1, 2. Khitinakas Jehová Diosan munasitanakapax uka tuqit arstʼma.

 ¿KHITIRUSA munat masimäñapataki ajllisma? Inasa, jumjam amuytʼani, amtani, sum sarnaqiri munat masinïña munchisma. Chiqansa, ukham suma jaqimpi sarnaqañwa munasmaxa. Lunthatasiri, uñisir jaqin munat masipäñxa janiw munkasmati.

² Ukhamarakwa Diosax jaqinakaru ajllitayna jupan munasitanakapäpxañapatakixa. Khitinakäpachas uk uñjañäni. Abrahamax munatajaw sataynaw Diosaxa (Isaías 41:8; Santiago 2:23). David reyitxa akham sataynawa: ‘Munañajarjam sarnaqiriwa’ sasa, kunattix ukham jaqinakaruw Diosax munasi (Hechos 13:22). Ukhamarakiw Daniel profetaruxa Diosax ‘walpun munasirakïna’ siw Bibliaxa (Daniel 9:23).

3. ¿Kunatsa Jehová Diosax yaqhipanakaru ajllpacha munasitanakapäpxañapatakixa?

³ ¿Kunatsa Jehová Diosaxa Abraham David Daniel chachanakarux munasitanakajaw sispachäna? Kunattix Abrahamarux sänwa: “Nayaru obedecitam layku[wa]” sasa (Génesis 22:18). Ukhamasti, mayitanakap altʼat chuymampi luririnakaruw Diosax jakʼachasi. Israelitanakarux Diosax akham sarakïnwa ‘nayaru istʼapxita; ukhamatwa nayax jumanakan Diosamäxä, jumanakasti nayan markajapxarakïtawa’ sasa (Jeremías 7:23). Diosaru istʼäta ukhaxa, munasitaparakïsmawa.

4, 5. ¿Kunjamsa Jehová Diosax markaparux chʼam churi?

⁴ Diosan munasitapäñax kunjamäpachasa uk amuytʼañäni. Jehová Diosax sapüruw jaqinakarux uñjaski “ukhamata chʼama churañataki khitinakatix chiqpachana juparu iyawsasipki ukanakaru” siw Bibliaxa (2 Crónicas 16:9). ¿Kunjamatsa Diosax chʼam churiristamxa? Salmo 32:8 qillqatanxa Jehová Diosax siwa: “Nayranakaxax jumaruw uñchʼukisktam, nayaw yatichaskäma, nayaw amuytʼayaskäma, nayaw sarañamäki uka thak uñachayaskäma” sasa.

⁵ ¡Ukham suma arunakampiwa Jehová Diosax uñjaskämaw sistamxa! Sum sarnaqañataki yanap munätaxa yanaptʼätamwa, ukat ukarjam sarnaqätaxa uñjaskarakïtamwa walikïskañamataki. Jan waltʼäwinakata, yantʼanakata mistuñamatakiw Diosax yanaptʼañ muntamxa (Salmo 55:22). Ukhamasti, Diosarutï taqi chuyma luqtätaxa, Salmo qillqirjamaw jikxatasïta, jupasti sänwa: “Nayax [Jehová] Tatitump chikapuniw sarnaqaskta, jupaw kupïxaxanki, janiw kunas tinkuykitaniti” sasa (Salmo 16:8; 63:8). Jïsa, Jehová Diosaw yanaptʼaskätam Jupar kusisiykir suma jakäwinïñamatakixa. Ukampisa, Diosan mä uñisiripawa, ukham sum sarnaqañamxa janiw munkaniti, ukxa taqiniw yattanxa.

6. ¿Jaqinakxat kamsataynasa Satanasaxa?

⁶ Kunjamtï 11 jaljan yatichaskixa, Supayaw Diosan jachʼa kankañaparux qallasitayna. Jehová Diosax kʼarïkaspasa, janis suma apnaqirïkaspa ukhama, Adanas Evas munañaparuw walsa jan walsa amtapxaspa sasaw satayna. Nayra awk taykasax juchachasipxäna uka qhipatxa, aka Uraqirux wal wawanakapax mirantxapxäna. Ukatxa, jan wali amtampiw taqi jaqinakax Diosar yupaychapxi sarakitaynaw Supayaxa. “Jaqinakax janiw Diosar munasiñat yupaychapkiti. Diosatï jan arxatkaspaxa, khitsa Dios contra saytʼayaskakiristwa” siskaspas ukhama. Job libronwa Supayan ukham amuyatapax  sum qhanañchasi. ¿Khitïnsa Job chachaxa? ¿Kunatsa Diosar qallasïwipat parlasin jupar ayttanxa?

