1, 2. 1) ¿Rut ukat Noemí warminakajj sarasipkäna uka thakejj kunjamänsa, ukat kuna llakinïpjjänsa? 2) Rut ukat Noemí warminakan Belén markar sarapjjatapajja, ¿kunatsa mayj mayjäna?

RUT ukat Noemí warminakajja, kayukiw Moab marknam sarasipkäna. Jupanakajj sapakëjjapjjänwa. Ukat uka thaya pampanjja, chʼiwinakapas janiw sum uñjasjjänti. Intin niya jalantañampëjjatap amuyasajja, Rut warmejj suegrapar uñkattʼasaw akham lupʼïna: “Kawkharus jichha arumajj samartʼapjjä uk thaqhañajaw wakisispa” sasa. Suegraparojj walpun munasïna ukat sum uñjañ munarakïna.

² Panpachaniw wali llaktʼatäpjjäna. Noemejj walja maranakaw viudäjjäna ukat Mahlón, Quelión sat yoqanakapan jiwatapatwa jachaskarakïna. Rut warmejj Mahlón chachapan jiwatapatwa llaktʼatäskarakïna. Panpachaniw Israelan Belén sat markar sarasipkäna. Noemejj utaparuw kuttʼaskäna ukampis Rutajj familiaranakapa, markapa, costumbrenakapa ukat diosanakap jaytasaw jan uñtʼat markar saraskäna (Rut 1:3-6 liytʼasiñapawa).

3. Rut warmjam iyawsäwinïñatakejja, ¿kuna jisktʼanakarus qhanañchañasäspa?

³ ¿Kunatsa Rutajj ukham amtpachäna? Yaqha cheqan jakañatakisa ukat Noemí suegrapar yanapañatakisa, ¿kawkhatsa chʼam apspachäna? Uka jisktʼanakar qhanañchañaw jupat yateqasiñatakejj yanaptʼistani. (“ Rut jiskʼa librojj suma lurtʼatapuniwa” sat recuadro uñjjattʼäta.) Moab markankir Rut tawaqojj wali iyawsäwinïnwa. Nayraqatjja, kunatsa uka pä warminakajj Belén markakam sarañ amtawayapjjpachäna uk uñjañäni.

4, 5. 1) ¿Kunatsa Noemí ukat familiapas Moab markar sarjjapjjäna? 2) ¿Kunatsa Noemin familiapan iyawsäwipajj yantʼat uñjasïna?

⁴ Rutajj jilsuwaykäna uka Moab markajja, mar Muerto satakis ukhat inti jalsu toqenkänwa. Ukanjja, qollunaka, barranconaka ukhamaw utjäna ukat qoqanakas jukʼakïnwa. Ukampis ‘Moab  oraqen’ yapuchañajj wali sumapunïnwa. Israel markan machʼajj utjkäna ukhajja, Moab markanjja achuskakïnwa. Ukatwa Mahlón sat Noemin yoqapajj Rutampi uñtʼasïna (Rut 1:1, 2).

⁵ Israel markan machʼa utjatap laykuw Elimelec chachajj markap jaytawayasin Noemí warmipampi ukat pä yoqapamp Moab markar jakasir sarjjäna. Uka markanjja, familpachaw iyawsäwipan yantʼat uñjasipjjäna, ¿kunatsa? Diosajj yupaychayasiñatak ajllkäna uka cheqaruw israelitanakajj sapa kuti sarapjjañapäna (Deu. 16:16, 17). Noemejj jan jitheqtasaw Diosar yupaychäna, ukampis chachapan jiwatapatjja, wali llakitaw jikjjataspachäna (Rut 1:1-3).

6, 7. 1) ¿Kunatsa Noemí warmirojj yoqanakapan moabita warminakampi casarasipjjatapajj wal llakisiypachäna? 2) Noemejj sumwa yojjchʼanakapar uñjäna, ¿kunatsa ukajj muspharkañajja?

