1, 2. 1) ¿Kunjamsa jan uñtʼat visitirejj Mariar aruntäna? 2) Visitirin puritapajja, ¿kunjamsa Marian jakäwip mayjtʼayäna?

MARIAJJ wali muspharataw visitapar uñkattʼäna. Uka visitajj janiw awk taykapar thaqkänti, jan ukasti juparuw thaqhaskäna. Uka visitirejj janiw Nazaret markatäkänti, uk Mariajj sum yatïna. Uka jiskʼa markanjja, jan uñtʼatanakajj qhanaw amuyasïna. Yämas uka visittʼirejj mayjapunïnwa. Jupajj akham sasaw Mariar aruntäna: ‘María ¡Diosan askipamp phoqtʼata! Tatitojj jumampiwa’ sasa (Lucas 1:26-28 liytʼasiñapawa).

² Ukhamwa Bibliajj Mariat parlañ qallti. Jupajj Galilea toqenkir Nazaret sat markankiri Helí chachan phuchapänwa. Mariajj José sat mä carpinterompi jaqechasiñatak parlatänwa, uka chachajj janiw qamirïkänti, ukampis wali iyawsäwinïnwa. Ukhakamasti Mariajj kunjamsa jakasini uk sum yatisina. Janiw qamirïñapäkänti jan ukasti chachapampi irnaqtʼasa ukat wawanakar uñjasaw sarnaqañapäna. Ukampis niyaw mä wakiskir amtar puriñapäna. Visitirejj kuntï Diosajj lurañap munäna ukwa yatiyäna, ukhat uksarojj jakäwipajj mayjtʼjjañapänwa.

3, 4. Mariar sum uñtʼañatakejja, ¿kuna yatichäwinaksa apanukuñasa, ukat kunarus atinisiñasa?

³ Bibliajj janiw Mariat sint parlkiti ukatwa waljanejj wal muspharapjje. Familiapatsa ukat kunjam jaqënsa ukjja mä jukʼakwa parli, ukat kunjam uñtanïnsa ukjja janipuniw qhanañchkiti. Ukampis kunatï Biblian jupat qellqatäki ukanakajj wali askiwa.

⁴ Kʼari yupaychäwinkirinakajj kunaymanwa Mariat yatichapjje, Mariaw sasaw pintapjje, ukat mármol qalata jan ukajj estucotwa jupar lurapjjaraki. Ukampis Mariar sum uñtʼañatakejj uka kʼari yatichäwinakjja apanukuñasawa. Bibliat jan amuytʼkaña kʼari yatichäwinaka ukat jaqen yatichäwinakapasa, Mariarojj “Alajjpachansa munañani” ukat “Diosan mamapa” sasaw sutichapjje, ukanaksa apanukuñasarakiwa. Antisas kuntï Bibliajj cheqpachapuni yatichki ukaruw atinisiñasa, ukanwa Marian iyawsäwipatsa ukat kunsa jiwasajj jupat yateqsna ukanak jikjjatsna.

5. 1) Gabriel Angelajj Mariar aruntkäna ukhajj wal jupajj sustjasïna, ¿kunsa ukajj uñachtʼayistu? 2) ¿Kunsa Marian sarnaqäwipajj qhan uñachtʼayistu?

⁵ Janiw mä jan uñtʼat jaqek Mariar visitkänti, jan ukasti Gabriel sat mä angelänwa. “¡Diosan askipamp phoqtʼata!” sasin siskäna ukhajja, Mariajj “wal sustjasïna” ukat “¿kunats ukham aruntpachïtu?” sasaw jisktʼasïna (Luc. 1:29). ¿Khitin askipamp phoqtʼataw sänsa? Mariajj janiw jaqenakampi jachʼar aptatäñ suykänti, ukampis Jehová Diosaw wali askit uñjtam sañwa angelajj munäna. Mariajj wali askitsa Diosamp uñjatañ munkchïnjja, janiw “Diosajj katoqjjetuw” sasin amuykänti. Jiwasajj Diosampi sum apasiñatakejj walsa chʼamachaskstanjja, janiw jachʼa jachʼa tukusajj “Diosajj katoqjjetuw” sasin sisktanti. Kuntï Mariajj amuykäna ukhamwa amuyaraktanjja. Diosajj jachʼa jachʼa tukur jaqenakarojj jan walitwa uñji ukat altʼat chuymaninakarusti munasiwa ukat yanaptʼarakiwa (Sant. 4:6).

