Taqiniw ajllsnaxa, Diosar yupaychañsa jan ukax Supayampir saxranakapampir yupaychañsa. Janipuniw panpachanirux yupaychksnati. Ukat ¡kunja askis yatiñkankañampi Jehová Diosar serviñaxa!

Kunjamtï yatxatawayktanxa, sarxanakax jaqinakarux wal tʼaqhisiyapxi ukat sallqjapxarakiwa. Jehová Diosax janiw ukhamäkiti. Jupaxa jaqinakarux wal munasi kunjamtï mä awkix wawanakapar wali munasiñamp uñjki ukhama. Jupawa “taqi kunatix askïki ukhamarak chiqäki” ukanak Churirixa (Santiago 1:17). Diosatakix janis faciläkchixa, kunatï jaqinakatak askïki ukanakxa janiw imtʼkiti (Efesios 2:4-7).

Jesusax Diosan Yuqapjamax wali askinakwa aka Uraqin luräna. Amutunakarus arsuyäna ukat juykhunakarus uñjayäna. Llixti usuninakarusa waliptayäna ukat cojonakarus sartayänwa. Ukat saxranaksa jaqinakat alissünwa ukhamarak usutanaks qullarakïna. Jehová Diosan chʼamapampixa, Jesusax jiwatanakarus jaktayänwa (Mateo 9:32-35; 15:30, 31; Lucas 7:11-15).

Jehová Diosax kunatï chiqäki ukpunwa yatiyistu. Jupaxa janipuniw khitirus sallqjkaspati (Números 23:19).

Kunjamtï mä chhichhillankhax kusikusin sipitaparu jalantasax jan mistxixa, ukhamarakiw walja jaqinakax Supayamp sallqjayasisax sipitapar jalantapxi. Jiwatanakarusa, saxranakarusa axsarapxarakiwa. Layqantkitucha, chʼamakaninakampich ñanqhanakar chinjaykitu sasaw llakisipxi. Supayan kʼari arunakaparjam ukat costumbrenakaparjam sallqjatäpxiwa. Diosan luqtirinakapaxa janiw Supayan sipitanakapampix sallqjayasipkiti.

Jehová Diosaxa Supayat sipansa jukʼamp chʼamaniwa. Jumatï Jehová Diosar luqtätaxa saxranakat jarkʼaqätamwa (Santiago 4:7). Layqantapkätam ukhasa janiw kunsa kamachapkätamti. Amuytʼañataki: Nigeria uksanxa, markapat jan sarxañ munïpanxa wali chʼamani kimsa layqanakax Diosan mä Qhanañchiripar layqantas jiwayañ munapxatayna. Diosan Qhanañchiripax ukham layqantatas janiw jiwkänti, uk uñjasaxa maynïr layqax wal sustjasïna ukat Diosan Qhanañchiripäki ukar sarasaw khuyaptʼayasita sasin achiktʼasitayna.

Saxranakatix jan waltʼayätamxa, Jehová Diosan sutipat artʼasiñamawa, Jupaw jarkʼaqätam (Proverbios 18:10, NM). Jehová Diosamp jarkʼaqayasiñatakixa, janipuniw saxranakar yupaychañamäkiti ni layqasiñanakarus mitisiñamäkiti. Éfeso markankir Diosan nayra yupaychirinakapax ukham lurapxäna. Layqasiñxat qillqat taqi libronakap apthapisax ninaruw phichhantxapxäna (Hechos 19:19, 20). Jichha tiempo Diosan Qhanañchirinakapax uka  kikpwa lurapxañaparaki. Chʼiqa chʼankhanaka, illanaka, layqasiñ libronaka ukat taqi kunatï layqasiñataki apnaqapki ukanakxa apanukxañamawa.

Jehová Diosarutï kusisiyañ munstaxa, janiw jan walïki ukanak jaytañamakïkiti ni kʼari yupaychäwinak jaytañamakïkisa. Jan ukasti taqi chuymaw chiqa yupaychäw tuqi saytʼasiñama. Bibliarjamax akanakaw mayisi:

Aka Uraqinxa Supayampin saxranakapampin kʼari yatichirinakapasa jan wali luririnakasa utjarakiwa. Ukampisa, Jehová Diosan Qhanañchirinakapasa utjarakiwa. Jupanakaxa Jehová Diosan Qhanañchirinakapa satäpxiwa (Isaías 43:10, NM). Aka Uraqpachan Diosan Qhanañchirinakapax paqallq millonatsa jiläxapxiwa. Taqiniw suma luräwinaka ukat Diosan arunakap jaqinakar yatichañatakix wal chʼamachasipxi. Kawki markansa jumax uñjasmaw Jehová Diosan Qhanañchirinakapar Tantachasiñ Utanakapan tantachasiri, jumatï ukar sarasmaxa wali suma katuqtʼatarakïsmawa.

Diosar taqin luqtapxañapatakiw chʼamachasipxi. Jupanakaw utaman Bibliat yatichtʼasipkätam ukhamat juman chiqpach Diosar uñtʼasa yupaychañamataki. Uka yatichäwi katuqañaxa janiw qullqitakïkiti. Jehová Diosan Qhanañchirinakapaxa kusisitaw Diosan Arup yatichapxätam, kunattix jupanakax Diosaruw munasipxi ukhamarak jaqi masiparusa.