⁶ Yoqanakapar moabitanakamp casarasir uñjasaw Noemejj wal llakispachäna (Rut 1:4). Kunjamsa Abraham sat achachilapajj Isaac yoqapatak Diosar yupaychir familiap taypit mä warmi thaqhañatak wal chʼamachasïna uk sum yatïna (Gén. 24:3, 4). Ukat Moisesan katoqat Leyinakarjamajja, israelitanakajj janiw yoqanakaparusa ni phuchanakaparus yaqha markankirinakampi casarapjjañapäkänti, jupanakajj yaqha diosanakar yupaychapjjañapatakiw israelitanakar nuktʼapjjaspäna (Deu. 7:3, 4).

⁷ Ukhamäkchïnsa, Mahlón ukat Quelión chachanakajj moabita warminakampiw casarasipjjäna. Uk uñjasaw Noemí warmejj llakita ukat aynachtʼat jikjjataspachäna, ukampis Rut ukat Orfa yojjchʼanakapar wali munasiñampi ukat khuyaptʼayasiñamp uñjañatakiw chʼamachasïna. Inas Jehová Diosar yupaychjjapjjchini sasaw amuypachäna. Ukatwa yojjchʼanakapajj jupar wal munasipjjpachäna. Cheqas kimspachanejj wali sumpunwa apasipjjäna, ukhamatwa llakinakajj utjawayki ukanakar saykatawayapjjäna. Rutampi Orfampejj jan wawanïkasaw viudaptapjjäna (Rut 1:5).

8. ¿Diosat kun yatiñas Rutarojj wal muspharaypachäna?

⁸ Ukham llakinakanjja, ¿yaqha diosar yupaychatapajj Rutarojj yanaptʼpachänti? Janjamakiwa. Moab markanjja, walja diosanakaruw yupaychapjjerïna, maynïrejj Kemós sat wali uñtʼat diosänwa (Núm. 21:29). Amuyatatjja, moabitanakajj wawanakwa sacrificiot loqtapjjerïna, ukhamajj Rutan religionapajja, jan wali lurir qhoru jaqenakamp phoqhantatäpachänwa. ¡Israel markan Jehová Diosapajj janiw ukhamäkanti! Ukhamajj kuntï chachapasa jan ukajj Noemí suegrapas Diosapat yatichapkäna ukajj wal Rutarojj muspharaypachäna. Jehová Diosajj janiw Jupar ajjsarapjjatap layku yupaychayasiñ munkänti, jan ukasti munasiñat yupaychapjjaspa ukwa munäna (Deuteronomio 6:5 liytʼasiñapawa). Chachapan jiwatapatjja, Rutajj jukʼampiw suegrapar jakʼachaspachäna. Kunapachatï Noemí  warmejj taqe chʼamani Jehová Diosan muspharkañ luratanakapata ukat kunjamsa markaparojj wali munasiñamp uñji uka toqenakat parljjaykäna ukhajja, sumwa Rutajj istʼäna.

9-11. 1) ¿Noemí, Rut ukat Orfa warminakajj kuna amtarus puripjjäna? 2) Rut ukat Noemí warminakan sarnaqäwipatjja, ¿kunsa yateqsna?

⁹ Markapajj kunjamäskänsa ukjja Noemí warmejj yatjjatapunirïnwa. Inas mä alakip toqe akham sir istʼchïna: “Israel markanjja, janiw machʼajj utj-jjeti, Jehová Diosaw markapar khuyaptʼayjje” sasa. Cheqansa, Belén sutejj “Tʼantʼa Uta” sañ muni, ukhamajj wasitampiw israelitanakajj uka sutirjam sum jakasjjapjjäna. Uk yatisaw Noemí warmejj markapar kuttʼjjañ amtjjäna (Rut 1:6).

¹⁰ ¿Rutampi Orfampejj kunsa lurapjjpachäna? (Rut 1:7.) Jan walinakan uñjasisajja, suegrapampejj jukʼampiw yatthaptapjjäna. Amuyatatjja, Noemin wali khuyapayasirïtapa ukat iyawsäwinïtap uñjasaw Rutajj jupar jukʼamp jakʼachaspachäna. Qhepatjja, kimspachaniw Judá markar viajapjjäna.