6. ¿Kuna luräwsa Angelajj Mariar jaytäna?

⁶ Niyakejjay angelajj mä suma luräwi katuyañampïchïnjja, Mariajj altʼat chuymanïñapänwa. Wawanïyätawa, uka wawasti taqe jaqenakat sipansa jachʼäniwa sasaw angelajj yatiyäna. Ukat akham saskakïnwa: “Dios Tatituw juparojj reyit uttʼayani nayra Davidarjama, Israel markar wiñay apnaqañapataki. Jupan uka markar apnaqañapajj janipuniw tukuskaniti” sasa (Luc. 1:32, 33). Waranq jila maranak nayraw Diosajja, wawanakamat mayniw wiñayataki apnaqjjani sasin Davitar yatiyäna, uksti Mariajj sum yatïna (2 Sam. 7:12, 13). Ukhamasti, uka wawapaw Diosan markapan walja maranak suyata Mesiasäñapäna.

7. 1) Kuntï Mariajj angelar jisktʼäna ukjja, ¿kunsa jupat uñachtʼayistu? 2)  ¿Kunsa wayna tawaqonakajj Mariat yateqasipjjaspa?

⁷ Janiw ukakïkänti, ‘Alajjpach Diosan Wawapa’ satäniw sasaw angelajj yatiyarakïna. ¿Kunjamsa ukajj phoqhasispäna? ¿Kamisarak Mariajj wawanïspänsti? Joseyampi jaqechasiñatak parlatäkchïnsa, janïraw jupamp casaraskänti. Ukatwa angelar akham jisktʼäna: “Janïrajjay nayajj chachanïkstejja. ¿Kunjämatarak akasti ukham lurasispasti?” sasa (Luc. 1:34). ¡Mariatakejj jan chachampi llamktʼatäñajj janiw phenqʼäkänti! Jan ukasti, qʼoma sarnaqañaw jupatakejj askïnjja. Jichhürunakanjja, walja wayn tawaqonakaw mä chachampïña jan ukajj mä warmimpïñ wal munapjje, ukat khitinakatï jan ukham sarnaqapki ukanakatjja  sawkasipjjewa. Tiempojj wali mayjäjjewa, ukampis Jehová Diosajj pachpakïskiwa (Mal. 3:6). Marian tiempopanjamarakiw khitinakatï kamachinakapar istʼapki ukanakar wal munasi (Hebreos 13:4 liytʼasiñapawa).

8. ¿Kunjamsa Mariajj juchararäkasajj jan juchani wawanïsapäna?

⁸ Mariajj taqe chuymas Diosar servkchïnsa, jucharar warmikïskänwa. Ukhamajj ¿kunjamsa Diosan wawapa sat jan juchani wawanïspänsti? Angelajj akham sänwa: “Qollan Ajayuw jumjjaru jutani, ukatsti alajjpach Diosan chʼamapaw mä qenayjam jumarojj imjjatätam. Ukatwa naskan uka wawajj Diosatak yaqhachatäni, ukatsti Diosan Wawapa satarakïniwa” sasa (Luc. 1:35). “Yaqhachata” siski uka arojja “qʼoma”, “qolläna” sañwa munarakispa. Taqeniw juchanïtanjja, nayratpachaw jaqejj wawanakaparojj uka juch pasayapjjäna. Ukampis uka wawan jan juchani nasiñapatakejj Jehová Diosaw mä milagro luräna, alajjpachankir wawapan jakäwipjja Marian purakaparuw uchäna ukat qollan ajayumpiw jan juchanïñapatak jarkʼaqäna. Angelan arunakaparojja, ¿Mariajj cheqaw sispachänti?

9. 1) Marian sarnaqäwipatjja, ¿kunsa yaqhepajj jan amuyapki? 2) ¿Kunjamsa Gabriel angelajj jukʼamp iyawsäwinïñapatak Mariar yanaptʼäna?

