1, 2. 1) ¿Kunanaksa Rutajj luräna? 2) ¿Kunas Diosan Leyinakapata ukat markapata Rutar wal muspharayäna?

CEBADA yawthapit montón jakʼaruw Rutajj qonqortʼasïna. Jaypʼuntjjatapatwa walja irnaqerinakajj qollu patan jikjjataskäna uka Belén jiskʼa markar kuttʼapjjäna. Rutajj jornalpach irnaqasaw wali qarit jikjjataspachäna. Ukampis lurañanakapajj utjaskakïnwa. Jichhajj cebada apthapkäna uk jawqʼsuñapänwa. Ukampis uka urojj jupatakejj wali suma urupunïnwa, janiw ukhamäniw siskpachänti.

² ¿Rutajj sumti qamasjjpachäna? Kunjamtï pasïr yatichäwin yateqtanjja, Rutajj Noemí suegrapampiw sarjjañ amtäna ukat ‘janipuniw jaytanukkamati, Jehová Diosamasti Diosajarakïniwa’ sasaw säna. Uka pä viudanakajj Moab markatwa Belén markar puripjjäna. Diosajj israelitanakar churkäna uka Leyinakajja, yaqha markatäsipkpansa, pobrenakaruw yanaptʼäna, ukwa Rutajj amuyäna. Ukat kunjamsa uka markankirinakajj Diosan Leyinakaparjam sarnaqapjjäna uksa amuyarakïnwa, yaqhepajj jukʼamp khuyaptʼayasiri ukat Dios chuymäpjjänwa, uk uñjasarakiw Rutajj wali chuymachtʼat jikjjatasïna.

3, 4. 1) ¿Kunjamsa Booz chachajj Rutar chʼamañchtʼäna? 2) Jan qollqeni jikjjatasiñäni ukhajja, ¿kunjamsa Rutan sarnaqäwipajj yanaptʼistaspa?

³ Booz sat qamir israelitaw khuyaptʼayasir chuymanïna, uka urojj jupan oraqepanwa Rutajj cebada yawthapisïna. Booz chachajj jilïrïnwa ukat phuchaparjamaw Rutar uñjäna. Suegrapar sum uñjatapata ukat cheqpach Diosan yanaptʼap thaqhatapatjja, kunja suma arunakampis uka chachajj parljjayäna uk sumwa Rutajj amtaspachäna (Rut 2:11-14 liytʼasiñapawa).

⁴ Ukampis “nayat kunakïkani” sasaw Rutajj llakispachäna. Jupajj pobre, viuda ukat jan wawanakan warmïnwa. Ukhamajj ¿kunjamsa kunatï jakañatak munaskäna uk jikjjatasapäna? ¿Cebada yawthapisakit sum qamasipjjasapäna? Ukat ¿chuymanëjjasajj khitis jupar uñjasapäna? Cheqas wal llakispachäna. Jichhürunakanjja,  qollqe jikiñajj wali chʼamawa, ukatwa waljanejj Rut warmjam wal llakisipjjaraki. Kunjamsa iyawsäwinïñajj Rutar wal yanaptʼäna uk amuyasaw jupat wal yateqasiraksna.

5, 6. 1) ¿Kunsa Rutajj Booz chachan oraqepan irnaqasajj jikjjatäna? 2) Rutar uñjasajja, ¿kunjamsa Noemejj jikjjatasïna?

⁵ Rutajj cebada jawqʼsuñ tukuyjjäna ukat granonak apthapjjäna ukhaw waljätap amuyasïna. Niya 14 kilonakänwa. Ukhamajj mä mantelar chintʼasaw pʼeqe patjjar taqe ukanakak appachäna. Ukat arumthapkipanjja, Belén markaruw kuttʼawayjjarakïna (Rut 2:17, NM).

⁶ Rutajj purinjjäna ukhajja, wal Noemejj kusispachäna ukat walja granonak apanir uñjasajj jukʼampiw kusispachäna. Ukat Booz chachajj irnaqerinakapar churkäna uka manqʼa jiltʼanakwa Rutajj aparakïna ukat panpachaniw manqʼasipjjäna. Ukhaw Noemejj akham jisktʼäna: “¿Kawkhansa jichhürojj trabajta? ¿Kawkhataraki walja cebada puyanak apthapinta? ¡Bendecitäpan kawkïri jaqetejj ukham yanapktam ukajja!” sasa (Rut 2:19). Walja cebada apanitap uñjasajja, mayniw jupar yanaptʼpachäna ukat khuyapayasiñamp uñjarakpachäna sasaw Noemejj amuyasïna.

