BIBLIAXA hebreo arumpita griego arumpita qillqatänwa, ukansti, paqallqtunka jila kutiw, scheʼóhl hebreo arumpi ukat háides griego arumpix uñsti, ukasti jiwañ tuqitwa parli. Yaqhip Biblianakanxa “sepulcro”, “infierno”, “manqhapacha”, “amay imäwi”, “jiwatanak taypi” ukham jaqukipatawa, ukat niya ukham yaqha arunakampiru jaqukipatarakiwa. Ukampisa, yaqha arunakanxa janiw scheʼóhl hebreo arutakisa, háides griego arutakis arux utjkiti. Ukatwa uka arunakaxa Traducción del Nuevo Mundo sat Biblianxa, español arut akham sas qillqapxi: “Seol” ukat “Hades”. Jichhasti, ¿kamsañsa uka arunakaxa munpacha? Biblian kamspachasa uk uñjañäni.

Eclesiastés 9:10 siwa: “Jumax sepulcror [Seol] sarkätas ukanxa janiw kuna lurañas utjkiti, kuna lupʼiñasa, uñtʼañasa, janirakiw yatiñanïñasa utjkiti”. ¿Ukhamax Seol arux sapa amay imäwi sañti munpacha? Janiwa. Kunapachatï Bibliax sapa amay imäwit parlki ukhaxa janiw scheʼóhl ukat háides arunakxa uchkiti jan ukasti yaqha arunakwa uchi (Génesis 23:7-9; Mateo 28:1). Seol arux janirakiw walja jiwatanakaru mä imäwiru allintapxi uk sañ munkiti, mä arunxa familiapachataki wakichat panteonäkaspas ukhama (Génesis 49:30, 31).

Ukhamaxa, kunapachatï Diosana Arupaxa “Seol” jan ukax “Hades” arunakat parlaski ukhaxa, ¿kamsañs munpacha? Mä imäwiru walja jiwatanakaru allintapxi ukat sipansa wali jachʼäkaspas ukham sañ muni. Ukatakixa Isaías 5:14 uñxatañäni, ukanxa, Seolax jachʼa lugaräkaspasa ukhamawa, jiwañasti [scheʼóhl] “lakapxa ansatati markpacharu [...] manqʼantañataki” siwa. Ukhamasti uka “amay imäwixa [scheʼóhl]” walja jiwatanaksa manqʼthapkaspa ukhamawa, janipuniw sisthapkiti, munaskakiwa (Proverbios 30:15, 16). Janiw cementeriojam phuqtʼirïkiti, jan ukasti ‘janipuniw kunapachas sisthapkiti amay imäwixa [scheʼóhl]’ (Proverbios 27:20). Ukhamasti, Seol, Hades ukanakaxa janipuniwa phuqtʼkaspati. Janiw mä cementerio sañ munkiti.

 Kunapachatï Biblian jaktañxat yatiqtanxa, ukhaw Seol, Hades arunakxa sum amuyxtanxa. Kunapachatï jaktanir jiwatanakat Diosan Arupax pärlki ukhaxa, Seol, Hades ukankapxiw siwa (Job 14:13; Hechos 2:31; Apocalipsis 20:13). a Jehová Diosar yupaychirinakas jan yupaychirinakas ukankapxiw sarakiwa (Génesis 37:35; Salmo 55:15). Ukatwa ‘ñanqha jaqinakasa, aski jaqinakasa’ jaktanipxani sixa (Hechos 24:15).