⁹ Yaqhep kʼari cristianonakasa ukat yaqhanakasa, kunjamaraki mä tawaqojj jan chachanïsajj wawanïspasti sasaw amuyapjje. Uka jaqenakajj walsa yatjjatasipkchejja, “Diosatakejj janiw kunas chʼamäkiti” sas angelajj arskäna uka arunakjja janiw amuyapkiti (Luc. 1:37). Mariajj janiw angelan arunakapat pächaskänti, jupajj wali iyawsäwinïnwa. Ukampis janiw jan amuytʼasisakejj taqe kunar iyaw siskänti. Jan ukasti amuytʼasir jaqjamajja, kunatsa iyawsäwinïna uk sum yatïna. Ukat angelajj jukʼamp atinisiñapatakiw yanaptʼäna. Elisabet familiaramajj jilïrikchisa ukat jan wawanit uñtʼatäkchisa, Diosan yanaptʼapampejj wawanïniwa, sasaw yatiyäna.

10. Kuntï Diosajj lurañap munäna uk phoqhañajja, ¿kunatsa Mariatakejj jan faciläkäna?

¹⁰ ¿Kunsa Mariajj luräna? Diosan mayitapar phoqhañapänwa, ukat kunanaktï Gabriel angelajj yatiykäna ukanak Diosajj phoqhapuniniw sasaw taqe chuym atinisïna. Ukampis uka suma luräwi phoqhañajj janiw facilañapäkänti. Nayraqatjja, Joseyampi jaqechasiñatak parlatapatwa Mariajj lupʼiñapäna. ¿Usurïtap yatisinjja jupampi jaqechasiñ munaskakisapänti? Maysa toqetjja, uka luräwi katoqasajj wal llakispachäna. Diosan wali munat wawaruw purakapan apañapäna, mä arunjja, ¡Jehová Diosan jilïr Wawaparu!  Ukat jan wali urunakanjja, jiltañapkamaw uka wawar sum uñjañapäna. ¡Walja lurañanakaw Marian utjäna!

11, 12. 1) Chʼama luräwinak katoqasajja, ¿kunsa yaqhep taqe chuyma servirinakajj lurapjjäna? 2) Kuntï Mariajj Gabriel angelar siskäna ukajja, ¿kunsa jupat uñachtʼayistu?

¹¹ Diosar taqe chuyma servirinakasa, awisajj Diosan kun luram satas janikiw munapjjerïkänti, ukwa Bibliajj qhanañchi. Moisesajja, sutimjjar parlañatakejj janiw sum parlirïkti sasaw säna (Éxo. 4:10). Jeremiasasti, “wawasktwa” janiw mayitanakam phoqkiristti sarakïnwa (Jer. 1:6). ¡Ukat Jonasajj Diosan mayitap phoqhañat sipansa maysaruw jaltjjäna! (Jon. 1:3.) ¿Mariajj kuns lurpachäna?

¹² Kuntï Mariajj siskäna ukjja, iyawsäwini jaqenakajj jichhürkamas amtasisipkakiwa. Jupan amuykañ arunakapajj altʼat chuymanïtapa ukat istʼasirïtapwa uñachtʼayäna. Mariajj akham sänwa: “Nayajj [Jehová] Tatitun serviripätwa. Jupajj arsutaparjam nayampejj lurpan” sasa (Luc. 1:38). Uka tiempon tawaqo esclavanakajj janipuniw jachʼar aptatäpkänti, jakäwipajj uywiripan amparapankänwa. Ukhamwa Mariajj Jehová Dios uywiripar uñjäna. Jupajj taqe chuyma yupaychirinakapat jan armasitapjja sum Mariajj yatïna. Ukat nayatï Diosan mayitanakap sum phoqhañataki chʼamachasï ukhajja, Jupajj bendecitaniwa sasaw atinisïna. Ukhamajj Diosan amparapankkasajj janiw kunatsa llakiskänti (Sal. 18:25).

13. Diosan mayitanakap phoqhañajj wali chʼamjamani, jan ukajj jan phoqhañjamani ukhajja, ¿kunjamsa Marian sarnaqäwipajj yanaptʼistani?

¹³ Awisajj Diosan mayitanakap phoqhañajj wali chʼamjamäspawa, jan ukajj jan phoqhañjamäspawa. Kunjamtï Mariajj Diosar taqe chuyma atiniskänjja, ukham atinisiñatakiw Bibliajj chʼamañchistu (Pro. 3:5, 6). ¿Mariat yateqasiñäniti? Ukhamtï lurañänejja, Diosajj bendecistaniwa ukat jukʼamp iyawsäwinïñäniwa.

