1-3. ¿Jerusalenankir templon Ezequielan kun uñjañapsa Jehová Diosajj munäna, kunatsa? (Sección 2 uñjjattʼäta).

 NIYAKEJJAY Ezequielajj mä sacerdoten wawapächïnjja, Moisesan leyinakap sum uñtʼpachäna. Jerusalenankir templojj kunjamänsa, kunjamsa ukan Diosar adorasiñapäna uksa yatirakpachänwa (Ezeq. 1:3; Mal. 2:7). Ukampis 612 antes de Cristo (a.C.) maranjja sinti jan walinakwa templon lurjjapjjäna, ukajja Jehová Diosar taqe chuym servir judionakarusa Ezequielarusa wal chuym ustʼaypachäna.

² Diosajj kuna jan walinakatï templon pasaskäna uk Ezequielan uñjañapwa munäna, ukhamat Babiloniar apatäpkäna uka Judá markan ancianonakapar yatiyañapataki, jupanakajj Ezequielan utapan tantachatäsipkänwa (Ezequiel 8:1-4 liytʼañataki; Ezeq. 11:24, 25; 20:1-3). Diosajj espíritu santo toqew Ezequielarojj mä visión uñjayäna, Babilonia markan Kebar jawira jakʼankir Tel-Abib lugarankir utapankaskäna ukhaw jupajj mä visionan Jerusalenar apatänjja. Jerusalenajj Babiloniat inti jalanta toqen wali jayankänwa. Diosajj temploruw Ezequielar apäna, norte toqer irpki uka manqhankir pation punkuparu. Ukawjat qalltasaw mä visionan taqpach templo uñjayäna.

³ Ukatsti Ezequielajj pusi jan walinakwa uñjäna, ukajja Diosar adorañat qhawqsa jaqenakajj saranukupjjäna ukwa uñachtʼayäna.  ¿Kunjamsa Diosarojj adorjjapjjäna? ¿Ezequielan visionapajj kunsa yatichistu? Kunanaksa Ezequielajj templon uñjäna uk yatjjatañäni. Ukampis Diosajj kunjam adoratäñsa muni uk nayraqat yatjjatañäni.

4. ¿Jehová Diosajj jupar adoririnakar kunsa mayi?

⁴ Ezequielajj jakkäna ukhat mä 900 maranak nayrajja, Jehová Diosajj jupar adorapki ukanakarojj kunsa mayi ukwa sum qhanañchäna. Tunka mandamientonakat payïriki ukanjja, Diosajj israelitanakar akham sänwa: ‘Naya Jehová Diosamajja naya saparuk adorasispa uk mayir Diosätwa’ sasa (Éx. 20:5). * ‘Naya saparuk adorasispa’ sasajja, yaqha diosanakar adorasiñap jan munatapwa uñachtʼayäna. Kunjamtï aka libron 2 yatichäwin yatjjataniwayktanjja, Diosarukiw adorasiñapa, ukaw Diosar adorañatak wakiski uka pusi mayitanakat nayrïrejja. Ukhamasti Diosar adoririnakajj jupar serviñwa nayrar uchapjjañapa (Éx. 20:3). Mä arunjja, servirinakapan yaqha diosanakar adorapjjañap janiw Jehová Diosajj munkiti. 1513 a.C. maranjja, leyinakarjam lurat pacto phoqañwa israelitanakajj taqe chuyma amtapjjäna. Ukham lurasajj Jehová Diosarukiw adorapjjäjja sapkaspas ukhamänwa (Éx. 24:3-8). Diosajj pactonakap phoqapuniwa, ukatwa jupamp mä pacto lurapki ukanakan phoqapjjañap munaraki (Deut. 7:9, 10; 2 Sam. 22:26).

5, 6. ¿Kunatsa israelitanakajj Jehová Diosaruk adorapjjañapäna?

⁵ ¿‘Diosarukiw adorapjjañama’ sasin israelitanakar mayiskäna uk phoqañajj wali chʼamäpachänti? ¿Kunatï jan phoqañjamäki ukti Diosajj maypachäna? Janiw ukhamäkänti. Cheqas Jehová Diosajj Taqe Chʼamaniwa, Taqe Kunjjar Munañaniwa, ‘jakañ vida’ chuririwa, jupaw jakayarakistu (Sal. 36:9; Hech. 17:28). Juparakiw israelitanakan Salviripänjja. Tunka Mandamientonak markapar churkäna ukhajj akham sänwa: ‘Nayaw juman Jehová Diosamätjja, nayaw Egipto oraqet irpsunsmajja, uka oraqenjja jumajj esclavotwa serviyäta’ sasa (Éx. 20:2). Ukatwa israelitanakajj Diosaruk adorapjjañapäna.