7, 8. 1) ¿Khä tiemponxa kunatsa Job chachax wali uñtʼatänxa? 2) Job chachax Diosar taqi chuyma yupaychaskäna ukhaxa, ¿Supayax kamsataynasa Job chachatxa?

⁷ Niya 3.600 maranakaw pasxi Job chachan jakatapatxa. Wali suma jaqïnwa, ukatwa Diosax säna: “Janiw khitisa uraqinxa utjkiti jupjama chiqa, aski jaqixa, jupasti janipuniw khitirus ñanqha lurañ munkiti” sasa (Job 1:8). Ukhamasti, Jehová Diosax Job chacharux suma nayrampiw uñjäna.

⁸ Job chachaxa janis taqi chuyma Diosar yupaychkaspa ukhamwa kʼarintäna. Supayax Jehová Diosarux sänwa: “Jumax janiw khitina juparu llamktʼañapsa munktati, janirakiw familiaparusa, kuna yänakapatix utjki ukanakarusa. Jumasti taqi luratanakaparux bendeciraktawa, ukatwa jupax uraqinxa walja uywanakani qamir jaqixa. Jichhasti kunanakapatix utjki ukanakxa apaqxam ukapachaw uñjäta kunjamtix juman ajanumaru ñanqha arunakampi maldecïtam ukxa” sasa (Job 1:10, 11).

9. ¿Kamachataynas Jehová Diosax Supayan qallasïwiparuxa, kunatsa?

⁹ Diosaw taqi kuns Job chachar churi uka laykukiw yupaychaski sataynaw Supayaxa. Job chacharutï yantʼasispaxa, Dios contraw saytʼaspa sarakitaynawa. ¿Kamachataynas Jehová Diosax Supayan qallasïwiparuxa? Yantʼmay sataynawa. Chiqapunit Job chachax Diosar munasisin luqtpachäna jan ukax janicha, ukax ukhamatwa qhanañchasiñapäna.

10. ¿Kuna yantʼanakans Job chachax uñjasïna, ukat kamachakïnsa?

¹⁰ Ukaratpachaw Supayax taqi tuqit yantʼäna. Uywanakap lunthatsuyäna, chikat jiwarayarakïna ukat niya taqpach yanapirinakapaw jiwarayatäna. Taqi ukanakax jan kunan uñjasiyäna. Ukat mä jachʼa thayampiw wawanakapar jiwarayäna ukampirakiw tʼaqhisiyäna. “Taqi ukhamanaka uñjkasasa Job chachax janiw kuna juchsa lurkänti, janirakiw kuna jan walinaksa Dios tuqix arskarakinsa” (Job 1:22).

11. 1) ¿Kun uñachtʼayañsa Satanasax munäna, ukat Jehová Diosax kamachataynasa? 2) ¿Khuyañ usuntkasasa kamachänsa Job chachaxa?

 ¹¹ Supayax janiw ukhamaruk jaytkänti. Akham amuytʼaspachänxa, taqi yänakap yanapirinakap wawanakap apaqkatasa Job chachax aguantaskakispawa, usuntayä ukhapï niyas Dios contra saytʼanix sasa. Jehová Diosax ukhamax yantʼmay sataynawa. Supayax axtkañ usumpiw khuyañ usuntayäna. Ukhamäkipansa Job chachax Diosatxa janiw jithiqtkänti, iyawsäwiniskakïnwa. Ukhamasti, “Job chachaxa janiw kuna juchanaksa lurkänti, janirakiw lakapampis kuna jan walinaksa arskarakïnti” Dios contraxa (Job 2:10).

12. ¿Supayan qallasïwiparux kunjamsa Job chachax saykatatayna?

¹² Supayaw ukham tʼaqhisiyaskäna, ukxa janiw Job chachax yatkänti. Diosach ukham tʼaqhisiypachitu sasaw amuyasïna, janipï yatkäntix Diosan jachʼa kankañapar Supayan qallasitapxa (Job 6:4; 16:11-14). Ukampisa, Jehová Diosatakix aski jaqïskakïnwa. Ukhamaraki suma sarnaqäwipampixa uñachtʼayänwa Supayan arupax kʼarïtapa, kunattix jupax taqi chuymapuniw Diosar yupaychaskäna.

13. Job chachax Diosatakjam chiqapar sarnaqatapatxa, ¿kunsa Diosax Supayarux uñachtʼayi?

¹³ Job chachan ukham chiqap sarnaqatapampiw Diosax Supayan ñanqha kʼariparux janiw ukhamäkiti satayna. Jehová Diosan munasitapäskapunïnwa Job chachaxa, ukatwa ukham sum sarnaqatapatxa bendicirakïna (Job 42:12-17).

14, 15. Janiw Job saparuki kʼarintkänti jan ukasti taqiniruw kʼarintäna, ¿kunatsa ukham sisnaxa?