7, 8. 1) ¿Booz chachan suma luratanakapajj khitit jutatapsa Noemí warmejj amuyäna, ukat kunatsa? 2) ¿Kunjamsa Rutajj suegrapar wal munasitap laykojj jan jaytanukutap uñachtʼayäna?

⁷ Panpachaniw parltʼasipjjäna ukat uka urojj kunja suma chuymampis Booz chachajj jupar uñjatayna ukwa Rutajj Noemir awistʼäna. Uk istʼasajj akham sänwa: “¡Diosasti juparojj bendispan! Jupasti jichhajj jiwasarojj sum uñjistu, kunjamatï nayrajj jiwirinakampi lurkäna ukhama” sasa (Rut 2:20). Kunjamtï uñjtanjja, Booz chachan suma luratanakapajj cheqans Jehová Diosatwa juti, sasaw Noemejj amuyasïna. ¿Kunatsa? Jupaw suma luräwinak lurapjjañapatakejj servirinakapar chʼamañchtʼi. Ukat ukham yanaptʼapjjatapatjja, bendicirakiwa (Proverbios 19:17 liytʼasiñapawa). *

⁸ “Booz chachan oraqepan irnaqtʼaskakim ukat kunjamtï jupajj sisktamjja, ukan irnaqer tawaqonakampiw irnaqäta, ukhamat yaqha chachanakajj jan wali amtampi jan parlapkätamti” sasaw Noemejj Rutar säna. Rutajj iyaw sänwa ukat kunjamtï Biblian siskejja, ‘suegrapamp chikarakiw jakäna’. Ukhamajj Rutajj wali  munasiñampiw Noemí warmir uñjäna ukat janipuniw jaytanukuñ munkänti (Rut 2:22, 23). Familiasajj jiwasan yanaptʼas munapjje ukhajja, ¿jupanakar yanaptʼtanti? Kunjamsa jupanakar munasiñamp uñjktan ukat jan jaytanuktan uk sumwa Diosajj uñjaski.

9. Noemin ukat Rutan sarnaqäwipajja, ¿kunsa familia toqet yatichistu?

⁹ ¿Rutampi ukat Noemimpejj mä familiäpjjänwa sasin sissnati? Mä familianjja, awki, tayka, wawanaka ukat abuelitonakaw utjañapa sasaw yaqhepajj sapjje. Ukampis kunjamtï Rutan ukat Noemin sarnaqäwipan uñjtanjja, familiasajj jiskʼäskpasa, jiwasatï Jehová Diosar serviñäni ukhajja, wali kusisitaw sarnaqassna ukat munasiñsa utjarakispawa. ¿Qawqsa familiasar munastan? Maysa toqetjja, jan familianïpki ukanakajja, tama taypinwa yaqha familia jikjjatapjjaspa sasaw Jesusajj sarakïna (Mar. 10:29, 30).

10. Rutar yanaptʼañatakejja, ¿kunsa Noemejj lurañ munäna?

¹⁰ Rutajj Booz chachan oraqepanwa cebada apthapiñ tiempota (abril phajjsina), trigo apthapiñ tiempokam (junio phajjsina) irnaqäna. Tiempo paskipanjja, “¿kunjamsa munat yojjchʼajar yanaptʼiristjja?” sasaw Noemejj llakispachäna. Moab markat janïr mistkasajja, “janipuniw wasitat casarasiñapatak Rutar yanaptʼkiristi” sasaw amuyasïna (Rut 1:11-13). Ukampis janiw ukham amuyjjänti, ukatwa Rutar akham säna: “Wawa, nayasti jumatakejj mä chacha thaqañajjawa, jumar sum uywañapataki” sasa (Rut 3:1). Khä tiemponjja, awk taykaw khitimpis wawapajj casarasini uk ajllipjjerïna. Cheqansa, mä phuchaparjamaw Noemejj Rutar uñjäna. Ukatwa casarasiñapataki ukat sum jakasiñapatak mä chacha Rut warmitak jikjjatañ munäna. Ukampis ¿kunsa Noemejj lurasapäna?

11, 12. 1) ‘Juparuw jiwasar qhespiyañapajj waktʼi’ sasajja, ¿kunsa Noemejj sañ munäna? 2) ¿Kamsänsa Rutajj Noemí warmin mayitaparojja?

