Niya pä uru Samariankjjasinjja, Jesusajj Galilearuw sarjjäna. Judeanjja, walja jaqenakaruw Jesusajj Diosan arunakapat yatiyäna, ukampis Galilearojj janiw samartʼir sarkänti, jan ukasti jukʼampiw ukan yatiyañapäna. Jesusajj kawkintï naskäna uka markan suma katoqatäñ janiw suykpachänti, ¿kunatsa? Jupa pachpaw akham säna: “Mä profetajj janiw pachpa markapan respetatäkiti” sasa (Juan 4:44). Discipulonakapajj Galilearu arkañat sipansa, utanakaparuw kuttʼjjapjjäna, familianakapan ukaru ukhamarak trabajonakaparu.

Jesusajj akham sasaw yatiyañ qalltäna: “Diosan Reinopajj jakʼankjjewa, arrepentisipjjam, Diosan suma yatiyäwinakaparus confiyapjjarakim” sasa (Marcos 1:15). ¿Jaqenakajj istʼapjjpachänti? Galileonakat waljanejj wali sum Jesusar katoqapjjäna, jachʼañchapjjarakïnwa. Janiw yatichäwinakap laykukejj ukham katoqapkänti, jan ukasti jupanakajj Jerusalenaru Pascua amtir sarapkäna ukhaw Jesusan milagronakap uñjapjjäna, ukatwa ukham katoqapjjäna (Juan 2:23).

¿Galilean kawkïr markansa Jesusajj yatiyañ qalltäna? Caná markanwa qalltpachäna, ukanwa mä casarasïwinjja uma vinor tukuyäna. Uka markan mayamp ukankaskäna ukhaw mä waynan wali usuntatätap Jesusajj yatïna, jupajj Herodes Antipas reyina mä serviripan wawapänwa. Uka reyiw Bautisir Juanarojj pʼeqep apaqayäna. Jesusajj Judeat Caná markar jutaskatap reyin serviripajj yatïna ukhajja, Jesusar jikjjatañatakejj Capernaúm markat Caná markaruw jutäna. Jupajj akham sasaw Jesusar ruwtʼasïna: “Tata, janïr wawajajj jiwkipan sarañäni” sasa (Juan 4:49).

Jesusajj uka jaqer “sarjjam, wawamajj jakaskiwa” sasin säna ukhajja, uka jaqejj wal musparpachäna (Juan 4:50). Jesusan arunakapar creyisajja, utaparuw sarjjäna. Thak saraskäna ukhaw esclavonakapajj jikjjatapjjäna, jupanakajj ‘yoqall wawamajj jakaskiwa’ sasin jankʼaki yatiyañatakiw jutapjjatayna. Uka toqet sum yatjjatañatakejja, “¿kuna horas wawajj walipti?” sasaw uka jaqejj esclavonakapar jisktʼäna.

Esclavonakapasti, “masüruw calenturapajj niya maya jaypʼu horasar saraqjje” sasaw jupar sapjjäna (Juan 4:52).

Uka arunak istʼasajja, uka pachpa horasarakis Jesusajj “wawamajj jakaskiwa” sasin sitänjjä sasaw uka servirejj chuymapan amtasïna. Uka pasatatjja, uka jaqesa utapankirinakasa taqpachaniw Criston discipulopäjjapjjäna. Uka jaqejj qollqenïpachänwa, ukatwa esclavonakanïpachäna.

Ukhamasti Jesusajj pä milagronakwa Caná markan luräna. Nayrïrejj uma vinor tukuykäna ukawa, maynïristi reyin serviripan mä wawapar qollkäna ukarakiwa, uka servirin wawaparojj 26 kilometronak jayankkasinwa qolläna. Jesusajj walja milagronaksa ukhakamajj lurkchïnjja, Galilear mayampi kuttʼasin reyin serviripan wawaparu qollasajj Diosan ajllit profetätapwa uñachtʼayäna. Ukhamäkchïnsa, ¿kunapachkamas ‘uka profetarojj pachpa markapan respetapjjpachäni’?

Ukajja Nazaret markaparu purkani ukhaw yatisini, ¿kunjamsa Jesusarojj ukan katoqapjjpachäni?