14, 15. 1) Zacariasaru ukat Elisabetar visitir saräna ukhajja, ¿kunjamsa Diosajj Mariar chʼamañchtʼäna? 2) Lucas 1:46-55 qellqatajja, ¿kunsa Mariat amuytʼayistu?

¹⁴ Kuntï angelajj Elisabetat yatiykäna ukajj Mariatakejj wali askïnwa. Jupakiw kunjamsa Mariajj jikjjatasïna uk sum amuyasapäna. Ukatwa Mariajj jupar visitir sarañ amtäna. Kimsa jan ukajj pusi urunakaw qollunak taypinkiri Judá markar saräna. Zacarías  sacerdoten ukat Elisabetan utapar mantäna ukhajja, Jehová Diosaw jukʼamp iyawsäwinïñapatak yanaptʼäna. Elisabetar aruntäna ukhajja, Elisabetan purakapankiri wawapaw kusisiñat onjjtäna, ukat qollan ajayun phoqtʼataw ‘tatitun taykapa’ sasin Elisabetajj Mariar säna. Marian wawapajj Mesías ukäniwa sasaw Diosajj Elisabetar qhanañchatayna. Ukatjja, Marian Diosar istʼasirïtapatsa, taqe chuyma yupaychatapatsa akham sañapatakiw Diosajj amuytʼayäna: “Kusisiñaw juman iyawsatamajj” sasa (Luc. 1:39-45). Taqe kuntï Jehová Diosajj Mariar siskäna ukajj phoqhasiñapapunïnwa.

¹⁵ Kuntï Mariajj Elisabetar säna ukajj Biblian suma imatäskiwa (Lucas 1:46-55 liytʼasiñapawa). Uka qellqatanakwa Marian arunakapajj jukʼamp uñsti ukat wal jupat yatichistu. Mariajj wali  yuspärasir tawaqönwa, jupatakejj Mesiasan taykapäñajj wali askipunïnwa ukatwa Diosar wal jachʼañchäna. Ukat arunakapajj wali iyawsäwinïtapwa uñachtʼayarakistu. Jehová Diosaw chʼamaninakarusa, jachʼa jachʼa tukurinakarusa jiskʼachi ukat pisinkirinakarusa, altʼat chuymaninakarusa yanaptʼiwa sasaw säna. Ukat Diosan Arupatsa wal yatpachäna, kuna laykutejj pä tunka jila kutiw Hebreo arut Qellqatanakat arsüna. *

16, 17. 1) Mariasa ukat Jesusasa, ¿khitin munañaparjamas sarnaqapjjäna? 2) Amigonak thaqhañat toqetjja, ¿kunsa Mariat ukat Elisabetat yateqsna?

¹⁶ Mariajj Diosan arunakapat yatjjatasajj wal lupʼpachäna. Ukampis jupan amuyunakapak arsuñat sipansa, kunatï Diosan Arupan qellqatäkäna ukakwa arsüna. Purakapankaskiri wawasti ukhamarakiw qhepat amuyäna. Ukatwa akham säna: “Yatichäwejjajj janiw nayankkiti, jan ukasti khitankitu ukankiwa” sasa (Juan 7:16). ¿Jiwasajj Diosan Aruparojj ukhamarakit wali respetomp uñjtan? ¿Jan ukajj amuyunakasakcha yatichañ muntan? Cheqas Mariat yateqasiñajj wali askipunïniwa.

¹⁷ Mariajj niya kimsa phajjsiw Elisabetamp qheparäna, ukhamasti purapatwa wal chuymachtʼasipjjpachäna (Luc. 1:56). ¿Kunsa ukajj yatichistu? Amigonakasar sum ajlliñajj wali wakiskiriwa. Jehová Diosar cheqpachapun munasiri amigonak thaqhañänejja, Diosar yupaychäwisanjja jiltañäniwa ukat jukʼampiw Jupar jakʼachasirakiñäni (Pro. 13:20). Mariajj utaparuw kuttʼjjäna. ¿Usurïtap yatisajj Joseyajj kamspachänsa?

18. ¿Kunsa Mariajj Joseyar yatiyäna, ukat uk istʼasajj kunsa Joseyajj amtäna?