¹¹ Rutajj Booz chachat Noemir awisäna ukhajja, “uka jaqesti jiwasan parientesawa, ukatwa jiwasaru qhespiyañapajj waktʼi” sasaw Noemejj säna (Rut 2:20). ¿Kunsa ukampejj sañ munäna? Diosajj israelitanakar churkäna uka Leyinakjja, pobrenakaru, viudanakaru ukat wajchanakaru sum uñjapjjañapatakiw yanaptʼäna. Mä warmejj jan wawanïsajj viudaptäna ukhajja, wal llakisïna. Janiw khitis chachapan sutip apkasapänti. Ukampis Diosan Leyiparjamajja,  jiwirin jilapaw viudamp casarasiñapäna, ukhamat jiwirin sutip jan chhaqañapataki ukat herencia katoqañataki mä wawanïsapäna (Deu. 25:5-7). *

¹² Kun lurañapsa munäna ukwa Noemejj Rutar qhanañchäna. ¡Uk istʼasajj wal Rutajj muspharpachäna! Janïraw uka markan leyinakap sum uñtʼkänti ukat yaqhep luräwinakajj jupatak mayjänwa. Ukampis Noemir wal respetatap laykuw jupar sum istʼäna. Kuna lurañtï jupar maykäna ukajj janiw phoqhañjamäkpachänti ukat mä jukʼa phenqʼasirakpachänwa. Ukampis suma chuymampiw Rutajj akham säna: “Taqe kunanaktejj ewjjawaykistajja ukanakjja luräwa” sasa (Rut 3:5).

13. Jilïrinakajj ewjjtʼapjjestani ukhajja, ¿kunatsa Rutan sarnaqäwipat amtasiñasa? (Job 12:12 uñjjattʼäta.)

¹³ Awisajj wayn tawaqonakajj janiw jilïrinakan ewjjtʼanakap istʼañ munapkiti. “Wayn tawaqonakajj kuna jan walinakansa uñjastan ukjja, janiw jupanakajj amuyapkaspati” sasaw sapjje. Ukampis jilïrinakan ewjjanakap istʼañajj wal yanaptʼistaspa, jupanakajj yatiñampiw ewjjtʼapjjestu ukat jiwasar wal munasipjjatap laykuw kunatï jakäwisatak askïki uk sapjjestu, ukwa Rutan altʼat chuymamp sarnaqatapajj amtayistu (Salmo 71:17, 18 liytʼasiñapawa). Ukampis ¿kamsänsa Noemejj Rut warmirojja? Ukat jupar istʼañajja, ¿Rutatakejj askïpachänti?

14. ¿Kunjamsa cebada jawqʼsuñ ukat khuysuñ cheqan irnaqasirïna?

¹⁴ Jaypʼuntjjäna ukhaw Rutajj kawkharutï yawthapirinakajj cebada jawqʼsupjjerïna ukat khuysupjjerïna uka cheqar saräna. Kawkhantï jaypʼu toqer thayajj wal thaytʼanirïkäna ukharuw ukanak lurir sarapjjerïna, inas qollu patarüchïna. Ukat uka cheqajj pampakïñapänwa. Cebada granonakan pajanakap apsuñatakejja, mä lampampi, jan ukajj yaqha ukhamampiw altor qhalltʼas khuysupjjerïna, ukhamatwa thayajj pajanak apaqjjerïna ukat granonakakiw oraqer jalartjjerïna.

15, 16. 1) Booz chachajj irnaqañ tukuyjjäna ukhajja, ¿kunas pasäna? 2) ¿Kunjamsa Booz chachajj mä warmiru kayup toqen ikiskir amuyasïna?

¹⁵ Kunjamsa yawthapirinakajj irnaqañ tukuyasipkäna ukwa Rutajj jan uñjayasis uñchʼukiskäna. Uka urojj wal apthapipjjäna. Kunjamsa irnaqapjjäna ukwa Booz chachajj sum uñjäna ukat arum toqeru manqtʼasisajja, grano montón jakʼaruw iktʼasjjäna. Khä tiemponjja, jan lunthatayasiñatakejj ukhampunwa lurapjjerïna. Booz chachar iktʼjjer uñjäna ukhajja, “jichhaw kuntï Noemejj sawaykitu uk lurañajäjja” sasaw Rutajj amuytʼaspachäna.

¹⁶ Wal ajjsarayasisaw Rutajj Booz chachar kʼachat jakʼachasïna ukat suma ikiskir uñjasajja, kuntï suegrapajj siskäna uk luräna. Uka chachan kayupat janarasaw uka jakʼan iktʼasïna. Ukan suyañajj Rutatakejj wali jayäpachänwa. Chika arumaruw Booz chachajj wasitat janjjatasiñatak sarthapïna ukhaw kunjamtï Biblian siskejja, “mä warmiruw kayup toqena iktʼat uñjäna” (Rut 3:8).