¹⁴ Jaqinakax janiw taqi chuyma luqtktamti sas Diosar qallasisinxa, Supayax janiw Job tuqitak parlkänti, jan ukasti jiwasanakamppachatwa qallasïna. Bibliax uk sum qhanañchi, Proverbios 27:11 siwa: “Munat wawaxay, yatiñanïmaya, nayarux kusisiyitätawa; ukhamatwa arsusixa nayar tuqir jaqinakarusa [qallasirijarusa, NM]” sasa. Job chachan jiwatapatxa walja maranakaw pasxäna ukhawa aka arunakax  qillqasïna, ukürunakanxa Supayax qallasiskakïnwa, Diosan luqtirinakaparus kʼarintaskakïnwa ukwa ukax uñachtʼayistu. Jehová Diosatakjam sarnaqasaxa yanaptʼtanwa, Supayan kʼarinakaparu janiw ukhamäkit sayañataki, ukhamatwa Diosarux kusisiyaraktanxa. ¿Uka tuqit kamsasmasa? Jan wali luräwinak apanukuñamächinisa, ¿janit munkasma Supayan kʼarinakaparu ‘janiw ukhamäkiti’ sañ yanaptʼañxa?

¹⁵ Supayax akham sänwa: “Mä jaqixa jakañapa qhispiyasiña laykuxa kunsa lurakispawa” sasa (Job 2:4). ‘Mä jaqi’ sasinxa, janiw Job saparukix kʼarintkänti, jan ukasti taqi jaqinakaruw kʼarintäna. Uk yatiñax wali wakisiriwa. Kunattix jumax janis Diosar taqi chuyma yupaychkasma ukham kʼarinttamxa. Jan waltʼäwinakankkäta ukhax Diosar jan istʼañamwa Supayax muni, kunatï jan walïk uk lurañamwa munaraki. ¿Kunjamanakats Supayax amtaparjam sallqjistaspa?

16. 1) ¿Supayax kuna sipitanakampisa Diosat jaqinakaru apaqi? 2) ¿Kunjamatsa jumar sallqjiristamxa uka sipitanakapampixa?

¹⁶ Kunjamtï 10 jaljan uñjktanxa, Satanasax walja sipitanakaniw Diosat jaqinakar apaqañatakixa. Mä tuqitxa, “mä leonar uñtataw warartʼasisa sarnaqaski khitiru manqʼantañatakisa” (1 Pedro 5:8). Kunapachatï uñtʼatanakamasa, familianakamasa, yaqha jaqinakasa, jan Bibliat yatiqañama, ni ukarjam sarnaqañamsa munapkaniti ukhaw Supayan jan walinak wiytatapxa amuyasïta (Juan 15:19, 20). a Maysa tuqitxa, “pachpa Supayapuniw [...] mä qhana angeläkaspas ukham tukuxa” (2 Corintios 11:14). Ukhamawa, Supayax kunaymani sipitanakwa aptaspa jumar sallqjañatakixa, Diosar jan kusisiykir jakäwiniñamatakisa. Maynïristi Diosar yupaychañataki chʼam apaqañawa. Janipunis Diosar kusisiykasma ukhamwa jumar amuyayiristamxa (Proverbios  24:10). Ukampisa, Satanasax ‘leonar uñtatasa’ sarnaqaskpan jan ukax “mä qhana angelarus” tukuskpana, qallasïwipaxa pachpakïskiwa, jupax siwa: jan waltʼäwinkkätasa jan ukax yantʼankkätasa Diosar yupaychañatxa saraqätawa sasa. ¿Kunjamsa jumax janiw ukhamäkiti sasma? ¿Ukat kunjamsa Job chachjamarakïsma Diosar yupaychkasaxa?

17. Chiqpachansa, ¿kunatsa Jehová Diosan kamachinakap istʼtanxa?

¹⁷ Diosar kusisiykir jakäwimpiw uñachayäta Supayan qallasïwipax kʼarïtapa. ¿Ukax kamsañs muni? Bibliax akham siwa: “[Jehová] Diosamarusti taqi chuymamampi, taqi jakañamampi, taqi chʼamamampi munam” sasa (Deuteronomio 6:5). Diosarutï jukʼamp munasïtaxa, jukʼampwa munañap phuqañ munätaxa. Apóstol Juanax sänwa: “Diosar munañaxa mandamientonakar phuqhañawa” sasa. Jehová Diosarutï taqi chuymamampi munasïtaxa “mandamientonakapasti janirakiw jan phuqhañjamäk[aniti]” (1 Juan 5:3).

18, 19. 1) Diosan mä qhawqha kamachinakap arstʼma (“ Diosan uñisit luräwinakxa jan lurapxañäniti” sat recuadro uñxatma). 2) ¿Diosax janiw chʼamasat jil maykiti uk kunjams yattanxa?

