24 YATICHÄWI
¿Kunsa Bibliajj angelanakat yatichi?
Jehová Diosajj alajjpachankir familiapar uñtʼañaswa muni. Uka familiap taypin angelanakaw utji, jupanakajj ‘Diosan wawanakapa’ satäpjjewa (Job 38:7). ¿Bibliajj kunsa angelanakat yatichi? ¿Angelanakajj kunsa lurapjje? ¿Taqpach angelanakat Diosan familiap taypinkapjjpacha?
1. ¿Angelanakajj khitinakäpjjesa?
Jehová Diosajj janïr aka oraq lurkasajj angelanakwa luräna. Uka angelanakajj Diosjam jan uñjkañ espiritüpjjewa, alajjpachanwa jakapjjaraki (Hebreos 1:14). Walja millón angelanakaw utji, ukampis jupanakajj janiw mä igualakïpkiti (Apocalipsis 5:11). Uka angelanakajja ‘Jehová Diosan arunakap phoqeri, arunakapar istʼirinakäpjjewa’ (Salmo 103:20). Nayra tiemponjja Jehová Diosajj arunakap markapar yatiyañatakisa, markapar yanaptʼañatakisa salvañatakisa awisajj angelanakapwa khitanirïna. Jichhürunakanjja khitinakatï Diosar uñtʼañ munapki uka jaqenakar jikjjatapjjañapatakiw angelanakajj cristianonakar yanaptʼasipki.
2. ¿Khitis Supayasa demonionakasa?
Yaqhep angelanakajj Jehová Diosatwa jitheqtawayapjje. Dios contra saytʼiri nayrïr angelajja, “Diablo ukhamarak Supaya” satawa, jupaw “oraqen taqe jakirinakar engañjaski” (Apocalipsis 12:9). Supayajj amtaparjamaw mayninakar apnaqañ munäna, ukatwa Adanampir Evampirojj Dios contra saytʼayäna. Qhepatjja yaqhep angelanakarus Dios contraw saytʼayarakïna. Dios contra saytʼiri angelanakajj demonionaka satäpjjewa. Jupanakarojj Jehová Diosaw alajjpachat aka oraqer jaqoqanïna, niyaw tukjatäpjjarakini (Apocalipsis 12:9, 12 liytʼäta).
3. ¿Supayampi demonionakampejj kunjamsa engañjañ munapjjestu?
Supayampi demonionakampejj layqasiñanakampi yaqha ukhamanakampiw jaqenakar engañjapjje, uka jan wali luräwinak lurasaw jaqenakajj demonionakamp parlapjje. Amuytʼañataki, yaqhep jaqenakajja yatirinakaru, warawaranak uñchʼukisin yatirinakaru (astrologonakaru), curanderonakaru, ukhamarak layqanakaruw jisktʼasipjje. Yaqhepajj yatirinakan ukaruw qollayasir sarapjjaraki. Yaqhepasti jiwatanakamp parlañsa puedipkaspa ukham creyipjjañapatakiw jaqenakar engañjapjje. Ukampis Jehová Diosajja, “janiw jumanakajj jiwatanakamp parlirinakan yanaptʼap thaqapjjañamäkiti, janirakiw yatirinakarus jisktʼasipjjañamäkiti” sasaw ewjjtʼistu (Levítico 19:31). Supayampi demonionakampejj Diosan enemigonakapäpjjewa, jan waltʼayañwa munapjjarakistu, ukatwa Diosajj jupanakat jarkʼaqañ munistu.
JUKʼAMP YATJJATAÑÄNI
Angelanakajj kuna sumanaksa lurapjje, demonionakamp mayachatäki uka luräwinakar mitisiñajj kuna jan walinakarus purtʼasiyistaspa ukanakatwa jichhajj yatjjatañäni. Kunjamsa Supayatsa demonionakatsa jarkʼaqassna uka toqetsa yatjjatarakiñäniwa.
4. Angelanakajj jaqenakaruw Jehová Diosar uñtʼapjjañapatak yanaptʼapjje
Angelanakajj janiw jupanak pachpajj jaqenakar predicapkiti. Antisas Diosar uñtʼañ munapki ukanakar jikjjatapjjañapatakiw Diosan servirinakapar yanaptʼapjje. Apocalipsis 14:6, 7 liytʼasajja aka toqetwa parltʼapjjäta:
-
¿Kunatsa predicañatakejj angelanakan yanaptʼap muntanjja?
-
Angelanakajj Bibliat yateqañ munapki ukanakar jikjjatañatakiw yanaptʼiristam, ¿uk yatiñajj jumatak kunjamakisa? ¿Kunatsa ukham amuyta?
