JEHOVÁ DIOSAX profetanakarux yatiyataynawa jachʼa jilïri, Qhispiyiri Mesiasxata. Jupax khitïpachas uk yatiñax janiw chʼamäkiti, profetanakax yurïwipatsa irnaqäwipatsa jiwäwipatsa yatiyxapxataynawa. Muspharkañapuniwa, taqi uka profecianakaxa Jesucristonwa phuqasitayna, kunjamtï arsuskäna  ukhamapuniw phuqasitayna. Kunjamsa yuritayna, kunjamsa wawäkasina sarnaqatayna uka tuqit profecianak uñjañäni.

Profeta Isaiasaxa, David chachan familiapatwa Mesiasax jutani sasaw satayna (Isaías 9:7). Ukhamaskapunïnwa: Jesusax rey Davidan familiapatwa jutäna (Mateo 1:1, 6-17).

Miqueas sata, Diosan profetapaxa, “Belén Efrata” markanwa yurini ukat apnaqirirakïniwa sasaw satayna (Miqueas 5:2). Kunapachatï  Jesusax aka Uraqiru jutkäna ukhaxa, Israelanxa pä Belén markanakaw utjäna. Maynïristi alay tuqinkänwa Nazaret jakʼana, maynisti, aynach tuqinkarakïnwa, Jerusalén jakʼana. Jerusalén jakʼankkäna uka Belén markaxa nayrax Efrata satänwa. Uka markanwa Jesusax yuritayna, ukhamatwa uka profeciax phuqasitayna (Mateo 2:1).

Yaqha profeciax akham sänwa, “Egiptot” mistsuñapatakixa Diosaw Yuqaparux jawsani sasa. Ukax phuqasitaynawa, Jesusaxa wawäkasin Egiptoru apatänwa, ukat mä qhawqha tiempotxa, kunapachatï Herodes reyix jiwxatayna ukhawa, markaparu kuttʼxäna. Ukhamwa uka profeciax phuqasitayna (Oseas 11:1; Mateo 2:15).

“ Mesías tuqit profecianaka” siski ukanxa, “Profecía” sat pʼiqinchaw utji, uka Bibliankir jiskʼa tʼaqanakanxa uñachtʼayistuwa kunjamsa Mesías tuqitxa profecianakaxa arsusïna. Uka qillqatanaka uñxatasaxa, “Phuqasïwi” sata pʼiqinchäwin jiskʼa tʼaqanakapwa uñxatarakïta. Ukhamatwa, yatïta Diosan Arupaxa chiqätapa.

Aka jiskʼa tʼaqanaka uñakipkasaxa janiw armtʼasïtati, uka profecianakax qillqaskäna uka marata Jesusan yuriñapkamaxa walja maranakäxänwa. Jesusax sataynawa: “Phuqhasiñapänwa taqi kunatix naya tuqitx qillqatäki Moisesan leyipana, profetanakan libronakapana, ukhamarak Salmonakansa ukanakaxa” sasa (Lucas 24:44). Kunjamtï Bibliaman uñjktaxa, taqi uka profecianakaxa phuqasipuniwa.