⁶ Diosajj pachpakïskiwa (Mal. 3:6). Jehová Diosajj nayratpachwa jupa saparuk adorasiñap walja kuti mayïna. Ukhamasti Ezequielajj visionan pusi sinti jan walinak uñjkäna uk uñjasajja, Diosajj walpun chuym ustʼayaspachäna.

7. 1) Templot norte toqenkkäna uka punkunjja, ¿kunsa apóstata yaqhep judionakajj lurapjjäna? ¿Ukham lurir uñjasajj kunjamas Jehová Diosajj jikjjatasïna? (Aka yatichäwi qalltan utjki uka dibujo uñjjattʼäta). 2) ¿Uka judionakajj kun lurasas Jehová Diosar colerayapjjäna? (Qhanañchäwi uñjjattʼäta).

⁷ Ezequiel 8:5, 6 liytʼañataki. Visionan kuntï uñjkäna ukajj wal Ezequielar musparaypachäna. Templot norte toqenkkäna uka punkunjja, apóstata judionakajj mä idoloruw adorasipkäna. Ukajj inas Aserá diosatak lurata mä sagrado postëchïna, uka diosajj cananeonakan falso diosapänwa, jupanakajj Aserá diosajj Baal diosan warmipäkaspas ukhamwa uñjapjjäna. Falso diosar adorasajja, israelitanakajj Diosampi mä pacto lurapkäna uk janiw phoqjjapjjänti. Ukham lurasajj Jehová Diosaruw jiskʼachapjjäna, colerayapjjarakïna  (Deut. 32:16; Ezeq. 5:13). * Ak amtañäni, 400 maranak jilaw templon santuariopajj Diosas ukankkaspa ukham uñachtʼayäna (1 Rey. 8:10-13). Ukampis jichhajj templonwa judionakajj falso diosanakar adorjjapjjäna, uka idolonakar munasirinakan juchapatwa Jehová Diosajj templot jayankjjäna.

8. ¿Ezequielajj coler churir ídolo uñjkäna ukajj jichhürunakan kunamp sasisa?

⁸ ¿Ezequielajj coler churir ídolo uñjkäna ukajj jichhürunakan kunampi sasisa? Apóstata Judá markajja, jichha tiempon cristianöpjjtwa sapki uka religionanakampi sasiwa. Iglesianakapajj idolonakampi phoqantatawa, ukatwa Diosar adorapjjatapajj inamayakejja. Niyakejjay Jehová Diosajj pachpakïskchejja, kunjamtï apóstata Judá markatak wal colerkänjja, ukhamarakiw cristianöpjjtwa sapki ukanakatakejj wal coleri (Sant. 1:17). Diosajj jupanakat wali jayankiwa.

9, 10. Templon idolonakar adoririnakajj kunanaktï lurapkäna ukanakajja, ¿kun amuytʼasiñatakis yanaptʼistu?

⁹ ¿Templon idolonakar adorapkäna ukajj kunsa yatichistu? Jiwasatï Dios saparuk adorañ munstanjja, “idolonakar adorañat jitheqtapjjam” siski uka arunakarojj istʼañasawa (1 Cor. 10:14). Inas awisajj akham sasin amuystan: “¡Nayajj janipuniw Jehová Diosar adorañatakejj idolonaksa yaqha ukhamanaksa apnaqkiristi!” sasa. Ukampis kunayman toqetwa maynejj idolonakar adoraspa, yaqhepajj amuykañawa yaqhepasti jan amuykañakirakiwa. Biblia toqet mä qellqatanjja akham siwa: “Kunatï jiwasatak wali valoranïki, jan ukajj wali importantëki ukanakaw idolonakar uñtasitäspa, ukatsti Diosar serviñat sipansa ukanakaw jiwasatak nayrankjjaspa” sasa. Ukhamasti kunatï utjkistu ukanakasa, qollqesa, qʼañu jucha lurañanakasa, anattʼañanakasa, yaqha ukhamanakas jiwasatak nayrankjjaspa ukajj mä idolor adorañampi sasispawa. Mä arunjja Diosar serviñat sipansa, kunanaktï jakäwisan nayrar uchksna ukanakaw idolosampi sasispa (Mat. 6:19-21, 24; Efes. 5:5; Col. 3:5). Idolonakar adorañampi saski ukanakat amuyasiñasawa, Jehová Diosar serviñaw jiwasatak nayrankañapa, juparukiw adorañasaraki (1 Juan 5:21).

