Jehová a Diosaw nayrïr chacha warmirojj jaqechawayi. Jupaw warmir lurasajj Adanan ukar irpäna sasaw Bibliajj qhanañchi. Adanajj uka warmir uñjasajj wali kusisitaw akham säna: ‘Akapï jañchijat jañchinejja, ukhamarak chʼakhajat chʼakhanejja’ sasa (Génesis 2:22, 23). Jaqechatanakajj kusisit jakasipjjaspa ukwa Diosajj nayratpach munäna.

Kunapachatï jaqechasipjje ukhajja, “kusisitaw jakasiñäni” sasaw sapjje. Ukampis janiw ukhamapunïkiti, wal munasipki ukanakasa, awisajj jan waltʼäwinakanwa uñjasipjje (1 Corintios 7:28). Bibliat apstʼat mä qawqha ewjjtʼanakaw aka qellqatan utji, ukarjam sarnaqañatak chʼamachasïta ukhajja, kusisitaw familiamamp jakasïta (Salmo 19:8-11).

BIBLIAJJ KAMSISA: Chachaw familian pʼeqepajja (Efesios 5:23).

Jumatï warminïstajja, warmimar wali munasiñamp uñjañamwa Jehová Diosajj muni (1 Pedro 3:7). Diosajj chachar yanaptʼañapatakiw warmir lurawayi, ukatwa warmejj wali munasiñampi uñjatäñapa (Génesis 2:18). Kunatï jumatakejj askïki uk thaqhañat sipansa, warmimar wal munasitam laykojj kunatï jupatakejj askïki ukwa thaqhañama (Efesios 5:25-29).

Jumatï chachanïstajja, wali respetompiw chachamar uñjañama ukat familia sum pʼeqtʼañapatak yanaptʼañamarakiwa, ukwa Jehová Diosajj muni (1 Corintios 11:3; Efesios 5:33). Suma chuymampiw chachamar yanaptʼañama ukat kuntï amtki ukansa yanaptʼañamarakiwa (Colosenses 3:18). Ukhamtï lurätajja, chachamasa Jehová Diosasa wali askitwa uñjapjjätam (1 Pedro 3:1-6).

KUNSA LURASMA:

• Chacha warmjam kusisit jakasiñatakejj kunamp lurañamas wakisispa, ukwa chachamaru, jan ukajj warmimar jisktʼasma. Ukat jupar sum istʼasajja, ukarjam lurañatakiw chʼamachasiñama

• Paciencianïñamawa, jukʼat jukʼatwa kunas jupar kusisiyaspa uk yateqäta

BIBLIAJJ KAMSISA: Chachamasa, jan ukajj warmimasa kunjamsa jikjjatasi uk amuytʼañamajj wali wakiskiriwa (Filipenses 2:3, 4). Ukat juparojj sum uñjañamawa. Amtañäni, servirinakapajj ‘taqenimp sum apasipjjaspa’ ukwa Jehová Diosajj muni (2 Timoteo 2:24). Ukhamajj kuna arunakampis parläta uk sumwa amuytʼasiñama. Bibliajj akham siwa: “Utjapuniwa parlatanakapampi mayniru usuchjirejja, ukampis yatiñan jaqenakan arunakapasti mä qolljamawa” sasa (Proverbios 12:18). Jehová Diosan qollan ajayupaw suma arunakampi munasiñamp parlañatak yanaptʼätam (Gálatas 5:22, 23; Colosenses 4:6).

KUNSA LURASMA:

• Chachamampi, jan ukajj warmimamp janïr parlkasajja, jan jankʼak colerasiñataki ukat sum amuytʼasa istʼañamatakiw Diosar oracionan mayisiñama

• Kuna arunakampisa ukat kunjam chuymampis parläta uk sumwa amuytʼañama

BIBLIAJJ KAMSISA: Jaqechasisajja, chacha warmejj ‘mayakëjjapjjewa’ (Mateo 19:5). Ukampis awisajj mayj mayjwa amuyapjjarakispa. Ukhamasti, amuyunsa ukat yaqha ukhamanakansa mayakïñatakiw jumanakajj yateqapjjañama (Filipenses 2:2). Yamas mä amtar puriñatakejj mayakïpjjañamawa. Bibliajj akham siwa: “Suma amtäwinakajja suma ewjja arunakampiwa waktʼayasi” sasa (Proverbios 20:18). Biblian utjki uka ewjjtʼanakaw mä amtar puriñatakejj yanaptʼapjjätam (Proverbios 8:32, 33).

KUNSA LURASMA:

• Taqe kunatwa parltʼasipjjasma, ukampis kunjamas chuymaman jikjjatasta uk yatiyañamaw jukʼamp askïspa

• Janïr kun lurañ amtkasaw chachamampi, jan ukajj warmimamp parltʼañama