¿KAMSASKPACHAS aka luluxa? Jehová Diosan Eliseo profetapat uka mamar yatiyaski, ukhamarak kunanaksa Jehová Diosan yanaptʼapampix luratayna ukanakata. Uka mamax janiw israelitäkiti, janiw Jehová Dios tuqit yatkiti. Kunatarak uka lulusti uka warmin utapankpachasti uk yatxatañäni.

Siriankir mamawa. Chachapax Naamán satawa, Siria soldadonakan pʼiqtʼiripawa. Siriankirinakaw aka lulurux markapar apapxatayna, ukat Naamanan warmipatakiw ukan irnaqaskäna.

Naamanax lepra sat ñanqha usunïnwa. Ukham usut jaqin janchipax ñusantiwa. Akham sasaw uka lulux saski: ‘Uywirijatï Jehová Diosan profetaparu uñjiri saraspaxa, profetax lepra usupatxa qullaspawa’ sasa. Ukaxa Naamanaruw yatiyasïna.

Naamanax qullasiñ munasax Israel markaruw saräna. Israelar purisax Eliseon utaparuw saräna. Ukat Eliseox utapatxa uywatap khitsunïna akham sasa, Naamanax Jordán jawirar sarpan ukat paqallq kuti jariqasinpan sasa. Ukham satax Naamanax wal colerasïna: ‘¡Israelan jawiranakapat sipansa markajanwa suma jawiranakax utji!’ sasa. Uk sasin sarxäna.

Ukampis mä uywatapaw akham säna: ‘Tata, chʼama lurañ Eliseox waytʼiristamxa, lurasmawa. Jariqasim sakiraktamsä, iyawsamaya’ sasa. Naamanax uywatapar istʼasaw Jordán jawirar paqallq kuti chhaqantäna. ¡Ukham luräna ukhaxa jañchipax kʼumaräxänwa!

Naamanax wal kusisïna. Ukat Eliseon utaparuw kuttʼäna akham sasa: ‘Jichhaw yatxta, aka uraqpachanxa janiw Israel markan Diosapjam yaqha diosax utjkiti. Mirä, aka waxtʼay katuqtʼasita’ sasa. Ukampis Eliseox ‘janiwa, janiw katuqkirismati’ sasaw säna. Eliseox chuymapanxa sänwa, janiw walïkaspati waxtʼa katuqasiñaxa janixay nayax qullkstixa, Jehová Diosaxay qullchixa sasa. Ukampis Giezi sat uywatapaw uka waxtʼa katuntasiñ munäna.

Ukhamasti akham luräna. Naamanax sarxänwa, ukaruw Giezi Eliseon uywatapax akham sasa arkxatäna: ‘Tumptʼirinakaw jutapxatayna ukat Eliseo uywirijax khitanitu mä qhawqha waxtʼa katuqtʼanïta’ sasa. Ukax kʼarïnwa. Ukampis Naamanax janiw yatkänti, ukhamasti iyaw sasaw mä qhawqha churäna.

Giezi tatax kuttʼanxäna ukhaxa, Eliseox yatxänwa kuns luräna ukxa. Jehová Diosaw juparux yatiyxäna. Ukatwa akham säna: ‘Kunatsa ukham lurtaxa, jichhax Naamanan usupax jumaruw katuntätamxa’ sasa. ¡Ukaratpachaw usuntxäna!

¿Aka sarnaqäwitxa kuns yatiqsna? Nayraqatxa, uka luljamäñasawa, Jehová Diosat parlañasawa, ukax wali askiwa. Yaqha yatichäwix akarakïspawa, janiw Naamanjam jachʼa jachʼa tukuñasäkiti, jan ukasti Jehová Diosan markap irpirinakarux istʼapxañasawa. Ukatxa, janiw Giezi tatjam kʼarisiñasäkiti. Ukhamasti Bibliat wal yatiqsnaxa, ¿janichä?