Supayampi saxranakapampix nayratpachapuniw jan sinttʼasisa jaqinakar tʼaqhisiyapxirïna. Amtañäni Supayax Diosat jan jithiqtir Job tatan uywanakaparusa luqtirinakaparusa jiwarayänwa. Ukat mä jach’a ‘thayampiw’ tunka wawanakaparux kawkïr utankapkäntix ukar allxattayäna. Job tatarusa Supayax “jan qullkaña llixti usumpiw usuntayäna. Ukatsti uka llixti usuxa kayuta, pʼiqikamaw katuntäna” (Job 1:7-19; 2:7).

Jesusax aka Uraqinkäna ukhaxa, saxranakax ukhamarakiw jaqinakar amutur tukuyäna ukat juykhuptayäna (Mateo 9:32, 33; 12:22). Mä kutixa, mä chacharuw saxranakax wal tʼaqhisiyapxäna, ari qalanakamp kunaw liqʼjasiyapxäna (Marcos 5:5). Ukhamarakiw mä waynarux walpun arnaqasiyapxäna, tʼuku usunïkaspas ukhamwa, pampar ‘liwinukupxäna’ ukat wal khatatiyapxäna (Lucas 9:42).

Supayampi saxranakapampix jichhürunakan ukhamarakiw jaqinakarux tʼaqhisiyapxi. Chiqpachansa, alaxpachat aka Uraqiru  jaquqanitäxapxäna ukat aksarux jukʼampiw jan walinakax jilxattawayi. Saxranakan jan walinak utjayatapakiw uraqpachan yatisiski. Yaqhip jaqinakarux usuntayapxiwa. Yaqhipanakarusti janiw arumax ikiyapkiti jan ukasti jan wali samkanakampiw tʼaqhisiyapxi. Ukat yaqhipanakarux qʼañunak lurasaw tʼaqhisiyapxi. Ukat yaqhanakarusti jiwayapxañapataki jan ukax jiwayasipxañapatakiw luqhiptayapxaraki.

Surinam markan jakasiri Lintina sat warmix akham siwa: familiajatxa tunka suxtaniruw saxranakax jiwarayi, ukat nayarux 18 maraw amuy tuqitsa janchi tuqitsa wal tʼaqhisiyawayapxitu sasa. Ukat jupa pachpaw akham saraki, “saxranakaxa jiwayañkamaw maynirux tʼaqhisiyapxi” sasa.

Ukampisa, Jehová Diosaw luqtirinakaparux Supayat jarkʼaqaspa (Proverbios 18:10).