¹⁰ Jehová Diosajja, wali ‘ajjtaskañanaka jan walinakwa’ Ezequielarojj nayraqat visionan uñjayäna. Ukampis jupar taqe chuyma serviri Ezequiel profetarojj akham sänwa: ‘Ukat sipans jukʼamp jan wali ajjtaskañanak uñjäta’ sasa. ¿Kunas coler churiri idolor templon adorañat sipansa jukʼamp jan walïpachäna?

11. Ezequielajj templon manqha patiopar mantkäna ukhajja, ¿altarajj uchatäkäna uka jakʼan kuna jan walinaksa uñjäna?

¹¹ Ezequiel 8:7-12 liytʼañataki. Ezequielajj mä perqwa pʼiysüna, ukatsti templon manqha patioparuw mantäna kawkjantï altarajj uchatäkäna uka jakʼaru. Ukanjja ‘kunayman qatatnaqtir animalanakar uñtasit idolonakampi, ajjtaskañ animalanakar uñtasit idolonakampi ukhamarak israelitanakan taqe ajjtaskañ idolonakapampwa’ perqar khitsut dibujonak uñjäna. * Uka dibujonakajj falso diosanakamp sasïnwa. Ukjjarusti Ezequielajj jukʼamp jan walinakwa uñjäna, ‘israelitanakan 70 ancianonakapajj’ ‘chʼamakanwa’ falso diosanakar  inciensonak nakhayasipkäna. Leyirjamajja suma olorani inciensonakajj Diosajj katoqki uka oracionanakampi sasïnwa, mä arunjja Jupar taqe chuyma servirinakapan oracionapampi sasïnwa (Sal. 141:2). Ukampisa 70 ancianonakajj incienso nakhayapkäna ukajja, janiw Jehová Diosatakejj ni akchʼas sagradökänti, antisas wali ajjtaskañänwa. Uka oracionanakajj ñusatäkaspas ukhamaw wal thujsäna (Prov. 15:8). Uka jaqenakajja ‘Diosajj janiw uñjkistuti’ sasaw engañasipjjäna, ukampis Diosajj kunatï templon paskäna uk sum uñjaskäna. Ukatwa Ezequielarojj kunatï pasaskäna ukanak taqpach uñjayäna.

12. ‘Chʼamakansa’ mä arunjja jan khitis uñjkistani ukhasa, ¿kunatsa jan walinak jan lurañatak chʼamachasiñasa? ¿Jukʼampejj khitinakasa congregacionan yateqaskay sarnaqapjjañapa?

¹² ¿Israelitanakan 70 ancianonakapajj falso diosanakapar incienso nakhayapkäna ukajj kunsa yatichistu? Chʼamakankkasasa mä arunjja jan khitis uñjkistu ukhasa, janipuniw Jehová Diosat armasisajj jan walinak lurañasäkiti. Ukhamatwa kuntï Diosar adorañatak lurkañäni uk Jupajj sumat uñjani, oracionanakassa istʼarakiniwa (Prov. 15:29). Ak amtañäni, Jehová Diosajj taqe kunwa uñjaski, kunanaktï lurktan ukanaksa sum uñjasinkaraki. Jiwasatï Diosar uñjksnas ukham sarnaqañänejja, janipuniw jan khitin uñjkatas kunatï chuym ustʼaykaspa ukanak yatkasin lurkañäniti (Heb. 4:13). Yamas ancianonakajj taqe kunanwa yateqaskay sarnaqapjjañapa (1 Ped. 5:2, 3). Congregacionankirinakajja, plataformat yatichapki Diosar  serviñan pʼeqtʼapki uka ancianonakajj Biblian yatichäwinakaparjam sarnaqapjjañapwa suyapjje, jan khitis uñjki ukhas sum sarnaqapjjaspa ukwa suyapjjaraki (Sal. 101:2, 3).

13. Ezequielajj kuntï visionan uñjkäna ukarjamajja, ¿kunsa apóstata warminakajj Diosan templopan norte toqenkir mantañ punkun lurasipkäna?

