¿Kuna Reinos aka Oraqpach apnaqani uk yattati?... ¡Diosan Reinopaw apnaqani! Uka Reinowa, mä arunjja, Diosan gobiernopaw aka Oraqpach mä suma paraisor tukuyani. ¿Uka Reinot jukʼamp yatiñ munasmati?...

¿Mä reyejj kuns lurpacha uk yattati? Reyejj marka apnaqer mä jaqewa. Diosan Reinopan apnaqer Reyipajja, alajjpachanwa jaki. ¿Khitïpachas uk yattati?... ¡Jesusawa! Mä qawqha tiempotjja, jupaw aka Oraqen jakapkani taqe uka jaqenakar apnaqani. Ukampis ¿suma Reyïpachäniti? Apnaqäwipanjja, ¿kusisit jakasiñajj utjpachäniti?...

Aka Oraqejj mä paraisöjjani ukhajja, janiw guerranakasa, usuntañasa, ni jiwañas utj-jjaniti. Juykhunakas uñjapjjaniwa, oqaranakas istʼapjjarakiniwa. Suchunakasa sarnaqjjapjjaniwa. Manqʼañas waljaw utj-jjani. Animalanakasa wali sumaw jakasipjjani, janiw jaqenakarusa ni yaqha animalanakarus usuchjjapjjaniti. Janiw ukakïkiti, jiwatanakas jaktanipjjaniwa. Ukhamajja, Rebecasa, Rahab warmisa, Davitasa, Elías chachasa ukat Diosan  mayni servirinakapasa jaktanipjjaniwa. ¿Jupanakar uñtʼañ munasmati?...

Jehová Diosajj wal munastamjja ukat kusisit jakasisma ukwa munaraki. Jumatï Jehová Diosat yateqaskakïta ukat Jupar istʼaskakïta ukhajja, wiñayatakiw mä suma paraison jakasïta. ¿Uka suma paraison jakasiñ munasmati?...