¹¹ Chhijejj taqeniruw aynachtʼayi, suma jaqëskpas janisa, ukwa aka sarnaqäwejj uñachtʼayistu (Ecl. 9:2, 11). Ukat akwa yateqaraksna, mä familiasajj jiwani ukhajja, jankʼakiw mayninakan chuymachtʼäwip thaqhañasa, jukʼampisa, Jehová Diosar confiyapki ukanakaruw thaqhañasa (Pro. 17:17).

12, 13. ¿Kunatsa ‘utanakamar kuttjjapjjam’ sasin Noemejj yojjchʼanakapar sispachäna, ukat jupanakajj kamsapjjänsa?

¹² Kimsa viuda warminakaw thakinjam sarasipkäna. Kunja munasiñampis yojjchʼanakapajj juparusa ukat yoqanakaparus uñjawayapjje uk amtasaw Noemí warmejj wal llakisïna. Janiw jukʼamp tʼaqhesipjjañap munkänti. ‘Janiw nayanjj kunajas utjkituti, jupanakatï taqe kun jaytawayasin Belén markakam nayamp sarapjjani ukhajja, kuns jupanakar churä’ sasaw wal llaktʼasïna.

¹³ Noemí warmejj kunatï llakisiyki ukjja janiw imtʼirjamäjjänti, ukatwa yojjchʼanakapar akham säna: “Sarjjapjjam, kuttjjapjjam utanakamaru taykanakam thiyaru. Diosajj jumanakat khuyapayaspan, kunjamatï nayatsa ukhamarak wawanakajjatsa jumanakajj khuyapasipkista ukhama” sasa. Ukat Jehová Diosajj yaqha chachampi ukat mä machaq jakäwimpi bendispan sasaw sarakïna. Qellqatajj akham  saskakiwa: “Ukapachasti Noemí warmejj jupanakarojj jampʼattʼänwa jaytawayjjañataki, jupanakasti wal jachapjjarakïna” sasa. Orfampi, Rutampejj khuyaptʼayasiri ukat wali munasiri suegraparojj walpun munasipjjpachäna. Ukatwa akham sapjjpachäna: “¡Janiwa! ¡Nanakajj jumamp chikaw markamar sarañ munapjjta!” sasa (Rut 1:8-10).

14, 15. 1) ¿Kunanakarus Orfajj kuttʼañ amtäna? 2) Rut warmin markapar kuttʼañapatakejja, ¿kamsänsa Noemí warmejja?

¹⁴ Yojjchʼanakapar yanaptʼañatakejj janiw Noemin kunapas utj-jjänti, chachapas jiwatäjjänwa, ukat jupanakamp casarañatakejj janiw yaqha yoqanakapas utj-jjänti. ¡Janiw kunsa lurirjamäjjänti! Uk amuytʼapjjañapwa munäna. Ukat jumanakar jan yanaptʼasajj jukʼampiw llakisiristjja sasaw sarakïna. Orfajj sum amuytʼasisaw Moab markar kuttʼañ amtjjäna, familiapasa, utapas ukankänwa. Amuyatatjja, uk lurañaw jukʼamp askïna. Ukatwa suegrapar jampʼattʼasajj markapar kuttʼawayjjäna (Rut 1:11-14).

¹⁵ Rut warmejj Noemí warmir istʼasajj ¿kuttʼpachänti? ¡Janiwa! Qellqatajj akham saskakiwa: “Rut warmejj Noemí [suegrapamp] chikaw qhepharjjäna” sasa. Inas Noemejj sartaniwayjjchïna. Ukampis Rutan jupamp chika sartaniwayatap uñjasaw akham säna: “Uñtam, yojjchʼa masimajj markaparu, ukhamaraki diosanakaparuw kuttawayjje, jumasti jupamp chika sarjjarakim” sasa (Rut 1:15). Amuytʼañäni, Noemin arunakapajj ak qhanstayi: Orfajj janiw markaparuk kuttʼkänti, jan ukasti ‘diosanakaparuw’ kuttʼjjarakïna. Kemós ukat yaqha kʼari diosanakapar loqtaskakiñajj jupatakejj walikïskänwa. ¿Uka pachparakti Rut warmejj lurpachäna?