¹³ Ezequiel 8:13, 14 liytʼañataki. Diosar colerayir idolompi, falso diosanakar incienso nakhayiri 70 ancianonakamp Ezequielajj uñjkäna uka qhepatjja, Jehová Diosajj mayampwa jupar akham säna: ‘Jukʼamp ajjtaskañ jan walinak luraskir jumajj uñjäta’ sasa. ¿Kuna jan walimpsa Ezequielajj uñjañampïskäna? Diosan templopankir norte toqenkir mantañ punkunjja, ‘Tamuz diosatjam jachir warminakaruw qontʼat’ uñjäna. Mesopotamia markankirinakan Tamuz sat diosapajja, wawanïñatak yanaptʼir Istar sat warmi diosan munatapäkaspas ukhamätapaw amuyasi. * Amuyatajja uka warminakan jachapjjatapajj falso religionan mä costumbrepänwa, jupanakajj Tamuz sat diosan jiwatapatwa ukham jachapjjerïna. Tamuz diosatjam Jehová Diosan templopan jachasajja, uka warminakajj falso religionanakan costumbreparjamaw lurasipkäna, ukhamatwa Diosaruk adorasiñapäki uka lugar qʼañuchapjjäna. Uka warminakajj Diosan templopansa ukham lurapkchïnjja, ukajj janiw sagradökänti. ¡Ukajj jan walipunïnwa! Jehová Diosatakejj uka apóstata warminakajj ‘wali ajjtaskañwaʼ lurasipkäna.

14. ¿Kuntï apóstata warminakajj lurapkäna uk kunjamsa Jehová Diosajj uñjäna, kunsa ukajj yatichistu?

¹⁴ ¿Tamuz diosatjam jachir warminakarojj kunjamtï Jehová Diosajj uñjkäna ukajj kunsa yatichistu? Jiwasatï Jehová Diosar sum adorañ munstanjja, janipuniw jupar adorañatakejj falso religionanakan costumbrenakap lurañasäkiti. Falso religionanakan uñstayat costumbrenak taqpachwa apanukuñasa. ¿Kunjamatsa costumbrenakajj uñstawayi uk yatiñajj wakisiti? Jïsa. Awisajja yaqhep costumbrenakajj walïskaspas ukhamaw amuyasispa. Sañäni: Navidad, Semana Santa, Año Nuevo, cumpleaño ukanakajj walikïkaspas ukhamäspawa. Ukampis falso religionanakan uñstayata uka costumbrenakajj kunjamsa qalltawayi ukanak Jehová Diosajj sum yati, uk janipuniw armañasäkiti. Uka costumbrenakajj uñstkäna ukhat jichhakamajj walja maranakas pasjjchejja, jan ukajj ukanak lurasajj Diosarus adorapkaspa ukhamsa jaqenakajj amuyapkchejja, ukanakajj Jehová Diosatak ajjtaskañakïskiwa (2 Cor. 6:17; Apoc. 18:2, 4).

15, 16. 1) ¿Templon manqha patiopanjja kunsa 25 chachanakajj lurasipkäna? 2) ¿Kuntï uka chachanakajj lurapkäna ukajj kunatsa Jehová Diosan chuymap wal ustʼayäna?

¹⁵ Ezequiel 8:15-18 liytʼañataki. Jehová Diosajja kuna jan walimpsa templon lurapjjäna ukwa Ezequielarojj tukuyañatak uñjayäna, akham sarakïnwa: ‘Ukanakat sipans jukʼamp jan wali ajjtaskañanak luraskir jumajj uñjäta’ sasa. Inas Ezequielajj akham jisktʼaschïna: “¿Jichhakam uñjkta ukanakat sipansa kunarak jukʼamp jan walïspasti?” sasa. Ezequielajj Diosan templopan manqha patiopankaskänwa, templor mantañäki uka cheqana. Ukanjja 25 chachanakajj inti jalsu  toqeruw intir adorañatak altʼasipjjäna. Ukham lurasajj walpun Jehová Diosan chuymap ustʼayapjjäna. ¿Kunatsa ukham sistanjja?

