1, 2. ¿Kuna muspharkañanaksa Eliasajj mä urunak uñjäna?

JALLOJJ wal purintaskäna ukat alajjpachas qʼala qenayrantatänwa, ukhampachaw Elías profetajj wal tʼijuskäna. Ukat Jezreel markar puriñatakejj jaypachaskänwa. Eliasajj awkiptatäkchïnsa, janiw tʼijkasajj qarkänti. ¡Jehová Diosaw “chʼam churäna”! Nayrajj janipuniw ukham wali chʼaman jikjjatasirïkänti. Ukat Acab reyin carrop jiytʼiri caballonakaparus atipawayänwa (1 Reyes 18:46 liytʼasiñapawa).

² Eliasajj sapakiw tʼijuskäna ukat jaya sarañaskänwa. Ukham tʼijkipansti jallojj wal chʼarantʼäna. Ukat kunas uka urojj pasäna uka toqetwa lupʼiskpachäna, ukajj jan armkañapunïnwa. Carmelo sat qollojj jayankjjatapat janiw uñjasjjänti. Uka qollunwa Jehová Diosajj Baal diosan yupaychäwip wal jiskʼachäna. Walja kʼari profetanakaw jan wali luräwinakapat qhanstayatäsin jiwarayat uñjasipjjäna. Taqe ukanakajj Jehová Diosatakisa ukat cheqa yupaychäwitakisa mä atipjäwipunïnwa. Ukat Eliasajj machʼa tukusiñapatakiw Diosar achiktʼasïna, kimsa mara chikataw jallojj jan purjjänti. ¡Ukham achiktʼasitapatjja jallojj wal purintäna! (1 Rey. 18:18-45.)

3, 4. 1) ¿Kunatsa taqe kunas walikëjjaniwa sasin Eliasajj amuypachäna? 2) ¿Kuna jisktʼanakarus qhanañchtʼaskañäni?

³ Jezreel markar puriñataki, 30 kilometronak jallun tʼijkasajja, “taqe kunas walikëjjäniw” sasaw Eliasajj amuypachäna. ¡Acab reyejj janiw nayrjamäñapäjjänti! Kunatï Carmelo qollun paskäna uk uñjasajj janiw Baal diosapar yupaychjjañapäjjänti, Jezabel warmiparus cheqañchañapänwa ukat janirakiw Jehová Diosan yupaychirinakaparus arknaqjjañapäjjänti.

⁴ Taqe kunas walikëjje ukhajja, “janiw kunas pasjjaniti” sasin amuyañjamawa. Ukat “taqe kunas walikëjjaniwa, jan waltʼäwinakas janiw utjjaniti” sasaw amuyaraksna. Eliasajj ukhamarakwa amuypachäna, jupajj “jiwasjam jaqekirakïnwa” (Sant. 5:17). Ukampis Eliasatakejj jan waltʼäwinakajj utjaskakiñapänwa. Mä qawqha tiempotjja, wal ajjsarayasïna ukat llakimp aynachtʼataw jikjjatasirakïna, jiwañakwa munjjäna. ¿Kunas pasäna? ¿Kunsa Jehová Diosajj Eliasar chʼamañchtʼañataki ukat jan ajjsarañapatak luräna?

5. Carmelo sat qollun muspharkañ luräwinak uñjasasa, ¿kunatsa Acab reyejj janiw Jehová Diosar respetkänti sasajj sissna?

⁵ Acab reyejj palaciopar purïna ukhajja, ¿suma jaqëjjatap uñachtʼaypachänti? Bibliajj akham siwa: “Acab reyejj yatiyänwa Jezabel warmiru taqe kuntï Eliasajj lurkäna ukanaka, ukhamarak kunjamtï kharinukuykatayna Baal diosan taqe profetanakaparu ukanakaraki” sasa (1 Rey. 19:1). Taqe ukanak yatiyasajj Acab reyejj janiw Jehová Diosan sutip aytkänti. Jupajj janiw kunjamtï Diosajj amuykäna ukham amuykänti, taqe uka milagronak Elías profetakis lurkaspäna ukhamwa parläna. Ukhamajj janiw Jehová Diosar respetañ yateqkänti, ¿kunsa Jezabel qhoru warmipajj lurpachäna?

