Jesusampi pusi discipulonakapampejj ‘sinagoganakan yatiyasaw Galileypach muytapjjäna’. Jesusajj kuna musparkañ luräwinaktï uka markanakan yatiykasajj lurkäna ukanakatjja, taqe cheqanakanwa yatisïna (Marcos 1:39). Uka yatiyäwinakajj kawkjantï lepra usuni mä jaqejj jakaskäna uka markakamaw purïna. Uka jaqejj ‘lepra usumpi tukjatänwa’ sasaw Lucas doctorajj qhanañchi (Lucas 5:12). Maynejj lepra usumpi qʼala usuntatäjje ukhajja, jukʼat jukʼatwa cuerpopajj tukusjjaspa.

Lepra usuni jaqejj wali llakkañ usuntatänwa, janirakiw jaqenak jakʼansa jakañapäkänti. Jaqenakajj jupar sint jakʼachasipjjäna ukhajja, “qʼañütwa, qʼañütwa” sasaw usup jan contagiañatakejj arnaqasiñapäna (Levítico 13:45, 46). Ukampis ¿kunsa lepra usuni jaqejj luräna? Jesusar jakʼachasisinjja, nayraqataparuw altʼasïna, ukatsti akham sasaw ruwtʼasïna: “Tata, munsta ukhajj qolltʼasitasmawa” sasa (Mateo 8:2).

Uka jaqejj walpun Jesusar confiypachäna. Ukham usuntatäsajja, uñnaqapas wali llakkañäpachänwa. Ukham uñjasajj ¿kunsa Jesusajj lurpachäna? ¿Kunsa jumajj ukankasmäna ukhajj lurasmäna? Jesusajj jupat wal khuyaptʼayasïna, ukatwa amparampi loqjjatäna, akham sasa: “Muntwa, qollatäjjam” sasa (Mateo 8:3). Yaqhepanakatakejj janis creyiñjamäkchïnjja, uka jaqejj ukaratpachaw lepra usupat qollatäjjäna.

Jesusajj wali khuyaptʼayasiri, taqe kun lurañatakis wakichtʼata ukhamawa. ¿Jumajj ukham reyimpi apnaqatäñ munasmati? Jupajj aka oraqjjar apnaqjjani ukhajj Bibliankir akïr profeciaw phoqasini: “Jupaw jan kunan jaqenakat khuyaptʼayasini, aynachtʼat jaqerus yanaptʼani” (Salmo 72:13). Uka profeciajj phoqasipuniniwa, ukwa lepra usuni jaqer qollasajj Jesusajj uñachtʼayistu. Jïsa, kunanaktï Jesusajj lurañ munki ukanakwa lurani, jupajj taqe llakitanakaruw yanaptʼani.

Amtañäni, Jesusajj lepra usuni jaqer janïr qollkäna ukhatpachaw jaqenakajj Jesusan luratanakapat wal kusisipjjäna. Qhepatjja lepra usuni jaqer qollatapat yatipjjarakïnwa. Uka arunak istʼasaw jaqenakajj Jesusar creyipjjäna, ukampis Jesusajj janiw jaqenakan arunakap istʼasaki jupar creyipjjañap munkänti. Isaías libron qellqatäki uka profeciatsa jupajj yatirakïnwa, ukan akham sas qellqatänwa: “Jupan arupajj janirakiw callenakansa istʼaskaniti” sasa. Mä arunjja Jesusajj janiw luratanakapat jachʼañchasiñapäkänti (Isaías 42:1, 2). Ukatwa lepra usuni jaqer akham Jesusajj ewjjtʼäna: “Janiw khitirus arsütati, jan ukasti sacerdotempi uñjayasir saram, kunjamtï Moisesajj siskäna ukarjam mä ofrenda loqtarakim” sasa (Mateo 8:4).

Uka jaqejj usupat qollatäjjasajj wali kusisitänwa. Uka toqetjja taqeniruw yatiyañ munäna. Jesusan ukat sarjjasinjja, uka jaqejj kunatï paskäna ukanakat taqeniruw parlañ qalltäna. Ukanakat istʼasinjja, jaqenakajj jukʼampiw yatiñ munapjjäna. Ukhamasti Jesusajj janiw mä markarus qhan mantirjamäjjänti, ukatwa markanakat anqäjjaruki quedasjjäna, chʼusa cheqanakaru. Ukhamäkipansa, jaqenakajj taqe cheqatwa qollayasiñatakisa yatichayasiñatakisa Jesusan ukar jutapjjäna.