Jesusan kimsüru jiwatapatjja, jupajj kawkjan imantatäkäntï uk uñjiriw mä qhawqha warminakajj sarapjjäna, ukan janiw kunas utj-jjänti. Jehová Diosaw Jesusar jaktayjjäna.

Qhepatjja Jesusajj apostolonakaparuw uñstäna.

Jiwatat jaktayatäjjäna ukhajja, janiw jañchin chʼakhanëjjänti mä espíritu cuerponëjjänwa. Discipulonakapajj alajjpachar makatirwa uñjapjjäna. Jichhajj wali chʼaman angelawa wiñayatakiw jakarakini.

Jaqenakar juchampita jiwañampit salvañatakiw Jesusajj jiwawayi (Mateo 20:28). Ukhamïpanwa wiñay jakañ jikjjatsna.

Alajjpachat aka oraqer apnaqaniñapatakiw Jehová Diosajj Jesusar ajlliwayi. Ukampis janiw sapak apnaqankaniti. Jan ukasti, jiwatat jaktasin alajjpachar sarir 144.000 ajllit cristianonakampiw apnaqanini. Uka suma gobiernojj Diosan Reinopawa (Apocalipsis 14:1-3).

Uka Reinow aka oraq mä paraisor tukuyani. Janiw guerranakasa, jan walinakasa, pisin jakasiñanakasa, manqʼat pistʼañanakas utj-jjaniti. Jaqenakajj wali kusisitaw jakasipjjani (Salmo 145:16).