5. Janipun demonionakamp mayachatäki uka luräwinakarojj mitisiñäniti
Supayampi demonionakampejj Jehová Diosan enemigonakapäpjjewa, jiwasansa enemigonakasarakiwa. Lucas 9:38-42 liytʼasajja aka toqetwa parltʼapjjäta:
-
¿Demonionakajj kunjamsa jaqenakar jan waltʼayapjje?
Janiw kunanakatï demonionakar kusisiykaspa ukanak lurañ munktanti, ukanakajj jan waliruw apistaspa. Deuteronomio 18:10-12 liytʼasajja aka toqetwa parltʼapjjäta:
-
¿Kunjamanakatsa demonionakajj munañapar apnaqañ munistu, jiwasamp chikachasiñs munapjjaraki? Jakaskta uka cheqanjja, ¿demonionakamp mayachatäki uka luräwinakat kawkïrinakas utji?
-
Demonionakamp mayachatäki uka luräwinakat jitheqtañaswa Jehová Diosajj muni, ¿ukham mayitapajj walikïskiti? ¿Kunatsa ukham amuyta?
VIDEO uñtasajja aka toqetwa parltʼapjjäta:
-
Paulinajj mä amuleto wawapar uchäna, ¿uk luratapajj walikïskänti? ¿Kunatsa ukham amuyta?
-
Demonionakat jarkʼaqasiñatakejja, ¿kunsa Paulinajj lurañapäna?
Cheqpach cristianonakajj demonionak contrapuniw saytʼapjje. Hechos 19:19; 1 Corintios 10:21 liytʼasajja aka toqetwa parltʼapjjäta:
-
Demonionakan luräwinakapar chʼamañchki ukanakaw juman utjaspa, ¿kunatsa ukanak qʼal tukjañamajj wali wakiskirejja?
6. Supayarus demonionakarus atipjasmawa
Demonionakan pʼeqtʼiripajj Supayawa. Ukampis Diosat jan jitheqtiri angelanakan pʼeqtʼiripajj arcángel Miguelawa, Miguelajj Jesusan yaqha sutipawa. ¿Jupajj qhawqha chʼamanisa? Apocalipsis 12:7-9 liytʼasajja aka toqetwa parltʼapjjäta:
-
¿Miguelampi angelanakapampit wali chʼamanïpjje, jan ukajj Supayampi demonionakapampicha?
-
¿Criston arkirinakapajj Supayarusa demonionakarus ajjsarapjjañapäspati?
Jumajj Supayarus demonionakarus atipjasmawa. Santiago 4:7 liytʼasajja aka toqetwa parltʼapjjäta:
-
¿Kunjamsa Supayatsa demonionakatsa jarkʼaqasisma?
YAQHEPANAKAJJ AKHAM SAPJJEWA: “Magianakani, layqasiñanakani jan ukajj yaqha ukhamanakani anatañanakasa peliculanakasa walikïskiwa. Ukanakajj kusistʼañatakikiwa” sasa.
-
¿Kunatsa ukham amuyañajj jan walïkaspa?
¿KUNSA YATEQAWAYTAN?
Diosat jan jitheqtiri angelanakajj yanaptʼistuwa. Supayampi demonionakampejj Jehová Diosan enemigonakapawa, jaqenakarojj kunaymanitwa engañjapjjaraki.
Amtañataki
-
Jehová Diosar jaqenakan uñtʼapjjañapatakejja, ¿kunsa jupat jan jitheqtiri angelanakajj lurapjje?
-
¿Supayampi demonionakampejj khitinakäpjjesa?
-
Demonionakamp mayachatäki uka luräwinakarojja, ¿kunatsa janipun mitisiñamäki?
JUKʼAMP YATJJATAÑAMATAKI
Jesusaw arcángel Miguelajja sasajj kunatsa sistan uk yatjjatam.
Diablojj cheqpachapuniw utjaski sasajj kunatsa sissna uk yatjjatam.
Kunjamsa mä warmejj demonionakamp mayachatäki uka luräwinak apanuküna uk yatjjatam.
“Halló propósito en la vida” (La Atalaya, 1 de julio de 1993)
Kunjamsa Supayajj layqasiñanakampis magianak lurañampis jaqenakar engañji uk yatjjatam.
Akanakajj inas gustarakiristam
KUNANAKSA JUKʼAMP JISKTʼASIPJJE
¿Kunjamsa Jehová Diosan Testigonakapajj Bibliat yatichapjje?
Jehová Diosan Testigonakapajj gratisakiw Bibliat yatichapjje, kawknïr Bibliampis yateqañ munta ukajj jumatäjjewa. Jumamp chika yateqapjjañapatakejja, taqpach familiamaruw invittʼasma, amistadanakamarus invittʼarakismawa.
