PEDROMPI Juanampix Jesusan sepulturapat mistunxapxäna ukhaxa, Mariax sapakiw qhiparäna. Ukatwa jachäna. ¡Ukat sepulturar uñantasinwa pä angelanak uñjäna! Jupanakasti akham sasaw jisktʼapxäna: ‘¿Kunats jachaskta?’ sasa.

‘Jesusan amayap apasxapxatayna, janiw yatkti kawkir apapxatapsa’ sasaw Mariax säna. Ukat qhip uñtasax mä jaq uñjäna. Uka jaqix akham sasaw jisktʼäna: ‘¿Khitirus thaqta?’ sasa.

Huerto uñjirïpachacha, jupach Jesusan amayap apaspacha sasaw chuymapan Mariax säna. Ukatwa akham säna: ‘Jumatï apsta ukax yatiyita kawkirus apta’ sasa. Ukampis uka jaqix Jesusänwa. Jesusax yaqha cuerponïnwa ukatwa Mariax jan uñtʼkänti. Ukampis kunapachatï Jesusax sutipat Mariar jawskäna ukhaw Jesusätapxa amuyäna. Ukat arkir masinakapar yatiyiriw jupax tʼijüna: ‘¡Jesusaruw uñjta!’ sasa.

Ukat uka uruw pä arkirinakapax Emaús sat markar sarasipkäna, ukat mä jaqiw jupanakampi chiktʼäna. Jesusan jiwatapat wali llakitäsipkänwa. Ukampis sarasipkäna ukhaw uka jaqix Bibliat sum qhanañchäna ukat chuymsa qhanartayänwa. Ukat manqʼañatak samartʼapxäna ukhaw uka pä arkirinakapax uka jaqin Jesusätapxa amuyapxäna. Jesusax chhaqtxänwa, jupanakasti Jerusalenaruw kuttʼanipxäna apostolanakar yatiyiri.

Ukäñkamasti, Pedrorurakiw Jesusax uñstäna. Mayni apostolanakax uka tuqit istʼasax wal kusisipxäna. Ukat uka pä arkirinakapax Jerusalenaruw purintanipxarakïna ukat apostolanakampiwa parlapxäna. Jesusaruw thakin uñjapxta sasa. Uk yatiyasipkäna ukhaxa, ¿kunas pasän uk yattati?

Akan uñxatma. Punkunakas jistʼantataskchïnsa Jesusax uka utanwa uñstäna. ¡Wali kusiskañapunïnwa arkirinakapatakixa! ¡Wali kʼuchiskañ urupunïpachänwa! ¿Qhawqha kutis Jesusax uñstäna uk jaktʼasmati? ¿Phisqa kutiti?

Jesusar uñjapkän ukhax Tomás sat apostolax janiw ukankkänti. Ukatwa, Jesusan arkirinakapax Tomasir akham sapxäna: ‘¡Jesusaruw uñjapxta!’ sasa. Ukampis Tomasix uñjä ukhaw chiqaw säxa sänwa. Kimsaqallq uruw saraqxäna, ukhaw wasitampi Jesusan arkirinakapax jistʼantat uta manqhankasipkäna, Tomasix ukankaskarakïnwa. Akatjamatwa, ukan Jesusax uñstarakïna. Tomasix ukhaw chiqaw sisxänxa.