UKA utat Jesusampi apostolanakapampi mistusaxa, Getsemaní sat huertaruw sarapxäna. Walja kutiw nayrax uka huertarux sarapxirïna. Ukatxa, janiw ikipxätati Diosat mayipxam sasaw Jesusax säna, ukat jaya chiqaruw saräna, uraqir altʼasaw ukan Diosat mayisïna.

Ukat apostolanakapar uñjiriw kuttʼanïna. ¿Kamachasipkpachänsa? ¡Ikirasipkänwa! Kimsa kutiw Jesusax säna janiw ikipxañamäkit sasa, ukat sapa kutiw ikiraskir katjäna. ‘¿Kamisarak akham horasansti ikirapxätasti?’ sasaw Jesusax säna. ‘Uñisirinakajampi katuntatäñ horasax purinxiwa’ sasa.

Ukat ukaratpachaw walja jaqinakan jutatapax istʼasïna. ¡Uñtma! ¡Espadas lawas aptʼasitaw jaqinakax jutapxäna! Ukat ninampi qhantʼayasaw jutapxäna. Ukat jakʼachasinipxäna ukhaxa, mä jaqiw uka jaqinak taypit mistunïna ukat Jesusaruw jakʼachasïna. Ukat ajanutwa jampʼattʼäna, kunjamtï akan uñjasiski ukhama. ¡Uka jaqix Judas Iscariotïnwa! ¿Kunatsa Jesusar jampʼattʼpachäna?

‘Judas, ¿jampʼattʼasati aljantista?’ sasaw Jesusax jisktʼäna. Jïsa, Judasax jampʼattʼasaw Jesusax khitis ukxa uñachtʼayäna. Ukatwa uñisirinakapax Jesusarux katuntapxäna. Ukampis Pedrox janiw ukhamaki Jesusar katuntaykänti, jan ukax nuwasïnwa. Apankän uka espadampiw jakʼapankaskir mä jaqirux jawqʼatatäna. Jiñchu khuchuqäna. Ukampis Jesusax jiñchut llamktʼasaw uka jaqin jiñchup qullxäna.

Jesusax Pedrorux akham sänwa: ‘Espadxa imañapar uchma. ¿Janit yatkta nayatï muniristxa Awkijat waranq waranqa angelanak qhispiñatak mayiristxa?’ sasa. ¡Jïsa, mayispawa! Ukampis janiw Diosar angelanak maykänti, kunattix uñisirinakapan katuntatäñ tiempon purinitapxa yatisxänwa. Janiw kuns lurkänti, ukhamakiw apayasïna. Ukat kamachapxänsa uk yatxataskakiñäni.