17. Rutan luratapajj janiw walïkänti sapki ukanakajja, ¿kuna pä toqetsa armasipjje?

 ¹⁷ “¿Khitïtas jumajja?” sasaw Booz chachajj Rutajj jisktʼäna ukat ajjsarayasisaw akham säna: “Nayasti Rut uywatamatwa. Jumasti nayan parientejjätawa, ukatwa jumarojj waktʼtam nayar qhespiyañamajja. Jichhasti aka uywatamarojj ikiñamampi janjjatam” sasa (Rut 3:9). Jichhürunakan Biblia toqet parlakipirinakajja, Rutajj jan wali qʼañu amtampiw ukanak luräna ukat säna sasaw sapjje. Ukampis akanakwa armasipjje. Maya, kuntï uka urunakan lurapkäna ukakwa Rutajj luraskäna, Jichhürunjja janiw ukanakajj sum amuyaskiti. Ukhamajj kuna jan walinaktï jichhürunakan lurapki ukhamarjam jupan sarnaqäwip uñjañajj janiw askïkaspati. Paya, Booz chachan arsutaparjamajja, Rutan luratapajj janiw jan walïkänti, antisas ukham luratapatwa jachʼañchäna.

18. ¿Kuna chʼamañchkir arunaksa Booz chachajj Rutar säna, ukat kunapachas Rutajj munasirïtap uñachtʼayäna?

¹⁸ Booz chachajj suma arunakampiw akham säna: ‘¡Diosasti jumarojj bendispan! Nayrat sipansa, jichhaw kunja munasiñamas utji uk uñachtʼayistajja. Jumasti casarasiñ munasajj nayat jukʼamp wayna jaqe thaqhasisamäna, pobrsa, qamirsa; ukampis janiw ukham lurktati’ sasa (Rut 3:10, NM). ‘Nayrat sipansa’ sasajja, Rutajj Noemí warmiru jan jaytanukusa Israel markar sarjjäna ukat uka markan jupar sum uñjañ amtäna, ukjjatwa parlaskäna. Ukat ‘jichhaw’ sasajja, kunjamsa Rut warmejj casarasiñatak qamiri, jan ukajj pobre waynanak jan thaqkäna, ukjjatwa parlaskarakïna. Cheqansa, Rutajj janiw Noemí warmin askipak thaqkänti, jan ukasti Noemin jiwir chachapan askipwa thaqharakïna. Uka chachan sutip jan chhaqhañapatakiw Rutajj wal chʼamachasïna. Jupajj khuyaptʼayasiri ukat mayninakan askip thaqherïnwa, ukatwa Booz chachajj wal muspharpachäna.

19, 20. 1) ¿Kunatsa Booz chachajj ukspach Rutamp jan casarasiñ amtkäna? 2) ¿Kunjamsa Booz chachajj Rutat llakisitap uñachtʼayäna?

¹⁹ Booz chachajj saskakïnwa: “Jichhasti jan ajjsaramti, wawa, aka markajjanjja taqeniw yatipjje juman suma sarnaqerïtamjja. Ukatsti nayajj luräwa taqe kuntejj maykista uka” sasa (Rut 3:11). Rutampi casarasiñ munänwa ukat “uk maypachïtaniwa” sasajj inas amuyarakchïna. Ukampis Booz chachajj cheqapar sarnaqerïnwa ukat janiw jupan askipak thaqherïkänti. Ukatwa “Noemin chachapan yaqha jakʼa parientepaw utji, jupaw jumamp casarasispa. Ukhamajj jupamp parliriw sarä” sasin Rutar säna.

 ²⁰ Ukat akham saskakïnwa: “Willjtakam akan iktʼasim ukat jan khitin uñjkataw arumanthejj sarjjäta” sasa. Jupajj janiw Rutatsa ni jupatsa jan wal parlapjjañap munkänti. Cheqansa, uka pampat Rutar sarjjer uñjasajja, “jan walinakwa lurapjjpacha” sasaw jaqenakajj amuyapjjasapäna. Booz chachajj suma arunakampiw mayitapar iyaw säna, ukhamajj jan llakinikiw Rutajj uka cheqan iktʼasjjäna. Chʼamakäskipanwa Rutajj uka cheqat Belenar sarjjañatak sarthapïna, ukampis janïr sarkipanwa Booz chachajj walja granonak wajjtʼäna (Rut 3:13-15 liytʼasiñapawa). *

21. ¿Kunatsa Rutajj ‘suma sarnaqerit’ uñtʼatäna, ukat kunjamsa jupat yateqassna?