16-18. 1) ¿Kuna arunakampis Rut warmejj Noemir taqe chuyma munasitap uñachtʼayäna? 2) Wali munasirïtapatjja, ¿kunsa Rut warmejj luräna? (Pä warminakan fotonakapajj uñstki uk uñjjattʼäta.)

¹⁶ Rutajj Noemí suegraparusa ukat Noemí warmin Diosaparusa  wal munasïna. Ukhamajj kuntï lurañapäkäna ukjja sum yatïna. Panip sarkasaw Noemir uñkattʼasin Rutajj akham säna: “Jan mayistati jumat sarjjañajja, nayasti arkämaw kawkharutï sarkäta ukkharu, ukhamarakiw jakä kawkhantï jakkäta ukkhana. Juman markamajj markajjäniwa, Diosamasti, Diosajjarakïniwa. Nayasti, kawkhantï jumajj jiwkäta ukhanwa jiwarakï, uka cheqanarakwa imtʼatäñ munta. ¡Dios Tatitusti taqe chʼamapampi mutuyitpan, nayatejj jumat jitheqtirista ukapachajja. Jiwañakiw jumampiru nayampirojj jaljtayistani!” sasa (Rut 1:16, 17).

¹⁷ ¡Uka arunakapajj jan armkañapuniwa! 3.000 maranak pasatatsa, amtasiskakiwa. Ukat Rut warmin wali munasirïtapwa qhan uñachtʼayarakistu. Noemí suegraparojj taqe chuymaw munasïna, ukatwa kawkharüskpasa jupamp chika sarañ munapunïnjja, janiw jaytañ munkänti. Jiwañakiw jupanakarojj jaljtayasapäna. Noemin markapan jakasiñatakisa, Moab markapa ukat diosanakap jaytañatakisa janiw Rutajj pächaskänti. Orfat sipansa, Jehová Diosaruw taqe chuyma serviñ munäna. *

¹⁸ Panpachaniw Belén markar sarki uka thaknam sarasipkäna. Belén markar puriñkamajj mä semanaw sarapjjpachäna. Ukampis panin sarkasajj janiw sint llakisipkpachänti.

19. Tamansa, familiansa ukat amigonakampisa, ¿kunjamsa Rut warmin wali munasirïtapat yateqassna?

¹⁹ Jichhürunakanjja, kunayman tʼaqhesiñanakanwa uñjastanjja. Kunjamtï Bibliajj siskejja, ‘jan wali tiemponakanwa jaktanjja’ ukatwa ukham tʼaqhesiñanakajj utji (2 Tim. 3:1). Ukatwa kunjamtï Rut warmejj munasiñ uñachtʼaykäna ukham munasiñ uñachtʼayañatak wal chʼamachasiñasa. ¿Kunjamatsa? Jan wali pachan jakkasas suma luräwinak lurañatakiw wal chʼamachasiñasa. Khititejj ukham munasirïki ukajja, khitirutï munaski ukarojja, kunas kunäpan janipuniw jaytanukkiti. Chacha warmi jakasiñansa, familia taypinsa, tama taypinsa ukat amigonakamp sum apasiñatakisa, uka kasta munasiñajj wali wakiskiripuniwa (1 Juan 4:7, 8, 20 liytʼasiñapawa). Jiwasatï ukham munasir jaqëñäni ukhajja, Rutat yateqasitaswa uñachtʼayañäni.

20-22. 1) Moab markanjja, ¿kunjamsa Noemí warmejj jakaspachäna? 2) Noemí warmejja, ¿tʼaqhesitapat kamsänsa? (Santiago 1:13 uñjjattʼäta.)

²⁰ Laka mayak munastwa sasin sañampi ukat cheqpach munasiñ  uñachtʼayañampejj janiw pachpäkiti. Rutajj Noemir taqe chuyma munasitapjja, luratanakampiw uñachtʼayäna, Jehová Diosarus uka kikparaki. Cheqansa, jupaw uka Diosar serviñ ajllïna. Ukampis Kunjams uk luräna uk jichhajj uñjañäni.

