Jan walinakana llakita uñjasisajja, awisajj wali qaritaw uñjassna, chʼamasas janiw utj-jjestaspati. Ukhaman uñjasisajja, Ezequielajj kuntï Diosaruk mayamp adorañat qellqkäna uka arunakat lupʼiñaw chʼamañchtʼistaspa. ¿Kunatsa ukham sistanjja? Diosatï qʼala wañsut chʼakhanakar jaktayañatak chʼamanïchejja, kuna jan walinakar atipjañatï jiwasatak chʼamäki ukanakar saykatañatakejj chʼam churarakistaspawa, ukwa uka profeciajj yatichistu (Salmo 18:29 liytʼañataki; Filip. 4:13).

Ezequielat walja maranak nayra jakir Moisesajja, Jehová Diosajj servirinakapar yanaptʼañatakejj chʼamaniwa, wal yanaptʼañ munaraki sasaw säna. Jupajj akham sänwa: ‘Nayra tiempotpachas Diosajj jarkʼaqasiriwa, wiñay amparanakapas jumar katjjasisktamwa’ sasa (Deut. 33:27). Ukhamajj jan walinakan uñjasisin aynachtʼatäkañäni ukhajj Diosaruw jakʼachasiñasa, ukham lurañäni ukhajj munasiñampiw jupajj uñjistani, munasiñampiw chʼamañchtʼistani yanaptʼarakistani (Ezeq. 37:10).