6. ¿Kuna yatiyäwsa Jezabelajj Eliasar apayäna, ukat kamsañs munäna?

⁶ Jezabel reinajj wal colerasïna. Ukatwa Eliasar ak yatiyäna: ‘Diosanakajj nayarojj walipuni mutuyitpan, qharürojj janitejj aka pachpa horasaru jumar lurkarakïma, kunjamtï uka profetanakampi lurktajja ukhama’ sasa (1 Rey. 19:2). Ukham sasaw Jezabelajj Eliasar jiwayañatak mä juramentomp arsüna, mä arunjja, “jichhürutï Baal profetanakar jiwarayatamat jan jiwaykarakïma ukhajja, nä pachpaw jiwä” sasaw Eliasar sañ munäna. Uk yatisajj wali llakitaw Eliasajj jikjjataspachäna. Uka arumajj wal jallojj purintaskäna, ukat Eliasajj mä jiskʼa utanwa ikiskäna. Ukampis akatjamat sartayasaw Jezabelan yatiyiripajj kuntï reinajj arskäna uk yatiyäna. ¿Uk istʼasajj kunjamsa Eliasajj jikjjataspachäna?

7. Jezabelan arsutap istʼasajja, ¿kunjamakis Eliasajj jikjjataspachäna, ukat kunsa luräna?

⁷ Baal diosar yupaychañajj tukusjjaniw sasaw Eliasajj amuypachäna, ukampis Jezabelan yatiyäwip istʼasaw jan ukhamätap amuyarakpachäna. Jezabel warmejj janiw ukhamak qheparkänti. Jupajj Jehová Diosan walja profetanakaparuw jiwarayäna, jichhajj Eliasaruw jiwayañ munarakïna. Uk yatisajj ‘Eliasajj ajjsaränwa’ sasaw Bibliajj qhanañchi. “Kunakis pasitani” sasaw wal lupʼpachäna, ukat kunjamsa Jezabelajj jiwayani ukjja niyas uñjkaspa ukhamwa amuypachäna, ukatwa wal ajjsarayaspachäna. Ukat ‘jakañap qhespiyasiñatakiw jaltjjäna’ (1 Rey. 18:4; 19:3, NM).

8. 1) ¿Kunansa apóstol Pedrojj Elías profetjamarakïna? 2) ¿Kunsa Eliasan ukat Pedron sarnaqäwinakapat yateqassna?

⁸ Diosan yupaychirinakapatjja, janiw Eliasakejj ukham ajjsarayaskänti. Walja maranak qhepatjja, ukhamarakiw Apóstol Pedrojj ajjsarayasïna. Jesusajj uma patnam sarnaqañapatak jawsäna ukhajja, ‘sarkasaw thayajj wal thaytʼasinkatap amuyasïna, ukatwa ajjsarañat  umar chhaqarantäna’ (Mateo 14:30 liytʼasiñapawa). ¿Kunsa Eliasan ukat Pedron sarnaqäwinakapat yateqassna? Jan ajjsarañatakejja, kuna jan walinakatï paskistaspa ukanakat janiw añch lupʼiñasäkiti. Jan ukasti, khititï yanaptʼkistaspa ukat chʼam churkistaspa, Juparuw taqe chuym atinisiñasa.

9. ¿Kunjamsa Eliasajj jaltawayjjäna, ukat kunjamas jikjjatasïna?

⁹ Ukham ajjsarasajja, 150 kilometronakwa Inti jalanta aynach toqer Eliasajj jaltjjäna, Beer-seba markar puriñkama, uka markajj Judá marka qorpa jakʼankiwa. Serviripar uka cheqar jaytawayasaw jupa sapak wasar pampnam sarawayjjäna. ‘Mä uru jornalaw saräna’ sasaw Bibliajj qhanañchi. Qhantati alwa horasaruw mistpachäna ukat janjamakiw manqtʼasiñatak kuns apaskänti. Ajjsartʼasa, llakimp wali aynachtʼata ukat lupin lupjataw wasar chʼalla pampnam saraskpachäna. Intejj jalantirjamäjjäna ukhajja, Eliasajj jan chʼamaniw jikjjatasïna. Ukham wali qarita uñjasisajj “mä retama ali thiyaruw qontʼasïna”, janiw yaqha cheqajj samartʼañatak uka wasar oraqen utjkänti (1 Rey. 19:4).