¹⁶ Kunapunis pasäna uk amuytʼañäni. Templon punkupajj inti jalsu toqer uñtatänwa. Ukhamasti inti jalanta toqer uñtataw jaqenakajj templor mantapjjerïna, inti jalsojj jupanak qhepäjjapankänwa. Ukampis Ezequielan visionapanjja, 25 chachanakajj intir adorañatakejj ‘inti jalsu toqer uñtatäpjjänwa, jikhaninakapajj Jehová Diosan templop uksar uñtatarakïnwa’. ‘Jehová Diosan utapan’ ukham lurasajja, Diosaruw maysar apanukusipkäna (1 Rey. 8:10-13). Uka 25 chachanakajja apóstata jaqenakäpjjänwa, jupanakajj Diosaruw jiskʼachapjjäna, Deuteronomio 4:15-19 texton siski uka mandamientorus janiw istʼapkänti. Niyakejjay Jehová Diosaruk adorañasächejja, ¡ukham jan wali lurasajj walpun chuymap ustʼayapjjäna!

17, 18. 1) ¿Templon intir adoriri chachanakajj kunsa yatichistu? 2) ¿Apóstata israelitanakajj kunsa aptʼasipjjäna?

¹⁷ ¿25 chachanakajj intir adorapkäna ukajj kunsa yatichistu? Diosaruk adorañ munstan ukhajja, amuytʼasirïñatakis yatiñanïñatakis juparupuniw yanaptʼa mayisiñasa. Amtañäni, ‘Jehová Diosaw intisajja’ Arupajj ‘mä qhanjamaw’ thakis sum qhantʼistu (Sal. 84:11; 119:105). Diosajj Bibliampi markapan utjki uka qellqatanakampiw yatiñanïñasatak yanaptʼistu. Ukatsti sum amuytʼasis suma amtanakar puriñatakis yaticharakistuwa, ukhamatwa kusisit jakastanjja, jutïrinsa wiñayatakiw kusisit jakasirakiñäni. Ukampis kunsa lurañäni uk akapachan qhanaparjama, jan ukajj akapachan yatiñaparjam amtsna ukhajja, Jehová Diosarus apanuksna ukhamäspawa. Ukham lursna ukhajja Diosarojj coleraysnawa, walpun chuym ustʼayaraksna. ¡Jiwasajj janipuniw Diosarojj ukham lurañ munktanti! Jehová Diosan yatichäwinakap maysar apanukuri apostatanakatsa jitheqtañasawa, ukwa Ezequielajj visionan uñjkäna ukajj yatichistu (Prov. 11:9).

¹⁸ Kunjamtï uñjaniwayktanjja, falso diosanakar adorañatakejj kuna ajjtaskañanaksa Diosan templopan lurasipkäna ukwa pusi toqet Ezequielajj mä visionan uñjäna. Ukajj kunjamsa apóstata Judá markajj Jehová Diosar adorañat sipansa wali ajjtaskañanak lurasin idolonakar adorapjjäna ukwa uñachtʼayi. Diosar maysar apanukupjjatapatwa, israelitanakajj Diosan markapäñ aptʼasipjjäna. Idolonakar adorañampi qʼañu juchanak lurañampejj juntukiwa, ukatwa apóstata israelitanakajj kunayman qʼañu juchanak lurapjjäna, Diosan amigopäñsa aptʼasipjjarakïna, jupanakkamas janirakiw sum jakasjjapjjänti. Jehová Diosampi amuytʼayatäsajja, kuna jan walinaksa apóstata judionakajj lurapjjäna ukwa Ezequielajj qhanañchäna. Jupajj kamsänsa uk jichhajj yatjjatañäni.

19. Ezequielajj kunjamtï qhanañchkejja, ¿Diosamp mä pacto lurkäna uka markajj kuna jan walinaksa lurjjäna?

¹⁹ Ezequiel 22:3-12 liytʼañataki. Judá markankirinakasa marka apnaqerinakapas kunayman jan walinakwa lurjjapjjäna. ‘Israelan  taqe pʼeqtʼirinakapajj’ jan juchani jaqenakaruw munañanïsajj jiwayapjjäna. Jaqenakat jilapartejj pʼeqtʼirinakapat yateqasisaw jan walinak lurapjjarakïna, Diosan leyinakapsa janiw phoqapkänti. Familia taypinsa wawanakajj awk taykapar ‘jiskʼachapjjänwa’, pachpa familiapampi ikintasiñajj walipuniw utjarakïna. Markanjja Dios contra saytʼir israelitanakajj extranjeronakar engañjapjjänwa, wajcha (iñu) wawanakarusa viudanakarusa tʼaqesiyapjjänwa. Chachanakajj yaqhanakan warminakapampiw ikintasipjjäna. Israelitanakajj jupanakatakikiw taqe kunsa jilamp jilamp munapjjerïna, qollqe chilltañajj waliw utjäna, pobrenakarus jilamp jilampwa interesanak mayipjjäna, Jehová Diosan Leyip phoqañatak mä pacto lurapkäna uk phoqañsa armasjjapjjänwa, ukajj ¡walpun Diosarojj chuym ustʼaypachäna! Diosan Leyipajj munasiñatakis chʼamañchkchïnjja, jupanakajj janiw yäqapkänti. Markapan sinti jan walinak luratap uñjasajja, Diosajj wal chuym ustʼayasïna. Ukatwa Ezequiel toqejj markapar akham säna: ‘Cheqas nayat qʼal armasistajja’ sasa.