¹⁸ Mariajj janiw usurïtapa qhanäjjañapkamajj Joseyar yatiyañatak suykänti. Ukampis janïr yatiykasajj Diosar ajjsartʼir Joseyat inas akham jisktʼaschïna: “¿Yatiyjjä ukhajj kamsakinisa?” sasa. Ukhampachas jan ajjsarasaw taqe kun yatiyäna. Uk istʼasajj Joseyajj wal llakispachäna. Mariar munasitap laykojj janiw arunakapat pächasiñ munkänti, ukampis amuyatatjja, Mariajj yaqha chachampjamakiw sarjjäna. Kunsa Joseyajj lupʼpachäna ukajj janiw Biblian qellqatäkiti, divorciasiñ amtjjäna sasakiw qhanañchi. Uka tiemponjja, jaqechasiñatak parlatanakarojj casadöjjapkaspas ukhamwa uñjasïna. Joseyajj janiw taqen uñjkata Mariar phenqʼachaña jan ukajj juchañchayañ munkänti, ukatwa jamasat divorciasiñ amtäna (Mat. 1:18, 19). Taqe ukanak yatisajj wali munasiri José chachajj  kunjaksa chuym ustʼayasïna uk uñjasaw Mariajj wal llakispachäna. Cheqas arupar jan creyitapatjja janiw juchañchkänti.

19. ¿Kunjamsa Diosajj Joseyar mä suma amtar puriñapatak yanaptʼäna?

¹⁹ Ukhaw Diosajj mä suma amtar puriñapatak Joseyar yanaptʼäna. Mä samka toqew mä angelajj Marian usuriptatapajj mä milagrowa sasin yatiyäna. ¡Uk yatisajj Joseyajj wal kusispachäna! Ukhamasti, kunjamtï Mariajj Jehová Diosampi irpayaskänjja, ukhamarakiw Joseyajj lurañ amtjjäna. Mariampiw casarasjjäna ukat Diosan wawapar uñjañatakejj wakichtʼatarakïnwa (Mat. 1:20-24).

20, 21. Casaratäpki ukat casarasiñ munapki ukanakajja, ¿kunsa Mariampita ukat Joseyampit yateqasipjjaspa?

²⁰ Ukhat jichhakamajj niyaw 2.000 maranakäjje, ukampis kunatï Mariampi Joseyampir paskatayna ukanakatwa casadonakasa, casarasiñ munirinakasa yateqasipjjaspa. Kunjamsa Mariajj wali munasiñampi wawanakapar uñjäna uk amuyasajja, Joseyajj Diosan angelapar istʼatapatjja wal kusispachäna. Ukat wali wakiskiri amtanakar puriñatakejj Jehová Diosar atinisiñajj kunja wakiskirisa ukwa Joseyajj amuyarakpachäna (Sal. 37:5; Pro. 18:13). Ukat familian pʼeqtʼirjamajja, suma amuyumpi ukat munasiñampiw taqe kunsa lurarakpachäna.

²¹ Maysa toqetjja, Marian Joseyampi casarasiñ munatapatjja, ¿kunsa yateqsna? Qalltanjja, Marian arunakapajj cheqaw sañajj Joseyatakejj chʼamänwa, ukampis kunsa Joseyajj lurani ukjja, Mariajj pacienciampiw suyäna ukat niyakejjay Joseyajj familia pʼeqtʼirïñapächïnjja, jupar atinisiskakïnwa. Cheqas paciencianïñajj kunja askïnsa ukwa Mariajj yateqäna. Ukham sarnaqatapajj kullakanakatakejj wali yateqaskañawa. Ukatjja, taqe chuyma sum parltʼasiñajj kunja askisa ukwa Mariampi Joseyampejj amuyapjjarakpachäna (Proverbios 15:22 liytʼasiñapawa).

22. ¿Kunatsa Joseyampi Mariampejj chacha warmjam sarnaqañ sum qalltapjjäna, ukat kuna luräwinïpjjänsa?

²² Mariampi Joseyampejj chacha warmjam sarnaqañjja sum qalltapjjäna. Panpachaniw Jehová Diosar taqe kunat sipansa wal munasipjjäna ukat suma awk taykäñsa wal munapjjarakïna. Walja bendicionanakaw jupanakatak utjañapäna, ukampis walja lurañanakaw utjañaparakïna. Jesusaruw uywapjjañapäna, jupaw taqe jaqenakat sipansa wali uñtʼatäñapäna.