¡UÑTAM uka jachʼa botex umaruw jalantaski! ¡Allitattaskiwa! ¿Jachʼa botet umar saraqxapxatayna uka jaqinak uñjtati? Yaqhipanakax quta lakaruw makatanisipki. ¿Pablox ukankarakiti? Kunas pasatayna uk yatxatañäni.

Amtañäni, pä maraw Pablox Cesarea carcelankäna. Ukatxa Pablompi ukat ukham yaqha katuntatanakampwa Roma markar jachʼa botet apasipkäna. Niya Creta isla jakʼanxäna ukhaxa, mä jachʼa thayaw sartäna. Janiw uka jachʼa boterux chiqapar apañjamäxänti. Janiw Intis uñasxänti, arumas janiw warawaranakas uñasxänti. Walja urunakaw pasxäna, ukat uka botenkirinakaxa jiwarxañäniw sapxänwa.

Ukat Pablow saytʼasin akham säna: ‘Janiw khitis jiwkaniti; barco mayakiw chhaqxäni. Arumax Diosan angelapaw nayar akham yatiyir jutatayna: “¡Pablo, jan axsaramti! Jumax Romankir Cesaran nayraqatapar puriñamawa. Ukat Diosaw jumamp chik saraskirinakarux qhispiyaskani”’ sasa.

¡Jachʼa thaya qalltkäna uka urut pä semanaw pasxäna, ukat chika arumaw amuyapxäna qutax jan sinti manqhäxatapa! Ukat chʼamakan jan kuna qarqar muqintañapatakixa, anclanak jaquntapxäna bote saytʼayañataki. Ukat qhantatix mä isla uñjapxäna. Ukat mä jukʼampwa quta lakar bote aptʼanipxäna.

Ukat quta lakar jakʼachasinipkäna ukhaxa, jachʼa botex chʼallaruw purïna. Ukatxa umaw thayampi sartasin jachʼa boter tʼunantxäna. Ukat soldadonakan pʼiqtʼiripaxa akham sänwa: ‘Khitinakatix uman tuyuñ yatipki ukanakax islar mistxapxma, mayninakax umar thuquntasin tablanakxat mistxapxarakim’ sasa. Ukhamwa lurapxäna, ukat jachʼa botenxa 276 jaqinakaw utjäna, taqiniw quta lakar mistxapxäna, kunjamtï angelax siskatayna ukhama.

Uka islax Malta satänwa. Uka islankirinakax suma jaqinakäpxänwa, ukatwa jachʼa botet saraqirinakarux yanaptʼapxäna. Ukat suma pachäxäna ukhawa, yaqha jachʼa botet Pablorux Roma markar apxapxäna.