²¹ Jupanakajj Belén markaruw purjjapjjäna, uka markajj Jerusalenat 10 kilometronak aynach toqenkänwa. Belenar puripjjäna ukhajja, jaqenakajj wali sum jupanakar katoqapjjäna. Amuyatatjja, Noemí warmisa ukat familiapasa wali uñtʼatäpjjänwa, ukatwa warminakajj jupar uñjasajj akham jisktʼasipjjpachäna. “¿Janit akasti Noemí warmiki?” sasa. Cheqas kunjamsa Moab markan tʼaqhesiwayäna ukajj ajanupanwa qhan amuyaspachäna (Rut 1:19).

²² Noemejj llakinakapwa familiaranakaparusa ukat utap jakʼankirinakarusa yatiyäna. Jan Noemí sapjjestati, jan ukasti, Mara sapjjeta sasaw warminakar säna. Noemí sutejja, “Mojjsa” sañ muni ukat Mara sutejj “Kʼallkʼu” sañ munaraki. Jupajj ¡wali llaktʼatapunïnwa! Job chachjamarakiwa, Jehová Diosaw ukham tʼaqhesiypachitu sasin amuyäna (Rut 1:20, 21; Job 2:10; 13:24-26).

23. ¿Kuna toqetsa Rut warmejj llakisïna, ukat pobrenakar yanaptʼañatakejj kamsänsa Leyinakajja? (Qhanañchäwip uñjjattʼäta.)

²³ Jukʼat jukʼatwa uka pä warminakajj Belén markan yatinoqtapjjäna. Rut warmejj kunjamsa jupa pachpasa ukat Noemí suegraparus uñjani uka toqetwa llakisïna. Ukampis Jehová Diosajj israelitanakar Leyinak churkäna ukarjamajja, yapu apthapisajj janiw taqe apthapipjjañapäkänti, jan ukasti pobrenakatakiw thiyanakjja (qawaya) jiltʼayapjjañapäna, ukwa Rut warmejj yatjjatäna. Yapu apthapiñ horasajj purinjjäna ukhajja, pobrenakajj yapu apthapirinakan qhepapwa kuntï jiltʼayapkäna uk apthapisis sarapjjañapäna. Ukat yapu esquin thiyanakan achkäna ukanaksa apthapipjjarakispänwa (Lev. 19:9, 10; Deu. 24:19-21). *

24, 25. Booz sat chachan oraqepar purisajja, ¿kunjamsa Rutajj irnaqañ qalltäna, ukat cebada yawthapirinakan qhepap apthapisis sarañajj kunjamakïnsa?

 ²⁴ Cebada apthapiñ horasäjjewa (calendariosarjamajj abril phajjsipachänwa). Inach khitis yapujan apthapisiskam sitani sasaw Rutajj irnaqer mistuwayäna. Ukat jan yatkasaw Booz sat chachan oraqepan irnaqañ qalltäna, jupajj jachʼa oraqenïnwa ukat Noemin jiwir chachapan parienteparakïnwa. Leyirjamaw Rutajj cebada jiltʼanak apthapisiskakisapäna, ukampis cebada apthapiyir waynaruw apthapisiñatak rogtʼasïna. Jupasti apthapisiskakim sasaw säna, ukat Rutajj jankʼakiw apthapisiñ qalltäna (Rut 1:22–2:3, 7).

²⁵ Cebada yawthapirinakajj yawthapiñ qalltapjjäna ukhaw Rutajj jupanak qhep sarañ qalltarakïna. Kunanaktï jaytapkäna, jan ukajj willeqtayasipkäna uk apthapisisaw saräna, ukatjja, mä cheqar apthapisaw chintʼäna, ukhamat granonak apsuñataki. Uk lurañajj chʼamakïnwa ukat jukʼamp urutatjjepanjja, jukʼamp chʼamänwa. Ukampis Rutajj irnaqaskakïnwa, jumpʼip pichaqtʼasiñataki ukat manqtʼasiñatakikiw mä jukʼa samartʼäna.

26, 27. Booz chachajja, ¿kunjam jaqënsa, ukat kunjamsa Rut warmir uñjäna?