10, 11. 1) ¿Kunsa Eliasajj Diosar säna? 2) Biblian jiskʼa tʼaqanakaparjamajja, ¿kunjamsa Diosan yaqhep yupaychirinakapajj jikjjatasipjjäna?

¹⁰ Wali llakit jikjjatasisajja, “jakañajj apaqjjeta, nayajj janiw añcha sumäkti awkinakajjata sipana” sasaw Jehová Diosar artʼasïna. Nayra awkinakapajj laqʼar tukutäjjapjjänwa ukat janiw khitirus yanaptʼirjamäpkänti, uk sumwa Eliasajj yatïna (Ecl. 9:10). Ukat jupanakjamas jan kunatak askïkaspa ukhamwa jupajj amuyasïna. Ukatwa akham sispachäna: Kunatakirak jakaskakisti, “¡ukkhakëjjpan Tata!” sasa.

¹¹ “¡Kamisarak Jehová Diosan taqe chuyma serviripajj llakimp aynachtʼat jikjjatasinisti!” sasin amuyañajj janiw walïkaspati. Eliasjam wali llakita ukat jiwañ muniri chachanakatsa ukat warminakatsa Bibliajj parlarakiwa, sañäni, Rebeca, Jacob, Moisés ukat Job (Gén. 25:22; 37:35; Núm. 11:13-15; Job 14:13).

12. Llakimpi aynachtʼat uñjasiñäni ukhajja, ¿kunsa Eliasat yateqassna?

¹² Jichhürunakanjja, ‘jan wali tiemponakanwa’ jaktanjja, ukatwa jaqenakajj llakimp aynachtʼatäpjje ukat Jehová Diosan yupaychirinakapas ukhamanwa uñjasipjjarakispa (2 Tim. 3:1). Jumatï ukham uñjasïta ukhajja, ¿kuns lurasma? Elías profetat yateqasisin kunjamsa jikjjatasta uk Jehová Diosar yatiyam. Jupakiw “chuymachirisajja”  (2 Corintios 1:3, 4 liytʼasiñapawa). Kunjamsa Eliasar chuymachtʼäna uk jichhajj yatjjatañäni.

13, 14. 1) ¿Kunjamsa Diosajj mä angelampi profetapar chʼamañchtʼäna? 2) Kunsa lurañ muntan ukat kunanaksa jan lurirjamäktan uk Diosaw sum yati, ¿kunjamsa uk yatiñajj chuymachtʼistu?

¹³ Munat profetapajj mä retama ali kʼuchur qontʼatäsin ‘jakañajj apaqjjeta’ sasin säna ukhajja, ¿kunjamakis Jehová Diosajj jikjjataspachäna? Wal llakispachäna. Eliasajj ikjjänwa, ukhaw Diosajj mä angelap khitäna, uka angelajj kʼachitat llamktʼasaw akham säna: “Sartasim, ukatjja manqʼasim” sasa. Eliasajj iyaw sasaw manqtʼasïna, uka angelajj jichhak lurat tʼantʼampi ukat umampwa aparapitayna. ¿Angelar yuspärpachänti? Manqtʼasisa ukat umtʼasisajja, wasitampiw iktʼasiwayjjäna sasakiw Bibliajj qhanañchi. ¿Chuyma ustʼatätap laykut jan parlañ munkpachäna? Janiw yatktanti, ukampis Diosan angelapajj mayampiw sartayäna, inas qhantatirüchïna, llamktʼasajj akham sänwa: “Sartasim, ukatjja manqʼasim” sasa. Ukat aka suma arunakwa sarakïna: “Thaki sarañamajja wali jayäskiwa” sasa (1 Rey. 19:5-7).