²¹ “Taqeniw yatipjje juman suma sarnaqerïtamjja” sasin Booz chachar sir istʼäna ukhajja, wal Rutajj kusispachäna. Cheqansa, Jehová Diosar wal uñtʼañ munatapata ukat Jupar serviñatak wal chʼamachasitap laykuw ukham suma uñtʼatäpachäna. Ukatjja, wali munasiñampiw Noemir uñjäna ukat janis sum uñtʼkchïnjja, judionakan costumbrenakaparjam jakañatakiw wal chʼamachasïna. Jiwasatï Rutan iyawsäwipat yateqasiñäni ukat yaqha sarnaqäwinïsipkpansa, yaqhanakar yanaptʼañäni ukhajja, ukhamarakiw suma sarnaqerit uñtʼatäñäni.

22, 23. 1) Booz chachajj Rutar churkäna ukajja, ¿kamsañsa munpachäna? (Qhanañchtʼäwip uñjjattʼäta.) 2) ¿Kamsänsa Noemí warmejj Rutarojja?

²² Rut warmejj utar purjjäna ukhajja, akham sasaw Noemejj jisktʼäna: “¿Kunjamas sarnaqanta, wawa?” sasa. ¿Kunatsa ukham jisktʼpachäna? Rutajj nayrjam sapaki viuda warmikïskänti, jan ukajj casarasiñ amtanëjjäncha ukwa Noemí warmejj yatiñ munpachäna. Ukspachaw Rutajj kunanakas pasäna uk awisäna ukat Booz chachajj ‘cebada churaniwaykäna’ uksa churarakïnwa (Rut 3:16, 17, NM). *

²³ Noemí warmejj wali yatiñampiw Rutar ewjjtʼäna. Jichhürojj cebada yawthapir sarañat sipansa, akanak qheparam sänwa. Ukat saskakïnwa: ‘Uka jaqejj jichhürojj janiw samarkaniti, uka toqet sum tukuyañkama’ sasa (Rut 3:18).

24, 25. 1) ¿Kunjamsa Booz chachajj cheqapar sarnaqeri ukat mayninakan askip thaqheri chachätap uñachtʼayäna? 2) ¿Kuna bendicionanaksa Rutajj katoqäna?

 ²⁴ Booz chachajj uka urpachaw Belén marka punkur saräna, ukanwa markankir jilïr jaqenakajj tantachasipjjerïna. Ukat Noemí warmin Elimelec sat jiwir chachapan jakʼa parientep pasañapkamaw ukan suyäna. Ukat jilïr jaqenakan nayraqatapanwa Rutamp casarasiñapatak parläna. Ukhamatwa qhespiyaspäna. Ukampis herenciap jan aptʼasiñ laykuw uka chachajj jan casarasiñ munkänti. Ukhamajj uka jaqenak nayraqatanwa Booz chachajj akham säna: ‘Noemí warmitwa alasjjta taqe kunatï Elimelec sat chachapan utjkäna ukanaka, ukat nayaw jiwiri Mahlón chachan Rut sat viuda warmipamp casarasï’ sasa. ¿Kunatsa ukham lurpachäna? Jupa pachpaw saskakïna: “Ukhamatsti janiw Mahlón chachan sutipajj chhaqtkaniti jupanak taypinjja, ni aka markansa armatäkaniti” sasa (Rut 4:1-10). Booz chachajj cheqapar sarnaqeri ukat mayninakan askip thaqheri chachänwa.

²⁵ Booz chachajj Rut warmimpiw casarasïna ukat kunjamtï Biblian siskejja, ‘wawanïñatakiw Rutajj usur jaqeptäna’. Belén markankiri warminakajj wal Noemir jachʼañchapjjäna, ukat ‘yojjchʼamajj paqallqo yoqall wawat sipansa jukʼampiwa’ sasaw sapjjäna. Tiempompejja, Rutan wawapajj David reyin achachilapäjjänwa (Rut 4:11-22). Ukat Davitajj Mesiasan achachilapäjjarakïnwa, mä arunjja, Jesucriston nayra awkipänwa (Mat. 1:1). *

26. ¿Kunsa Rut warmina ukat Noemí warmin sarnaqäwinakapajj amtayistu?

²⁶ Rutajj walja bendicionanakwa katoqäna. Noemí warmis ukhamaraki, jupaw Rutan wawapar sum uñjañ yanaptʼäna, pachpa wawapäkaspas ukhama. Jehová Diosajj markapat jan jitheqtiri servirinakapat janiw armaskiti. Jupanakajj janis suma trabajonakan irnaqapkchi ukhasa, familiapar yanaptʼañatakiw wal chʼamachasipjje. Jehová Diosajj taqe chuyma servirinakarojj wal bendicini, kunjamtï Booz chacharu, Noemiru ukat Rut warmir bendicïna ukhama.