Jesucristox Jehová Diosan wali munasita Yuqapawa. Janir aka Uraqiru jutkasaxa, Jesusax jachʼa chʼamani mä ajayjamaw alaxpachan jakäna (Juan 17:5). Ukatsti kunatix Diosat chiqäki uk jaqinakar yatichañatakiw Uraqiru jutatayna (Juan 18:37). Ukhamaraki, istʼasiri jaqinakaru juchampita jiwañampita qhispiyañatakiwa jakäwip luqtasiwayi (Romanos 6:23). Jichhaxa alaxpachankir Diosan Reinopanwa Jesusax Apnaqirit uttʼayata aka Uraqiru kusipachaptayañapataki (Apocalipsis 19:16).

Angelanakaxa Diosan munasitanakapäpxarakiwa. Angelanakaxa janiw aka Uraqina jaqinakjama yuritäpkiti. Diosax janir Uraq chhijnuqkasawa alaxpachanxa angelanak luratayna (Job 38:4-7). Millón millón angelanakaw utji (Daniel 7:10). Diosan alaxpachankir munasitanakapaxa munapxiwa jaqinakaxa Jehová Diosat chiqa yatiqapxañapa (Apocalipsis 14:6, 7).

Uraqinxa Diosax munasitanakapanirakiwa; qhanañchirinakapa satäpxiwa. Juchanak tʼaqiri nayraqatanxa, mä qhanañchirixa kuntix uñjki yatki ukanakwa qhanañchi. Jehová Diosan Qhanañchirinakapaxa Jehová Diosatwa jaqinakaru yatiyapxi ukhamaraki Jupan amtapampita (Isaías 43:10). Angelanakjamarakiwa, Qhanañchirinakaxa Jehová Diosata chiqa yatiqañama munapxi. Jumax Diosan munasitapäsma ukwa munapxaraki.