¹⁸ ¿Kawkïrinakas Jehová Diosan kamachinakapaxa? Yaqhipanakax jan wali sarnaqäwinakan jan sarnaqañatak qillqatawa. Amuytʼañataki, “ Diosan uñisit luräwinakxa jan lurapxañäniti” sat recuadro uñxatma. Bibliax ñanqha luräwinakawa siski ukanakawa mayat mayata uñachtʼayasiski. Inas may uñxatäta ukhaxa jan ñanqha luräwinakjamäkchiniti. Bibliat apstʼata jiskʼa tʼaqanakat lupʼïta ukhawa uñjäta Diosan kamachinakapaxa wali askïtapxa. Jichhax inas jan walinakax jan apanukuñjämäkchiniti, inas jumatakix wali chʼamächini ukaxa. Ukampisa, khitinakatix Diosar kusisiykir jakäwin sarnaqapxki ukanakaxa chuymas phuqtʼata kusisita ukhamaw sarnaqasipxi (Isaías 48:17, 18). Jumax ukhamarakïsmawa. ¿Kunjamatsa uk yatsna?

¹⁹ Kunattix Jehová Diosax janiw maykistuti jan phuqañjamanakxa (Deuteronomio 30:11-14). Jupax yatiw  kawkikamatakis chʼamax utjistu, kunanakaksa lursna uks yatirakiwa (Salmo 103:14). Ukat jupar jaysañatakix chʼamsa churistaspawa. Pablox sänwa: “Jupasti janiw jumanakarux jachʼa jan atipkaya yantʼanakxa churapkätamti. Kunapachatï yantʼax jutkani ukkhaxa, Diosax kunjämatsa uka yantʼar atipjañxa yanapapxarakïtamwa, ukhamatwa atipjapxäta” sasa (1 Corintios 10:13). Aguantaskakiñatakixa, Jehová Diosax ‘jachʼa chʼamapxa’ churistaspawa (2 Corintios 4:7). Ukhamwa Pablorux chʼam churäna; yantʼäwinaka pasasax akham sänwa: “Chʼamapampix taqi kunaruw saykatirista” sasa (Filipenses 4:13).

20. ¿Diosar kusisiyañatakix kunjam jaqïñamasa, ukat kunats wakisiri?

²⁰ Diosar kusisiyañatakix janiw uñisitanakapak uñisiñasäkiti. Jan ukasti munatanakapxa munasiñasarakiwa (Romanos 12:9). ¿Janit jumjam amuyani, amtani, sarnariqimpix chikachasiñ munkasma? Jehová Diosax ukhamarakiwa. Ukhamax munasirakimay Diosan munatanakapxa. Kunjam jaqinakas Diosan munasitanakapäpxi ukax Salmo 15:1–5 qhanañchasiski. Diosan munasitanakapax kuntï  Bibliax ‘qullan ajayun luräwipa’ siski uk uñachtʼayapxi, ukanakasti akanakawa: “munasiña, kusisiña, samaraña, llampʼu chuymanïña, taqimpis sumankaña, khuyapayasirïña, taqi kunansa phuqhirïña, llampʼu chuymanïña, janchin munañapar atipjaña” (Gálatas 5:22, 23).

21. Diosar kusisiykir jakäwiniñatakixa, ¿kunas yanaptʼiristamxa?

²¹ Biblia sapüru liyïta ukat yatxatarakïta, ukaw Diosar kusisiykir jakäwinïñatakix yanaptʼätamxa. Ukat kunjam sarnaqañamsa Jehová Diosax muni uk yatiqaskakïtaxa, Diosan munañaparjamarakiw sarnaqxäta (Isaías 30:20, 21). Jehová Diosarutï jukʼampi munasïtaxa, jukʼampirakwa Diosaru kusisiyañxa munäta.

22. ¿Diosan chuymapar kusisiyasa jakasisaxa kuns jikxatäta?

²² Diosar kusisiyas jakañatakixa wakisiw chʼamachtʼasiñasa. Maynitix jan walinaka jakäwipat apanukxanixa, thantha isips apanukkaspa ukat machaqatsa isthapiskaspa ukhamaw siw Biblianxa (Colosenses 3:9, 10). Ukatxa, Salmo qillqirix akham sataynawa kamachinak tuqitxa: “Arunakam imañax askinak jikxatañawa” sasa (Salmo 19:11). Jumatï Diosar kusisiyasa jakasïtaxa, walja bendicionanakarakwa katuqäta. Ukhamarusa, Satanasan qallasïwiparusa saykatarakïtawa, Diosan chuymaparusa kusisiyarakïtawa.