäna. Ukat Jehová Diosansa jaqinakansa wali munatänwa. Ukampisa Ofni ukat Finees sata Elí jilïr sacerdoten pä yuqanakapaxa jan wali jaqinakänwa. Jan walinakwa lurapxäna, Diosatsa jaqinakarux jithiqtayapxänwa. Elixa sacerdotïñatxa apaqxañapänwa, ukampisa janiw apaqkänti.

Samuelux jan walinak paskipansa Jehová Diosaru yupaychañ utan luqtaskakïnwa, janiw jithiqtkänti. Walja tiempowa jaqinakampi Jehová Diosax jan parlxänti, kunattix jukʼanikiwa Diosar munasipxäna. Samueluxa mä jukʼampi jiltxi ukhaxa akaw pasäna:

Samueluxa tabernáculo sat yupaychañ utan ikiskäna ukhaw mä arux sartayäna. Jupax ‘¡akankasktwa!’ sasaw sarthapisin Elí ukaru jankʼaki saräna, ‘akax juttwa, ¿jawsistati?’ sasa.

‘Janiw nayax jawsksmati, ikiñamar sarxam’ sasaw Elix sarakïna. Ukhamasti iyaw sasaw Samuelux ikintxäna.

Wasitampwa ‘¡Samuel!’ siri istʼäna, ukat Elí ukaruw sararakikïna: ‘Akax juttwa. ¿Jawsistati?’ sasa. Ukat Elixa ‘janiw nayax jawsksmati, wawa. Ikiñamar sarxam’ sarakikïnwa. Ukhamasti iyaw sasaw Samuelux ikintxarakïna.

‘¡Samuel!’ siri istʼarakikïnwa, ukampix kimsa kutïxänwa. Samuelux sartasin Elí ukarurakikiw saräna. ‘Akax juttwa. ¿Kunatakis jawsista? Jichhax jumapunïpachätaw’ sasa. Elix Jehová Diosätap amuytʼasïna. Ukatwa Samuelur akham säna: ‘Jichhax ikiñamar sarxma, mayampi jawsanïtamxa akham säta: “Parlaskakim Jehová Dios tata, istʼasksmawa” sasa’.

Mayampi Jehová Diosax jawsanïn ukhaxa ukham säna. Ukat Jehová Diosaxa Elimpi yuqanakapampiruw castigäxa sasaw Samuelur yatiyäna. Mä qhawqha urutxa Ofnimpi Fineempixa filisteonakampi nuwasiriw sarapxäna, ukanwa jiwxapxäna, uk yatisasti Elix jaqusisin kunk qʼiwsusïna, ukhamaw jiwxäna. Ukham Jehová Diosan arunakapaxa phuqasïna.

Samuelux jilsxasinxa Israel markan qhip qhip taripiripäxänwa, janiw ukat yaqhax utjxänti. Chuymanïxän ukhaxa, israelitanakax akham sapxänwa: ‘Mä apnaqir churapxita marka apnaqañapataki’ sasa. Ukat Samuelux janiw munkänti, kunattix Jehová Diosaw jupanakan apnaqiripänxa. Ukampis Jehová Diosax markar istʼam sänwa.