²⁶ Rutajj janiw taqenimp uñjayasiñ munkpachänti. Ukampis Booz chachajj jupar uñjasinjja, “¿khitis jupajja?” sasaw cebada apthapiyir waynar jisktʼäna. ¿Kunjam jaqënsa Booz chachajja? Rutat walja maranak jilïrïnwa, ukatjja iyawsäwini ukat Diosar wal munasiri jaqënwa. Irnaqerinakaparojj akhamwa aruntirïna: “Diosasti jumanakampïpan” sasa. Ukat irnaqerinakapajja, yaqha markat jutirinakasa ukat mä urutak irnaqerinakasa, ukhamarakwa  jaysapjjerïna. Ukat Rutatjja, mä phuchapatjamwa llakisïna (Rut 2:4-7).

²⁷ Ukatwa “wawa” sasin säna. Ukat akham sasarakiw ewjjtʼäna: “Akan irnaqtʼaskakim ukat jan khitis jumar jan wali amtamp parljjayañapatakejja, mayni tawaqonakamp chikaw irnaqäta” sasa. Ukatjja, manqʼañ horasansa janiw jupat armaskänti (Rut 2:8, 9, 14 liytʼasiñapawa). Ukat “sum irnaqtʼasktajja” sasaw chʼamañchtʼarakïna. ¿Kunatsa?

28, 29. 1) Rut warmejja, ¿kunjam warmit uñtʼatänsa? 2) ¿Kunjamsa Rut warmit yateqasisajj Jehová Diosar imantassna?

²⁸ “Yaqha markatätwa, ¿kunatsa wali khuyaptʼayasiñamp uñjista?” sasaw Rutajj Booz chachar jisktʼäna. Taqe kuntï Noemí layku lurkta ukjja sum yattjja sasaw uka chachajj sarakïna. Cheqansa, Belenankir warminakarojj sumwa Noemejj wali munat yojjchʼapat parlpachäna. Ukat Jehová Diosar loqtañ munatapsa Booz chachajj yatirakïnwa, ukatwa akham säna: “¡Diosaw jumar kuttʼayjjätam! ¡Israel markan Diosaparu thaqktajja ukaw bendecïtam taqe luratanakamata!” sasa (Rut 2:12).

²⁹ ¡Uka arunakajj Rutarojj wal chuymachtʼpachäna! Cheqansa, Jehová Diosan chheqhaparuw imantasïna, kunjamtï mä jiskʼa chhiwchhejj taykapan chheqhapar imantaski ukhama. Booz chachar yuspärtʼasaw Rutajj jaypʼukam irnaqaskakïna (Rut 2:13, 17).

30, 31. ¿Kunjamsa Rut warmin sarnaqäwipajj taqe chuyma munasirïñasataki, yuspärasirïñasataki ukat irnaqerïñasatak yanaptʼistu?

³⁰ Akapachan qollqe jikjjatañajj wali chʼamäjjewa, ukhamajj Rutan iyawsäwipat yateqasiñajj wali askipuniwa. Jupajj yanaptʼapjjchitaniy sasakejj janiw suykänti ukat yanaptʼañ munapkäna ukhasa, wal yuspäräna. Ukat munat suegrapar sum uñjañatakejj wal irnaqtʼäna, janirakiw irnaqäwipatsa phenqʼaskänti. Khitinakampisa ukat kunjamsa irnaqtʼañapa uka toqet ewjjtʼapkäna ukhajja, taqe chuymaw katoqtʼasïna. Ukat khitis jupar yanaptʼaskäna ukjja, janiw armaskänti. Jïsa, Jehová Diosaw yanaptʼaskäna.

³¹ Jiwasatï Rutjam taqe chuym munasiñ uñachtʼayañäni, altʼat chuymanïñäni, yuspärasirïñäni ukat jupjam irnaqtʼirïñäni ukhajja, mayninakajj iyawsäwisat yateqasipjjarakiniwa. Ukampis Jehová Diosajj ¿kunjamsa Rut warmiru ukat Noemí warmirojj uñjpachäna? Ukwa jutïr yatichäwin uñjaskañäni.