20. ¿Judá markan jan walinak lurapjjatapajj kunsa yatichistu?

²⁰ ¿Judá markan jan walinak lurapkäna ukajj kunsa yatichistu? Apóstata Judá markajj ajjtaskañanak lurkäna ukajja, kuna jan walinaktï jichha tiempon jaqenakajj lurasipki ukwa amtayistu. Politiconakajj markankirinakaruw munañanïsajj tʼaqesiyapjje. Religionanak pʼeqtʼirinakajja, yamas curanakajj guerrar saririnakaruw bendisipjje,  ukham guerranakanjja walja millón jaqenakaw jiwarapjje. Uka religión pʼeqtʼirinakajja, chacha warmi ikthapiñat Biblian sum qhanañchki ukarojj janiw yäqapkiti. Ukatwa jaqenakajj jan walinaka, ajjtaskañ qʼañu lurañanaka jan phenqʼani lurjjapjje. Jehová Diosajj kunjamtï apóstata Judá markar siskänjja, ukhamarakiw religión pʼeqtʼirinakar akham saspa: ‘Cheqas nayat qʼal armasistajjaʼ sasa.

21. ¿Judá markan jan walinak lurapjjatapat kunsa yateqsna?

²¹ Judá markan jan walinak lurapkäna ukajj ¿kunsa Diosan markapankirinakarojj yatichistu? Diosajj kunjam adoratäñtï munki ukham jupar serviñatakejja, taqe luratasan janipuniw jan walinakajj utjañapäkiti. Niyakejjay akapachajj jan walinak luriri jaqenakamp phoqantatächejja, sum sarnaqañajj chʼamakïspawa (2 Tim. 3:1-5). Jan wali lurañanakajj Diosatak wali ajjtaskañawa, uk sum yattanjja (1 Cor. 6:9, 10). Jiwasajj Jehová Diosar wal munastanjja, leyinakaparus wal munasiraktanjja, ukatwa taqe kunan Jupar istʼtanjja (Sal. 119:97; 1 Juan 5:3). Jan wal sarnaqsna ukhajja, janis Diosar munasksna ukhamäspawa. Janipuniw jan wal sarnaqatas layku, ‘nayat qʼal armasistajja’ sasin Diosampi sayasiñ munktanti.

22. 1) Jehová Diosajj kuntï Judá markat qhanañchkäna uk yatisajja, ¿kunsa sapa maynejj lurañasa? 2) ¿Kuna toqetsa akjjar jutki uka yatichäwin yatjjataskañäni?

²² Judá markanjja janiw Diosar sum adorasjjänti, sinti jan walinakwa lurjjapjjarakïna ukwa Jehová Diosajj qhanstayäna, ukajj jiwasatak walja yatichäwinakaniwa. Ukanak yatjjatañajj Dios saparuk adorañatakiw chʼamañchtʼistu. Ukhamasti taqe kunanakatï idolor adorañampi saski ukanakat amuyasiñasawa, sarnaqäwisan qʼomäñapatakiw chʼamachasiñasa. ¿Kunjamsa Diosajj ajjtaskañ jan walinak luriri markaparojj cheqañchpachäna? Kunatï templon paskäna ukanak taqpach uñjayasajja, Diosajj qhanwa Ezequielar akham säna: ‘Wali colerasiñampiw nayajj jupanakar uñjäjja’ sasa (Ezeq. 8:17, 18). Jehová Diosajj kunjamtï Judá markar cheqañchkänjja uka pachparakwa aka jan wali pacharojj cheqañchani, ukatwa uk yatiñ wal muntanjja. Jutïr yatichäwinjja, kunjamsa Diosajj Judá marka contra arskäna ukanakajj phoqasïna ukwa yatjjataskañäni.