¹⁴ Diosan amuytʼayataw uka angelajj kawkirus profetajj sarani uk yatïna. Chʼamapampikejj janiw sarkaspati sasaw angelajj amuyarakïna. Cheqansa, kunsa lurañ muntan ukat kunanaksa jan lurirjamäktan uk Jehová Diosajj jiwasat sipansa sum yati, ukham Diosar yupaychañajj wal chuymachtʼistu (Salmo 103:13, 14 liytʼasiñapawa). Angelajj churkäna uka manqʼajja, ¿kunjamsa Eliasar chʼamañchtʼpachäna?

15, 16. 1) ¿Kunjamsa Diosajj churkäna uka manqʼajj Eliasar yanaptʼäna? 2) ¿Kunatsa Diosajj ajay toqet manqʼa churkistu ukar wali askit uñjañasa?

¹⁵ Bibliajj akham saskakiwa: “Eliasasti sartasisinjja manqʼasïnwa, umtʼasirakïnwa. Ukatjja uka manqʼajja chʼamwa churäna pusi tunka uru, pusi tunka arumampi sarañataki, Diosan Horeb sat qolluparu puriñkama” sasa (1 Rey. 19:8). Kunjamatï Moisesajj sojjta pataka maranak nayra, ukat Jesusajj waranqa maranak qhepata, 40 urumpi 40 arumampi ayunapkänjja, ukhamarakiw Eliasajj ayunäna (Éxo. 34:28; Luc. 4:1, 2). Uka manqʼajj janiw llakinakap chhaqtaykänti, ukampis jan jiwañapatakiw yanaptʼäna, ukajj mä milagrönwa. Uka chuymankipstat profetajj sapürupuniw niya mä phajjsi chikat jilajj uka chʼusa wasar pampnam wali chʼam tukusa saräna.

¹⁶ Jichhürunakanjja, ukhamarakiw Jehová Diosajj servirinakapar uñjaski, janiw manqʼjja mä milagro toqe churkistuti, jan ukasti,  ajay toqetwa manqʼa churistu, ukaw jukʼamp wakiskirejja (Mat. 4:4). Bibliata ukat Bibliat apstʼat qellqatanakat Diosat yatjjattan ukhaw ajay toqet chʼamañchtʼastanjja. Cheqas taqe ukanakajj janiw llakinakas chhaqtaykaniti, ukampis kuntï jan aguantirjamäktan ukanak aguantañatakiw yanaptʼistani. Ukat ‘wiñay jakañ’ katoqañatakiw yanaptʼarakistani (Juan 17:3).

17. ¿Kawkharus Eliasajj purïna, ukat kunanakas uka cheqan pasäna?

¹⁷ Elías profetajj niya 320 kilometronak sarasinjja, Horeb sat qolluruw purïna. Uka cheqanwa walja maranak nayrajj nina aqaskir chʼaphit mä ángel toqejj Jehová Diosajj Moisesar parläna. Mä qawqha tiempotjja uka cheqanarakwa Diosajj Israel markampi Leyinak toqe mä arustʼäwir mantäna. Uka qollunwa Eliasajj mä pʼiyan imantasïna.

18, 19. 1) ¿Kunsa angelajj Eliasar jisktʼäna, ukat jupajj kamsänsa? 2) ¿Kuna kimsa toqetsa Eliasajj aynachtʼäna?

¹⁸ Horeb sat qollunjja, Jehová Diosajj mä ángel toqew Eliasar akham säna: ‘¿Kuns akan luraskta?’ sasa. Angelajj wali munasiñampiw jisktʼpachäna, ukatwa profetajj kunjamtï jikjjataskäna uk akham sasin yatiypachäna: ‘Taqe chuymaw Jumar serviwaysma, ejercitonakan Jehová Dios Tata, israelitanakasti juman sumankäwi arunakamjja apanukupjjewa, ukhamarak altaranakamsa allinukupjje, ukatsti espadanakampiw profetanakamar jiwarayapjje. Naya sapakiwa qheparjjta, jichhasti jiwayañatakiw thaqhasipkitu’ sasa (1 Rey. 19:9, 10, NM). Uka arunakaparjamajja, kunatsa jupajj wali llakit jikjjatasïna uk kimsa toqetwa amuysna.

¹⁹ Maya, jupan luratapajj inamayakïkaspas ukhamwa amuyasïna. Walja maranakaw Diosar ‘taqe chuyma serviwayäna’, jupatakejj Diosan sutipa ukat yupaychäwipaw nayrankäna, ukampis jan waltʼäwinakajj jiljjattaskakïnwa. Markankirinakajj Diosar kutkatasiri ukat jan iyawsäwinïpjjänwa, kʼari religionas jan wali usükaspas ukhamaw miratatäna. Paya, sapakïtapatwa wali llakit jikjjatasirakïna. Jupa sapakis uka markan Jehová Diosar yupaychkaspa ukhamwa amuyasïna, ukatwa “naya sapakiwa qheparjjta” sasin säna. Kimsa, ajjsarayasirakïnwa. Jupjam walja profetanakaruw jiwarayapjjäna, jichhajj ukhamarakiw jiwayapjjetani sasaw amuyasïna. Kunjamtï jikjjataskäna uk arsuñajj inas chʼamächïna, ukampis jachʼa jachʼa tukuñat sipansa, jan ajjsartʼasaw llakinakap arsüna. Taqe chuymaw Jehová Diosar mayisïna, ukajj jiwasatakejj wali yateqaskañawa (Sal. 62:8).

20, 21. 1) Qollu pʼiyat mistusajja, ¿kuna muspharkañanaksa Eliasajj uñjäna? 2) Muspharkañanak uñjasajja, ¿kunsa Eliasajj yateqäna?

 ²⁰ ¿Kunjamsa Diosajj Eliasar chʼamañchäna? Anqar mistunim sasaw angelajj säna. Kunas pasani uk janis yatkchïnjja, iyaw sasaw Elías profetajj mistüna. Ukat akatjamatwa oqartʼayasirjam wali chʼaman thayajj sartäna, qollunaksa jachʼa qarqanaksa qʼalpun allthapïna. Eliasajj uka thayat jarkʼaqasiñatakiw wal chʼamachasiskpachäna ukat nayranakapsa jarktʼasirakpachänwa, lipʼichit lurat isinakapsa wal katthapispachäna. Saytʼatäskakiñakiw chʼamachaspachäna, oraqejj wal khatatïna. Ukatsti, ninarakiw uka cheqan qʼal nakhantäna. Ukhamätap laykuw Eliasajj wasitat pʼiyar mantjjäna (1 Rey. 19:11, 12).

²¹ Bibliarjamajja, Jehová Diosajj janiw thaya taypinsa, oraq khathatinsa ni nina taypinsa jikjjataskänti. Jupajj janiw Baal diosjam jaqenakan uñstayat Diosäkiti, uk sumwa Eliasajj yatïna. Baal diosarojj “qenayankir caballor latʼjjatata dios” sasaw yupaychirinakapajj sapjjerïna, jupas jallu puriykaspa ukhama. Jehová Diosakiw thaysa, ninsa ukat yaqha ukhamanaksa utjayaspa ukat juparakiw taqe luratanakapat sipansa jukʼamp chʼamanejja. Alajjpachas janiw Juparojj apjjäskaspati (1 Rey. 8:27). Uk yatiñajj ¿kunjamsa profetar yanaptʼpachäna? Jupajj wal ajjsarayasïna. Ukampis taqe chʼamani Diosajj jupampïskatap amuyasajja, ¡Acab reyirusa ukat Jezabel warmirusa janiw kunat ajjsarañapas utjjänti! (Salmo 118:6 liytʼasiñapawa.)

22. 1) Jehová Diosajj wali askit uñjatapjja, ¿kunjamsa ‘mä qoña jiskʼa arojj’ Eliasar qhanañchäna? 2) ¿Khitis uka ‘qoña jiskʼa arump’ parlpachäna? (Qhanañchäwip uñjjattʼäta.)

²² Nina jiwatatjja, taqe kunas chʼujukëjjänwa. Ukatsti, Eliasajj ‘mä qoña jiskʼa aru’ istʼäna, uka aruw wasitat kunjamsa jikjjatasïna uk arsuñapatak yanaptʼäna, ukhamajj mayampiw profetajj llakinakap arsüna. * Wali chʼamañchtʼataw Eliasajj jikjjatasjjpachäna, ukampis uka ‘qoña jiskʼa aru’ istʼasaw jukʼamp chuymachtʼat jikjjatasïna. ¿Kunjamsa Jehová Diosajj wali askit uñjatap uñachtʼayäna? Kunsa Baal diosar  yupaychirinakaparojj lurañ amtäna ukwa Diosajj yatiyäna. Uka arunakapajj phoqhasiñapapunïnwa, ukhamajj Eliasan luratanakapajj janiw inamayäkänti. Ukat Jehová Diosajj yaqha luräwimpiw churäna ukat kunjamsa uk phoqhañapäna uksa qhanañcharakïnwa (1 Rey. 19:12-17).

23. Jan sapakïñapatakejja, ¿kuna pä toqetsa Diosajj Eliasar yanaptʼäna?

²³ ¿Kunsa Diosajj Eliasan jan sapak jikjjatasiñapatak luräna? Pä toqetwa yanaptʼäna. Nayraqatjja, ‘Eliseor juma lanti profetäñapatak uttʼayanim’ sasaw säna. Uka Eliseo waynaw mä qawqha maranak jupamp chiktʼatäñapäna ukat yanaptʼarakiñapäna. ¡Ukham maynimp irnaqtʼañajj Eliasatakejj wali askipunïpachänwa! Maysa toqetjja, akwa Diosajj yatiyarakïna: ‘Nayajj Israelanjja utjaytwa paqallq waranqa jaqenaka Baal diosaru jan killtʼasirinaka, ni jampʼattʼapkisa ukanaka’ sasa (1 Rey. 19:18). ¡Eliasajj janiw sapakïkänti! Walja israelitanakaw Baal diosar jan yupaychapkänti, uk yatisajj wal kusispachäna. Jupanakajj Eliasan Jehová Diosar taqe chuyma serviskakiñapwa munapjjäna, ukhamat uka jan wali urunakan jupat yateqasiñataki. Kuntï angelajj uka ‘qoña jiskʼa arump’ siskäna ukajj Eliasar wal chuymachtʼäna, pachpa Diosas parlkaspa ukhamwa jupajj amuyaspachäna.

24, 25. 1) ¿Kunjamsa Eliasajj Diosan ‘qoña jiskʼa arunakap’ istʼsna? 2) Eliasajj Diosampiw chuymachtʼayasïna sasajja, ¿kunatsa sistan?

²⁴ Elías profetjamaw jachʼa thayanaka, oraq khathatinaka ukat yaqha ukhamanak uñjasajj wal musphartanjja. Taqe ukanakajj Diosan wali chʼamanïtapwa qhan uñachtʼayistu (Rom. 1:20). Jehová Diosajj jan tukuskir chʼamapampiw taqe chuyma servirinakapar yanaptʼaskaki (2 Cró. 16:9). Ukat Biblia toqew Jupat jukʼamp yateqsna (Isaías 30:21 liytʼasiñapawa). Jiwasatï yanaptʼayasiñänejja, Bibliajj uka ‘qoña jiskʼa arükaspas’ ukhamäspawa. Uka toqew Jehová Diosajj cheqañchistu, chuymachtʼistu ukat munasiñapsa uñachtʼayarakistu.

²⁵ Horeb qollun Diosajj chuymachtʼkäna ukjja, ¿Eliasajj katoqaspachänti? Jïsa. Jehová Diosat jan jitheqtiri ukat jan ajjsariri profetajj kʼari yupaychäwin chhaqtañapatakiw wal chʼamachasïna, jichhajj wasitampiw luräwinakapamp phoqhäna. Jiwasatï Diosan Arupampi, mä arunjja ‘chuymachtʼäwi arunakampi’ taqe chuyma yanaptʼayasiñänejja, Elías profetan iyawsäwipatwa yateqasiñäni (Rom. 15:4, NM).